ACTION SPEAKS BETTER THAN WORDS

ACTION SPEAKS BETTER THAN WORDS
IHA IMPLEMENTASAUN BOA GOVERNASAUN

Dr. Christopher Henry Samson
Diretur Ezekutivu LABEH

Monitorizasaun LABEH ba Atividade Eng. Mario Viegas Carrascalao nudar Vice PM Koordenador assuntu Jestaun Administrasaun Estadu
durante Tinan Ida

Ohin loron 5 Marsu 2010, LABEH hakarak fo Parabens ba Vice PM Koordenador Assuntu Jestaun Administrasaun Estadu, Eng. Mario Viegas Carrascalao nebe ohin kompleta ninia knar ba tinan ida iha Governasaun AMP nudar Vice PM Koordenador assuntu Jestaun Administrasaun Estadu.

Hau iha istoria ida, “Tinan ida liu ba wainhira ita rona katak Sr. Eng. Mario Viegas Carrascalao atu simu posse nudar Vice PM assuntu administrative, hau ho kolega sira tur hela iha fatin fase kareta iha kampung Alor no kolega ida husu mai hau nunee ‘Maun Chris! fiar ka lae wainhira Sr. Carrascalao sai Vice PM nia bele halo buat ruma? Hau hatan katak Hau fiar nia bele! Maibe kolega nee hatan ho hamnasa katak hau fiar nia sei labele no la halo buat ida. Hafoin de Eng. Mario Viegas Carrascalao simu tiha tomada de posse nudar Vice PM no halao knar durante fulan hirak nia laran hau hetan fali kolega ne’e no nia husu fila fali mai hau katak, Maun Chris! “Oinsa ona, hare ona ka lae, Eng. Mario Viegas Carrascalao halo ka la halo? Nia rasik mak responde katak La halo…!!!” lia fuan ida ne sai hanesan kode ida to’o ohin loron (Halo ka la halo-----!!!La halo)

Wainhira nomeia Eng. Mario Viegas Carrascalão  sai Vice Primeiru Minsitru ba assuntu Administrativa,ema barak iha Timor laran tomak tau fiar bo’ot  ba nia katak  tempu to’o duni ona atu luta hasoru korupsaun. Hare ba esperiensia  tinan 10 Eng. Mario Viegas Carrascalão nudar Governador Provinsia Timor-Timur  iha tempu  okupasaun Indonezia nian, ema barak hatete katak Carrascalão hetan susesu bo’ot  no ohin loron ema barak mak tau fiar ba nia hodi  suporta nia atu assume kargu nudar Vice Primeiru Ministru ba assuntu Administrativa.

LABEH hare katak komitmentu Eng. Mario Viegas Carrascalão nian bo’ot tebes atu luta hasoru korupsaun maibe rejistensia sira nebe nia hetan sai hanesan desafiu bo’ot ba nia atu la’o ba oin tanba ne’e nia ba hasoru Prezidenti Republika Dr. José Ramos Horta ho Primeiru Ministru Xanana Gusmão hodi husu suporta atu kontinua ka la kontinua.

Tuir Lalenok Ba Ema Hotu (LABEH) hare katak PM Xanana Gusmão hakarak luta duni hasoru korupsaun tamba ne’e mak iha loron (05-03-2009) Governu AMP foti Eng. Mario Viegas Carasscalão hodi sai Vice Primeiru Ministru ba assuntu Administrativa. Vice Primeiru Ministru Eng. Mario Viegas Carrascalão  mos hatete  katak wainhira tama iha Governu AMP, nia sei hamos nia uma laran uluk antes hamos uma laran sira seluk.

Eng. Mario Viegas Carrascalao halo ona promesa barak ba povu hodi halo mudansa radikal ba prosesu governasaun hodi halao dezenvolvimentu, hadia povu nia moris ho halakon korupsaun. Ita espera mudansa nee tenki halao iha setor hotu.Tanba mal-administrasaun, inefisiensia ho korupsaun kontribui signikante iha krizi nebee Timor Leste enfrente.  Boa governasaun katak ita tenki uza rekursu estadu didiak, efisienti ho sustentavel ba vida ema hotu nian, iha jerasaun nee ho jerasaun ikus mai. Tanba nee, la bele iha inefisiensia ho korupsaun. Eng. Mario Viegas Carrascalao promete ba povo katak nia hakarak harii ponte husi Motael ba Becora hodi hatama koruptor sira iha prizaun durante iha Kampanha Eleitoral Julhu 2007, promete mos atu halo mudansa radikal ba prosesu governasaun hodi halao dezenvolvimentu.

Ita mos akompanha loron-loron servisu  Eng. Mario Viegas Carrascalão nebe hatete dala barak katak sei lori koruptor sira ba tau iha Hotel Bekora no nia mos promete sei la hakiduk ba se deit mak halo  korupsaun iha Governu nia laran  maibe durante ne mehi sira ne’e la realiza tanba hetan rejistensia no mos iha intrepretasaun nia lei organika nebe ladun klaru ba nia servisu.

LABEH nudar ONG Anti-Korupsaun kontinua nafatin halo monitorizasaun ba aktividade Vice PM koordenador assuntu Jestaun Administrasaun Estadu nian too ohin loron tinan ida. Tanba nee LABEH hakarak konvida maluk sira hotu atu ita hare fila fali aktividade Vice PM koordenador assuntu Jestaun Administrasaun Estadu iha tinan ida nia laran. LABEH sei foti deit deklarasaun sira nebe Vice PM Koordenador assuntu Jestaun Administrasaun Estadu hatoo ka fo sai ba publiku konaba assuntu korupsaun no KAK wainhira seidauk simu posse nudar Vice PM no wainhira simu ona posse.

Monitorizasaun/observasaun husi LABEH durante tinan ida nia laran ba atividade Eng. Mario Viegas Carrascalao laos ho intensaun atu hamonu ka interven Vice PM nia servisu ka halo kompetisaun ruma maibe atu enkoraja no fo hanoin nebe konstruktivu ba Vice PM hodi halao knar diak liu tan no sai forsa liu tan iha futuru.  LABEH hakarak hatoo deit durante tinan ida nia laran Vice PM halo Deklarasaun barak liu duke Aksaun. Tanba nee LABEH uza oportunidade ida nee hodi hatoo ami nia observasaun liu husi deklarasaun sira nebe Vice PM Koordenador assuntu Jestaun Administrasaun Estadu hatoo para hotu-hotu bele hare karik iha interese pessoal ka benefisiu pessoal iha deklarasaun sira nee para ema hotu bele hare no analiza.

Tuir Monitorizasaun LABEH, iha Deklarasaun husi Vice PM balun hateten katak Vice PM sei halo vizitasaun rutina ba Ministeriu no Secretario Estadu sira maibe ita bele hare katak aksaun hanesan nee parado tiha ona. Vice PM agora tuur deit iha fatin mak halo deklarasaun deit. LABEH hare katak aktividade nebe Vice PM Koordenador Assuntu Jestaun Administrasaun Estadu halo mak barak liu husi deklarasaun duke hatudu realidade nebe outrapassa ema hotu nia hanoin.

Ita mos bele hare fila fali ba kazu nebe mak akontese iha Alfandega. Wainhira emprazarius/investedores ba hasoru Vice PM hodi aprezenta hahalok nebe mak akontese iha alfandega konaba Funsionario sira husu uang rokok, Vice PM seidauk halo klarifikasaun/investigasaun maibe Vice PM koalia kedas ba publiku katak funsionario alfandega husu uang rokok sem foti aksaun hodi hatene nee los ka lae maibe deklarasaun mak sai uluk kedas. Deklarasaun sira nee mak halo ita duvidas tanba membrus Guvernu ida fo deklarasaun sem iha investigasaun uluk, parese iha intensaun ruma karik nebe ita hotu seidauk hatene.

Iha deklarasaun Vice PM Koordenador Assuntu Jestaun Administrasaun Estadu balun nebe hateten katak se karik nia susesu iha implementasaun PEKK ema balun sei la hetan ona servisu tanba nee LABEH hanoin katak se karik nee mak indika mai LABEH, LABEH so hakarak hateten deit katak LABEH kontente se karik luta hasoru korupsaun hetan ona nia finalidade no LABEH sei lao fali ho misaun ho vizaun nebe diferente tanba kontribuisaun ba nasaun liu husi dalan barak laos iha area korupsaun deit.

Presiza tebes povu tomak bele hare no ida-idak uza nia kapasidade intelektual hodi halo analiza tuir ida-idak nia kapasidade konaba deklarasaun bar-barak nebe Vice PM Koordenador assuntu Jestaun Administrasaun Estadu hato’o ba publiku tanba deklarasaun balun presiza tebes atu ema fo hanoin tanba tuir LABEH, deklarasaun Vice PM ladun konsistente tuir situasaun real nebe iha. LABEH mos hare katak deklarasaun nebe Vice PM hatun kontradiks ho prinsipiu segredu nebe implemneta iha Konselho Ministru.

Konaba Planu Estratejika ka politika kombate korupsaun nebe Vice PM Koordenador Assuntu Jestaun Administrasaun Estadu aprezenta ba Konselho Ministru LABEH hakarak klarifika katak LABEH la kontra politika refere atu implementa, maibe LABEH hare katak ne’e laós knar principal Eng. Mario Viegas nudar Vice PM Koordenador Assuntu Jestaun Administrasaun Estadu nian tanba lei hakerek tiha ona katak instituisaun nebe bele halo Estratejia Nasional Luta hasoru Korupsaun mak kna’ar KAK laos kna’ar Vice PM Koordenador assuntu Jestaun Administrasaun Estadu nian.

LABEH mos hakarak hateten katak PEKK nebe Vice PM hatoo iha Conselho Ministru lao durante semana rua ka tolu nia laran. Wainhira hato’o PEKK ba Conselho Ministru, Vice PM hakarak estratejia nee sai lei ida hodi obriga membrus Guvernu hotu atu tuir nudar lei maibe membrus Conselho Ministru hatene momos katak nee laos nia knar Membru Conselho Ministru balun kontra no estratejia ne’e la passa nudar lei ida.

Depois de ne’e Conselho Ministru kontinua deskuti fali ba daruak konaba assuntu nee hodi bolu estratejia ne’e hanesan Rezolusaun/Regulamentu ida atu obriga membrus Guvernu tuir no dala ida tan Membru Conselho Ministru balun la konkorda nafatin no sira kontinua deskuti sobre assuntu refere ba datolu hodi tau Estratejia Politika ne’e hanesan  Estratejia Politika Governu nian, mak foin hetan aprovasaun atu Promove Boa Governasaun no Luta Hasoru Korupsaun iha Guvernu nia laran. Ida nee deit bele hatudu ona ba Vice PM Koordenador assuntu Jestaun Administrasaun Estadu katak presiza hare ba nia knar lolos. Laos buat hotu Advisor International sira hakerek mak tenki lori ba Conselho Ministru hodi diskuti.

Ita bele hare katak se los mak iha responsabilidade atu fo sai buat nebe akontese iha Conselho Ministru mak Secretario do Estadu Conselho Ministru Sr. Agio Perreira tanba nia nudar Porta Voz Guvernu. Maibe ita bele hare deklarasaun Vice PM hatudu momos ba ita hotu katak Vice PM hakarak sai hanesan membru ida nebe diak liu duke Ministru sira seluk.

Guvernu sempre iha Porta Voz, no Porta Voz ba Conselho Ministru mak iha kompetensia atu fo sai rezultadu enkontru iha Conselho Ministru ba publiku. Maibe, ohin loron hafoin enkontru hotu Vice PM direitamente publika ka fo sai ba media konaba enkontru nebe mak Vice PM aprezenta sobre PEKK ba Conselho Ministru katak iha Ministru balun nebe kontra PEKK. LABEH konsidera hahalok hanesan nee viola rejimentu Conselho Ministru nian no bele fo impaktu ba espresaun membrus Conselho Ministru tanba buat hirak ne’ebe koalia iha  Conselho Ministru sai fali hanesan konsumsi publiku, ne’e bele limita Ministru ka Secretario Estadu sira nia kontribuisaun iha Conselho Ministru rasik.

Tanba nee, ho respeitu LABEH husu ba Vice PM Koordenador assuntu Jestaun Administrasaun Estadu Eng. Mario Viegas Carrascalão atu ho responsabilidade no honestidade halao knar tuir buat nebe hakerek ona, labele tau kahur knar sira nee. Husu mos atu hamenus deklarasaun politika nebe mak ladun fo valor ba servisu Vice PM Koordenador assuntu Jestaun Administrasaun Estadu nian rasik.

LABEH mos hakarak husu Vice PM nia Conhecimento Konaba Autonomous Agencies. Tamba tuir LABEH hare katak iha servisu barak nee’be Vice PM bele hare no halo duke gasta tempu iha deklarasaun konaba korupsaun deit. Governo Anterior estabelece ona Agencias Autonomas & PUBLICS ENTITIES OU EMPRESA PUBLICA hahu iha tinan 2003, maka hanesan, SAMES, RTTL, APORTIL, ANATL, EDTL, IGE, ARCOM e Seluk tan, maibe ate agora sedauk iha Politika diak husi Governo atu dudu ou Desemvolve Instituisaun hirak nee Nudar, AGENCIA AUTONOMA, nebe maka termina iha Lei katak sira iha autonomia, Administratif, Autonomia Financeiro e Autonomia Patrimonial.

Governo seidauk Koncedera Agencias Hirak nee, Iha Autonomia iha Implementasaun, e Agencia Hirak nee halao nian Funsaun hanesan Diresaun Nacional ou Departamento durante ne’e, tamba:
a) Governo seidauk Iha Politika Konkrit ba future Agencias Autonomas,
b) Seidauk Iha Separasaun Institusional Konkrit Husi Diresaun Nacional ho Agencia Autonomas,
c) Influencia makas Husi Birocracia ba Agencias Autonomas,
d) Seidauk Iha regulamento Interna atu Regula aktividades Agencias Autonomas.
Relaciona ho buat hirak nee, Oinsa Vice PM, assuntos Administrasaun nian Politica:
-            ba Futuru Agencias Autonomas ?
-            Autonomia to iha nebe ?
-           Autonomia iha regulamento, maibe Implementasaun seidauk Iha nee Oinsa
             politika ba ida nee ?
-           Sedauk Iha separasaun Konkreta Husi Ministerio da Tutela ?
-          Oinsa Governo nian Kontrola konaba Receitas tinan-tinan tamba Governo halo
Subsidiu ?
-          Oinsa Governo Hare Kona Performance ?
-          Oinsa Governo nian Sistema halo Fiscalizasaun ba Receitas Agencias Autonomas
iha Futuru ?
 Tuir Los Governo Desemvolve Ona Agencias Autonomas e EMPRESA Publica, tamba Agencias Hirak nee, hanesan Alternative ba Receitas Timor Leste iha Futuru selain Minarai iha Tasi Timor.

Maibe, servisu ne’e iha Vice PM, Assuntos Administrasaun nian ka ? ou iha ema seluk, e durante nee nian la konhece Agencias Autonomas maka ida nebe?Ate agora mos Governo seidauk iha sistema kontrola ida diak ba receitas husi Agencias Autonomas hanesan, EDTL, RTTL, APORTIL, ANATL, IGE tasitolu) etc, tamba laiha Kontrola entao receitas barak maka suli sai- e Oinsa Vice PM nian Kontrola iha Futuru ???

Hahu iha 2004 to 2005 UN halo (Handover Assets) ba Governu, asset sira ne’e sei uza ka lae, nia jestaun no administrasaun oinsa? Infraestrutura telecomunicasaun iha territory TL ba Governu, TT mak uza e TT laiha kontractu, spesifika konaba ida ne’e ho nia jestaun no administrasaun oinsa? Vice PM, Assuntos Administrasaun bele hare assuntu sira hanesan ne’e kalae?

LABEH mos hakfodak wainhira le’e iha Timor Post loron Kinta, 25 Fevereiru 2010 iha Pagina 9 Opiniaun, Manuel Pinto, Media Offier, Vice Primeiru Ministru ba assuntu Administrativa, Eng. Mario Viegas Carasscalão, hatenten “Refere ba hanoin husi LABEH katak Vice PM Carrascalao koalia nune’e la ajuda programa governo iha prosesu KAK, hau lakohi repete dala ida tan iha ne’e, tamba iha intraktivo TVTL Vice PM dehan tiha ona ba Dr. Cristopher, (Director LABEH) katak politika kria KAK mai husi inisiativa Vice PM Carrrascalao mos, e LABEH nia contribuisaun mak halao konsulta publiko”.

LABEH hakarak hateten deit katak, LABEH lansa premeiru konsultasaun nasional ba politika governu atu hari’i Komisaun Anti-Korupsaun (KAK) iha loron Segunda 14 Jullu 2008. Iha intervensaun Eng. Mario Viegas Carrascalão nudar membro Parlamentu Nasional tempu neba, hataten katak nia la konkoda ho naran “Komisaun Anti-Korupsaun, labele tau “komisaun” iha neba, maibe tau maka Alto komisariadu”. hare Journal Timor Post Tersa, 22 Julhu 2009. Eng. Mario Viegas Carrascalão hateten katak nia parte mos apresia ba planu governu nian nebe iha hanoin atu kria komisaun anti-korupsaun”.

Ohin loron politika kria KAK mai fali husi inisiativa Vice PM Carrrascalao mos, e LABEH nia contribuisaun mak halao konsulta publiko?”.

Hare Journal STL Kuarta, 16 Jullu 2008) “Governu sei la harii órgaun ida ne’e, enkuantu seidauk halo konsulta ho sosiedade tomak – atu hatene sira nia hanoin ne’ebé di’ak liu kona-ba oinsá bele avansa ba oin. Ami sei servisu hamutuk ho sosiedade siviil kona-ba formasaun Komisaun ida ne’e . Ne’ebé ohin, ha’u bele anunsia katak Governu sei komesa períodu hala’o konsulta ho sosiedade siviil no partes interesadas kona-ba dalan dia’k liu bá oin – relasiona ho estrutura, mandatu no poderes Komisaun Anti-Korrupsaun nian”.

LABEH, ONG NE’EBE LUTA KONTRA-KORUPSAUN, MAK SEI HALA’O KONSULTASAUN NASIONAL IDA NE’E NO SEI INFORMA BA GOVERNU, SOSIEDADE SIVIL SIRA NIA HANOIN, “Ministra Finansas Emilia Pires, liu husi nia diskursu wainhira partisipa iha seremonia konsulta nasional ho sosiedade sivil iha salaun Ministeriu Estrangeiro iha Pantai Kalapa, Segunda 14/07, hatete katak, governu fo knar ba NGO Lalenok ba Ema Hotu (LABEH) atu realiza konsulta nasional ho sosiedade sivil hodi rona sira nia hanoin kona ba proposta governu nian hodi harii komisaun kontra korupsaun”. (STL Kuarta, 16 Jullu 2008)

Ohin loron politika kria KAK mai fali husi inisiativa Vice PM Carrrascalao mos, e LABEH nia contribuisaun mak halao konsulta publiko?”.

Primeiru Ministru Xanana Gusmão iha nia diskursu loron (18-12-2007) hatete katak primeira vez mak foin ita iha Governu ida ke iha komitmentu oin sa atu bele reduz risku korupsaun iha ita nia rain. Atu hametin komitmentu ida ne’e Governu Aliansa Maioria Parlamentar (AMP) sei kria Komisaun Anti Korupsaun (KAK) ida nebe sei halo estratéjika nasional hodi hatudu  mekanizmu diak liu oin sa luta hasoru korupsaun.

Ohin loron politika kria KAK mai fali husi inisiativa Vice PM Carrrascalao mos, e LABEH nia contribuisaun mak halao konsulta publiko?”.

Iha loron (11-04-2008) Primeiru Ministru Xanana Gusmão hatete katak Governu ida ne’e empenhadu ona atu hamenus risku korupsaun iha ita nia rai no atu reforsa esforsu hirak ne’e sei kria Komisaun Anti Korupsaun (KAK) nebe iha forsa no poder bo’ot tebes hodi kombate korupsaun.

Ohin loron politika kria KAK mai fali husi inisiativa Vice PM Carrrascalao mos, e LABEH nia contribuisaun mak halao konsulta publiko?”.

Iha loron (08-05-2008) Primeiru Ministru mos hatete katak sei reforma administrativa nebe sei servisu hamutuk ho Sosiedade Sivil hodi halo konsultasaun oin sa bele kria Komisaun Anti Korupsaun (KAK).

Ohin loron politika kria KAK mai fali husi inisiativa Vice PM Carrrascalao mos, e LABEH nia contribuisaun mak halao konsulta publiko?”.

Presiza tebes povu tomak bele hare no ida-idak uza nia kapasidade intelektual hodi halo analiza tuir ida-idak nia kapasidade konaba inisiativa hari’I KAK mai duni hosi Vice PM Koordenador assuntu Jestaun Administrasaun Estadu ka????? Ka deklarasaun Vice PM Koordenador assuntu Jestaun Administrasaun Estadu hato’o ba publiku tanba iha intensaun no benefisu ruma ba nia an karik deklarasaun sira ne’e balun presiza tebes atu ema fo hanoin.

“MAI ITA HARE DECLARASAUN BALUN HOSI ITA NIA VICE PRIMEIRU MINISTRU II, ENG. MARIO VIEGAS CARASSCALÃO KONABA KORUPSAUN HO KAK DURANTE TINAN IDA 05/03/2009-05/03/2010”

Wainhira simu posse  nudar Vise Primeiru Ministru  ba assuntu Administrativu iha loron Kinta (05/03) , Eng. Mario Viegas Carrascalão hala’o kedas vizita ba dala uluk iha  Ministeriu Edukasaun  loron (17/03) nebe publika iha Jornal Timor Post hodi hare prosesu  investigasaun  kazu alegasaun  korupsaun no mal  administrasaun nebe Inspektor Geral halo hafoin hetan orden husi Primeiru Ministru Xanana Gusmão.

Povo sei hein to’o agora resultado konkrita hosi visita ida ne. (Halo ka la halo?)
 
Iha  loron (31/03) Jornal STL publika Vise Primeiru Ministru hala’o vizita ba Sekretariu Estadu Defesa (SED) hodi  promete atu kria Inspektor para  bele rezolve problema sira direitamente iha laran. Iha Jornal Timor Post (31/04) fo sai  Vise Primeiru Ministru halo enkontru ofisial ho  Ministru Saúde Dr.Nelson Martins,Vise Ministra Saúde Dra. Madalena Hanjam  ho Diretores sira hodi esplika nia mandatu. Nia mos promete atu hadia  Inspesaun Geral iha Ministeriu Saúde  kada tinan ida dala ida  tuir planu no programa nebe mensiona.

Povo sei hein to’o agora resultado konkrita hosi visita iha ministerio rua ne’e to ohin loron. (Halo ka la halo?)

Iha  loron (20/04)  Timor Post  informa katak Vise Primeiru Ministru  hahu esforsu an atu loke fali kazu OB –VAN no fo atensaun maka’as ba servisu aprovizionamentu nebe halo tenderizasaun la ho transparensia. Publikasaun Jornal Diariu Nasional (20/04) hatete, Iha  Maiu  nia laran Vise Primeiru Ministru sei hahu halo inspeksaun rutina ba Ministeriu hotu-hotu. Iha loron (27/04)  Jornal Timor Post  fo sai katak inspeksaun rutina nebe Vise Primeiru Ministru halo, Inspektor Geral indika korupsaun barak liu  iha Ministeriu Finansas no nia sei kontinua nafatin halo inspeksaun rutina.

Povo sei hein to agora kazu OB-VAN no inspeksaun rutina ba Ministeriu hotu-hotu. (Halo ka la halo?)

Iha   (29/04), liu husi Jornal Diariu Nasional publika kona ba memo ( memo haruka dala rua ona ba Ministerio Infrastrutura ho Justisa maibe to’o agora seidauk iha klarifikasaun) liu husi memo ne’e Vise Primeiru Ministru husu  atu Ministeriu rua ne’e atu  hare kona ba rai ho uma estadu nian nebe abandona hela no  ema aluga hodi   selu ba se? no se karik estadu simu osan hirak ne’e  hatama iha nebe? Maibe to’o oras ne’e Ministeriu rua refere  seidauk responde memo  Vise Primeiru Ministru  haruka ba. Nia mos aprezenta dokumentus sira  atu kria komisaun adhoc hodi  halo investigasaun ba uma Estadu  nian hanesan obras publikus iha Tasi Tolu maibe  to’o agora seidauk  iha asaun ruma. Kestaun ne’e wainhira Media Monitoring Lalenok Ba Ema Hotu (LABEH) husu ba Vise Primeiru Ministru, nia rasik responde katak nia konsidera Ministeiru rua refere servisu hanesan kadiuk nebe  lao ba mai tanba ne’e mak demora uituan. 

Povo sei hein to’o agora resultado konkrita hosi memo rua ne’ebe Vise Primeiru Ministru husu Ministerio Infrastrutura ho Justisa kona ba rai ho uma estadu nian, povo hein mos konaba kria komisaun adhoc hodi halo investigasaun ba uma Estadu (Halo ka la halo?)

Iha (29/04) , liu husi Jornal Diariu Nasional publika  katak  Vise Primeiru Ministru  konsege  hapara tenderizasaun ba prosesu sosa handtraktor no traktor bo’ot ba Ministeriu Agrikultura no Peskas ho orsamentu  US$ 14  miloens tanba nia simu keisa  husi imprezariu balun  katak prosesu seidauk hahu mas ema atu manan iha tiha ona. Publikasaun Jornal Tempu Semanal iha loron (11/05) hatete, Vise Primeiru Ministru  promete atu kria Instituisaun independenti ida  hodi  taka odamatan korupsaun iha Ministeriu Finansas, Diresaun Aprovizionamentu.

Povo sei hein to’o agora resultutado konkrita hosi hapara tenderizasaun ba prosesu sosa handtraktor no traktor bo’ot ba Ministeriu Agrikultura no Peskas ho orsamentu US$ 14 miloens no taka odamatan korupsaun iha Ministeriu Finansas, Diresaun Aprovizionamentu. (Halo ka la halo?)

Iha loron (21/05) liu husi Jornal Timor Post  haklaken katak Vise Primeiru Ministru  simu keisa husi Ministeriu Turizmu Comersiu Industria (MTCI)  kona ba fos balun nebe haruka ba Distritu Baucau, Viqueque no Lospalos lakon deit iha dalan, nia parte haruka inspeksaun balun ba iha Distritu hodi hare.

Povo sei hein to’o agora resultado konkrita kona ba fos balun nebe haruka ba Distritu Baucau, Viqueque no Lospalos lakon deit iha dalan, hetan ona ka seidauk (Halo ka la halo?)

Jornal Timor Post iha loron (23/05/) publika, Carrascalão tun ba Sub Distritu Metinaro halo diálogu ho populasaun sira hahu husi Sesta 22-Sabadu 23 hodi esplika nia kna’ar ba povu ki’ik sira, rona difikuldade povu agrikultura sira nian nebe kestiona kona ba programa Ministeriu Agrikultura fahe traktor ba maluk partidu deit. Iha momentu neba Vise Primeiru Ministru  promete atu koalia ho Ministeriu Agrikultura e Peskas (MAP) para bele lori traktor bo’ot  ida ba iha neba maibe wainhira Media Monitoring Lalenok Ba Ema Hotu (LABEH) konfirma Vise Primeiru Ministru, deklara  katak nia hatete tiha ona ba Ministru Agrikultura, oras ne’e dadaun Ministeriu kompetente foin  mak atu halo tender foun fali hodi sosa traktor  tanba tender ida uluk nia rasik mak hapara tanba ne’e mak atraza duni.  

Povo sei hein to’o agora traktor bo’ot  atu haruka ba Sub Distritu Metinaro (Halo ka la halo?)

Iha Jornal  STL (27/05) publika  Vise Primeiru Ministru  husu Prokuradoria Geral da Republika (PGR) loke fali kazu OB-VAN Maibe to’o oras ne’e seidauk esplika klaru ba publiku.Iha nia vizita ba Ministeriu Publiku, Vise Primeiru  Ministru  promete atu servisu hamutuk ho PGR hodi reduz kazu pendenti  hodi  prosesu ba oin. Liu husi Jornal Timor Post (28/05/) Vise Primeiru Ministru deklara katak bazeia ba relatoriu Inspeksaun Geral nebe mak nia  halo kada Ministeriu hatudu faktus funsionariu publiku iha Timor Leste kuaze  50% mak involve iha kazu korupsaun. Carrascalão promete sei halo kontrolu maka’as ba projetu  fiziku estadu nian  tanba funsionariu balun sosa buat ruma ho folin oin seluk maibe haruka halo nota aumenta osan nebe bo’ot.

Dala ida tan Povo sei hein to agora kazu OB-VAN no reduz kazu pendenti iha PGR (Halo ka la halo? la halo)

Iha sorumutu ho komunidade, Sub Distritu Ataúro, Vise Primeiru Ministru informa kona ba kazu korupsaun, nia deklara hafoin simu tomada de posse nudar Vise Primeiru Ministru assuntu administrativu, konsege hatama ona kazu  ida  ba iha Prokurador Geral da Republika (PGR) atu investiga, kazu ne’e involve ema balun iha Governu laran.

Povo Sub Distritu Ataúro, sei hein to’o agora resultado konkrita hosi kazu korupsaun ida  ne’ebe Vise Primeiru Ministru haruka ba iha Prokurador Geral da Republika (PGR) (Halo ka la halo? la Halo)

Iha Jornal Dili Weekly  (04/06/) fo sai  Vise Primeiru Ministru halo  seminariu ho estudantes fakuldade Faspol  UNTL hodi deklara katak  wainhira ema Estranjeiru tama iha Timor tenki troka  osan USD ba osan Sentavos Timor nian  iha Banku Sentral  atu evita ema sira nebe halo korupsaun no tenki  hola medidas. Vise Primeiru Ministru promete  hanoin ne’e tenki halo, atu hetan rezistensia husi banku mundial rasik no mos sei konkorda ho Ministeriu Finansas.

Estudantes fakuldade Faspol UNTL sei hein to’o agora resultado konkrita hosi Estranjeiru tama iha Timor tenki troka osan USD ba osan Sentavos. (Halo ka la halo? la Halo)

Iha Jornal STL(10/06), Vise Primeiru Ministru  iha nia  konviksaun hatete  iha 2009, korupsaun sei reduz to’o 5%, nia  sei esforsu atu sobu redi mak  koruptor  sira nebe to’o oras ne’e sei proteje malu iha redi ne’e nia laran. Vise Primeiru Ministru deklara liu husi  Jornal Nasional Diariu (10/06) katak  nia sei la halimar  ho koruptor sira  inklui polisia ho prokurador, hodi hatama ema sira nebe halo korupsaun ba dalan nebe los. Nia laiha intensaun  atu sai husi governu, bainhira Primeiru Ministru  Xanana Gusmão  ho Prezidenti Republika Ramos  Horta sei fiar nia,  tanba korupsaun laos at ba nia deit maibe at ba ita hotu  no bele hamoe ita nia nasaun Timor Leste.

Povo sei hein to’o agora resultado konkrita hosi korupsaun sei reduz to’o 5%, no atu sobu redi koruptor  sira uza hodi proteje malu iha redi ne’e. (Halo ka la halo? la Halo)

Iha loron (30/06) liu husi  Media Monitoring LABEH, Vise Primeiru Ministru informa katak durante nia sai Vise Primeiru Ministru ba assuntu administrativu, nia seidauk hetan susesu hotu iha nia servisu tanba nia rekuiñese servisu aumenta todan tan tanba buat balun la la’o  iha Ministeriu sira, Primeiru Ministru intrega tan kna’ar ida ba nia atu  kria Komisaun Interministerial kona ba dezenvolvimentu rural, akordu  investimentu, projetu fizika.Buat tolu nebe agora dadaun nia kaer, nia rekuiñese seidauk la’o diak  tanba nia Gabineti rasik seidauk to’o 50% ema nebe  nia presiza atu halo servisu e fatin nebe foin lalais  atu oferese  ba nia mos seidauk iha.

Nia konsidera nia servisu foin la’o fulan tolu no seidauk hetan susesu nebe diak so servisu nebe komesa la’o dadaun ona mak Inspeksaun Geral. Carrascalão haktuir katak durante assume kargu ne’e, nia konsege rekomenda ona kazu alegasaun korupsaun no mal administrasaun iha Ministeriu Edukasaun liu husi Inspeksaun Geral, kazu OB-VAN, kazu kona ba Garajen nebe halo  iha Komando F-FDTL Metinaro, kazu polisia nian  ba iha Ministeriu Publiku maibe to’o agora nia seidauk rona informasaun husi Ministeriu Publiku kona ba kazu sira refere haruka ona ba tribunal ka seidauk.

Povo sei hein to’o agora resultado konkrita kona ba kazu sira ne’e (Halo ka la halo? la Halo)

Iha loron  (14/07/09) Vise Primeiru Ministru   partisipa  Workshop  kona ba  papel Media nian luta kontra korupsaun hodi   informa  katak kazu korupsaun nebe tun ba  iha Inspeksaun Geral  liu 20. 

Media sira sei hein to’o agora resultado konkrita kona ba kazu 20 sira ne’e (Halo ka la halo? la Halo)

Vise Primeiru Ministru husu deskulpa ba komunidade Aba Suku Makadade (Ataúro) ba hahalok Governu nian nebe la tau atensaun ba kondisaun Estrada iha area neba rezulta  inan feton isin rua nebe mate tanba Hospital dok no kondisaun  estrada at tebes. Iha sorumutu ho komunidade,Vise Primeiru Ministru informa kona ba kazu korupsaun, nia deklara hafoin simu tomada de posse nudar Vise Primeiru Ministru assuntu administrativu, konsege hatama ona kazu  ida  ba iha Prokurador Geral da Republika (PGR) atu investiga, kazu ne’e involve ema balun iha Governu laran.

komunidade Aba Suku Makadade (Ataúro)  sei hein to’o agora resultado konkrita kona ba kazu  ida  iha Prokurador Geral da Republika (PGR) (Tinan I Halo ka la halo?la Halo)

Vise Primeiru Minisitru Carrascalão iha Kinta 25 to’o 27 Junhu hala’o visita ba Distritu Oecusse hodi hare kestaun importante mak assuntu fronteira ho ekonomia nebe afeita ba vida moris  povu Distritu neba.Iha oportunidade ne’e Vise Primeiru Ministru vizita  Hospital referal Oecusse,vizita Subdistritu Pantai Makasar  hare mos kondisaun Estrada iha Suku Sakato, Lifau, Naimeco, Passabe ho Suku Tumin Oesilo nebe a’at informasaun ne’e  publika husi jornal  Timor Post (30/06).Nia parte hatama ona relatoriu ba Primeiru Ministru atu foti desizaun ba kondisaun estrada no fronteira mak ema Estranjeiru hatama kareta ilegal mai Timor maibe dokumentu hetan asina iha Dili no mos ema hamutuk 900 iha Subdistritu Passabe  halo falsifikasaun dokumentus atu simu pensaun katuas.

Komunidade Oecusse sei hein to agora resultado konkrita kona ba kazu ema Estranjeiru hatama kareta ilegal mai Timor maibe dokumentu hetan asina iha Dili no mos ema hamutuk 900 iha Subdistritu Passabe halo falsifikasaun dokumentus atu simu pensaun katuas. (Halo ka la halo? la Halo)

Iha loron  (02/09/09) STL publika katak, Vise Primeiru Ministru simu  keixa  katak iha membru governu balun  lori osan ho kaixa sai ba liur  nebe deskonfia osan sira nee hetan husi dalan korupsaun nian atu lori ba tau iha Banku sira iha  rai liur.  VPM  mos sujere atu estadu TL bele iha ona moeda rasik atu nunee ema labele lori ba rai liur no mos bele ona evita korupsaun no evita inflasaun.

Povo sei hein to’o agora resultado konkrita kona ba membru governu balun lori osan ho kaixa sai ba liur nebe (Halo ka la halo? la Halo)

Iha loron (09/09/09), liu husi Timor Post,  VPM  lakohi publika  kazu korupsaun rua nebe involve ema importante iha Nasaun nee maski tuir nia kazu nee agora prosesa ona iha tribunal. Kazu refere nia entrega ona ba PGR no Komandante PNTL Longuinhos Monteiro  wainhira konvida sira nain rua mai iha nia Gabineti.

Povo sei hein to’o agora resultado konkrita kona ba kazu korupsaun rua nebe involve ema importante iha Nasaun nee (Halo ka la halo? la Halo)

Iha loron (06/10/09) Carrascalão  husu  ba Komisaun Fungsaun Publiku (KFP) atu  halo investigasaun ba iha Ministeriu Ekonomia Dezenvolvimentu  relasiona ho informasaun nebe hateten katak MED  hatama  deit membru PSD hodi servisu  iha ministeriu refere.

Povo sei hein to’o agora resultado konkrita kona ba investigasaun ba iha Ministeriu Ekonomia Dezenvolvimentu (Halo ka la halo? la Halo)

Iha loron (20/01/10) iha STL hatete katak, VPM hatun orden bazeia ba despaixu Primeiru Ministru Xanana Gusmão  nian  atu funsiona Inspetor Jeral   iha kada Ministeriu tanba hare ba situasaun atual ladiak  no laiha kondisaun atu  funsiona servisu Estadu nian. Nia apela ba Ministeriu sira hotu atu hili ema nebe iha kuiñesimentu no kapasidade individual hodi xefia  iha kada Ministeriu. 

Iha  loron Kuarta (10/02/10),Timor Post  publika katak,  Carrascalão aprezenta ona planu estratéjiku kombate korupsaun ba Konselhu Ministru ho objetivu atu kria  inspesaun iha Ministeriu hotu-hotu no halo mos kordenasuan entre orgaun sira nebe iha mandatu  atu luta kontra korupsaun hodi bele servisu hamutuk para bele hamos korupsaun iha Nasaun ida neé. Nia informa, semana oin sei hasai rezolusaun konaba planu estrtéjiku refere atu Konselhu Ministru aprova no nia espera sei taka dalan ba ema atu halo korupsaun.   

Povo sei hein to’o agora resultado konkrita kona ba atu funsiona Inspetor Jeral   iha kada Ministeriu (Halo ka la halo? la Halo)

Iha loron (10/02/10), STL haklaken katak, Carrascalão promete atu intrega kazu indikasaun  KKN Governu Aliansa Maioria Parlamentar nian ba Komisaun Anti Korupsaun atu investiga. Maske oras neé dadauk iha kazu indikasaun korupsaun kuaze 20 mak Inspektor Jeral hatoó ona ba Prokuradoria Jeral da Republika iha 2009 atu halo investigasaun.

Povo sei hein to’o agora resultado konkrita kona ba kazu indikasaun korupsaun kuaze 20 (Halo ka la halo? la Halo)

Iha loron (15/02/10) iha Jornal Diariu Nasional  Vise PM rekuiñese nia parte laiha duni kontrola ba implementasaun projeitu pakote referendum nebe iha fulan hirak liu ba imprejariu kiík sira hala’o iha Timor laran tomak tanba projeitu hala’o iha tempu badak mak, meius atu halo kontrolu no fiskalizasaun laiha tanba la konsege rekruta tekniku.

Iha loron (8/02/10) Carrascalão deklara liu husi Diariu Nasional katak, KAK sei failha  wainhira ninia planu estratéjiku  nebe tama ona iha konselhu Ministru ne’e susesu. Nia dehan PEKK mak sei hadia administrasaun tomak liu husi kriasaun ekipa kombate korupsaun iha ministeriu ida-idak, maka KAK araska ona hatama ema ba komarka.  

Iha loron (10/02/10) Diariu Nasional fo sai katak, Carrascalão simu keisa husi importadores nasional ho internasional konaba funsionariu servisu alfandega oras ne’e halimar husu  uang rokok ba iha importadores nasional ho internasional  bainhira hakarak lalais hatun sasan husi ro.Tanba  ne’e  Carrascalão husu  ba Ministeriu Finansas atu toma atensaun seriu ba kestaun ne’e iha tempu badak.
                                                                                                                               
Iha loron (25/02/10) iha Timor Post haktuir, Konselhu Ministru deside atu intrega Politika Estrtéjiku Kombate Korupsaun (PEKK) ba kada Ministeriu hodi implementa atu bele fo oportunidade ba ministeriu sira hare ninia uma laran rasik. Carrascalão promete PEKK sei hadia administrasaun governu nian nebe fraku tebes no nia garante nivel korupsaun iha TL sei kiík liu tan no bele lakon mos.

Iha loron (16/02/10) Diariu Nasional publika katak, Carrascalão rekuiñese Inspetor Jeral sei fraku tebes atu halo investigasaun ba servisu alfandega  nebe hatoman a’an husu uang rokok ba imprejariu sira wainhira hatun sasan husi ro iha Portu.Tanba ne’e nia propoin ba Konselhu Ministru atu reforsa kualidade no kuantidade Inspetor Jeral hodi bele hala’o kna’ar ho diak e nia mos  afirma presiza  reforma servisu alfandega tanba dinamiku tenki hadia duni frakeza no sala nebe mosu.Tanba ne’e nia husu ba Ministeriu Finansas atu kria sistema Free Balance nebe bolu asikuda ba iha Alfandega   para bele  hetan kontrolu ho diak.

Kuarta (13/01/10)TP, Vise Primeiru Ministru rekuiñese problema  bo’ot iha rai laran mak halo foer imjem TL  iha mundu internasional mak korupsaun. Tanba ne’e nia sei halo esforsu ensinu nasional e prioridade nasional  atu halakon korupsaun hodi hatudu imajem ida ke diak iha mundu internasional. No Governu tenki iha intendementu ida hodi kontrola funsionariu sira nebe loke Face Book  iha loron servisu nian.

Sesta (12/02/10)TP,Vise Primeiru Ministru  deklara, politika estratéjika kombate korupsaun  ne’e obriga kada ministeriu atu tenki partisipa no tenki iha programa anti korupsaun atu nune’e wainhira hare katak iha risku atu akontese korupsaun tenki trava kedan. Maibe planu ne’e halo Ministru balun kontra no balun deit mak apoiu.

Kuarta (17/02/10) TP, Vise Primeiru Ministru deklara, Komisaun Anti Korupasaun nebe mak kria tiha ona, sei faila se nia servisu iha susesu. Signifika wainhira ninia servisu ba prevensaun korupsaun ne’e susesu, KAK sei la konsege atu kaer ema hodi hatama ba kadeia.

Sabadu (20/02/10) TP, Vise Primeiru Ministru   hatete, buat barak liu atu nia  bele  halo, labele sente inkomedadu; “ Hau kumprende deklarasaun LABEH ne’e tanba se korupsaun hamate ona ema balun laiha ona servisu karik.” 

Segunda (22/02/10) TP, Vise Primeiru Ministru  deklara, politika estratéjika kombate korupsaun sei obriga membru Governu sira no mos funsionariu publiku nebe mak kaer osan (tijoreiru) atu tenki deklara mos sira nia riku soi  nebe sei halo dala 3, primeiru sei deklara wainhira  hahu servisu, iha ninia mandatu nia klaran no hafoin remata ninia mandatu.

Kinta (25/02/10) TP, Vise Primeiru Ministru hatete, wainhira politika estratéjika kombate korupsaun implementa mak  kada tinan Ministeriu  sira tenki hato’o  relatoriu atividade ba Konselhu Ministru no aprezenta mos planu asaun  nebe mak sei implementa iha tinan ida tuir mai. No politika  estratéjika kombate korupsaun  hanesan asaun prevensaun ida laos asaun kombate korupsaun e planu ne’e kria atu hadia administrasun Governu nian .

Tersa (02/03/10) JND, Vise Primeiru Ministru afirma, laos funsionariu publiku deit mak sei hetan kastigu wainhira halo korupsaun, maibe imprejariu sira mos halimar bebeik ho povu ki’ik nia moris ho manipula sasan folin maka sei kaer hotu no hatama ba kadeia. 

Hare ba declarasaun sira ne’e, Lalenok  Ba  Ema  Hotu  (LABEH)  hare katak   esperiensia  Vice  Primeiru Ministru nian iha tinan 10 nudar Governador  Timur-Timur la dun aplika iha Nasaun independente foun ne’e tanba wainhira Primeiru Ministru foti nia sai Vice Primeiru Ministru  ba  assuntu  Administrativa, nia  rasik deklara ona katak nia sei halo buat hotu-hotu hodi luta hasoru korupsaun no nia sei la tauk koruptor sira. Maibe ita hare katak durante  primeiru Governu  Konstitusional  to’o quatru  Governu  Konstitusional,  Eng. Mario Viegas Carrascalão la hola parte iha  administrasaun  Governu  nian hodi hatete katak  seidauk rekuiñese mudansa barak nebe akontese tiha ona iha administrasaun Nasaun Timor Leste nian.

Tanba Vice Primeiru Ministru Eng. Mario Viegas Carrascalão hare katak tempu  okupasaun Indonezia la hanesan ho tempu ukun rasik an  no dala barak mak nia deklara katak nia hetan  rejistensia barak no ita mos hare  tanba iha ona mudansa  signifikante  tempu ukun rasik an nebe iha ona mudansa mentalidade iha demokrasia nia laran, mudansa iha administrativa Estadu nian, mudansa iha Finansas ho buat barak nebe akontese tiha ona  durante ukun rasik an.

LABEH mos hare katak reforma nebe halo tiha ona husi Governu no servisu nebe halo tiha ona husi  Eng. Mario Viegas Carrascalão ne’e ejiste deit iha kertas ka livru  maibe seidauk  iha transformasaun reforma ida nebe adekuadu no diak ba funsionariu Governu, Direktor sira liu-liu sira nebe kaer osan Estadu  nian  hodi halo implementasaun de servisu.

LABEH hare katak  Eng.Mario Viegas Carrascalão fokus  liu ninia servisu iha simu keisa kona ba korupsaun, no halo declarasaun no simu keisa kona ba projetu nebe mak iha  maibe seidauk halo mudansa administrativa  nebe importante liu  tanba  presija sistema ida nebe la bele fo dalan  ba koruptor sira atu halo korupsaun no presiza sistema ida hodi tau iha Ministeriu hotu-hotu  para bele monitoriza programa Governu nian la’o iha Distritu hotu no Governu nia laran. Sistema sira ne’e mak importante tebes atu monta maibe durante ne’e LABEH ladun hare sistema klaru nebe Vice Primeiru Ministru  Eng. Mario Viegas Carrascalão hatama tiha ona iha Governu nia laran.

Maibe ita hare  Vice PM simu deit keisa kona ba kazu nebe koalia barak kona ba assuntu korupsaun no assuntu seluk mas la koalia kona ba sistema saida mak nia monta tiha ona hodi  bele prevene ema labele naok osan Estadu nian. Tanba ne’e LABEH husu nafatin ba Vice Primeiru Ministru  Eng. Mario Viegas Carrascalão atu tau rekomendasaun sira ne’e hanesan rekomendasaun  ida ke  presiza komprende momos katak mudansa sira ne’e tenki rekuiñese no la’o  tuir.

LABEH konsidera pozisaun Eng.Mario Viegas Carrascalão nian bele sai dezafiu bo’ot tanba ladun implementa lolos nia kna’ar. LABEH hare katak nudar Vice Primeiru Ministru ba assuntu Administrativa tenki monta sistema Administativa ida nebe efisiente, mos, bele  ajuda ba prosesu sira nebe bele halakon karakter korupsaun. LABEH hare sistema ida ne’e la ejiste no  Eng. Mario Viegas Carrascalão kontinua nafatin lakon tempu  barak liu iha simu keisa no koalia ba publika kona ba keisa barak nebe nia simu.

LABEH hare katak PDHJ mak implementa uluk ona “Case Box” kaixa keixas nebe povu bele hatama sira nia keixas no Vice PM mos halo hanesan maibe to’o agaora ita seidauk hatene keixas HIRA mak Vice PM simu hosi kaixa ida ne’e. Iha mos monitorizasaun balun nebe hatudu katak sei karik sistema prevensaun “Case Box” kaixa keixas nebe mak Vice PM uza lao ho diak tidak mungkin KKN aumenta buras hanesan issu sira nebe mak ohin loron ita rona. Maibe LABEH kontinua enkoraja nafatin Senhor Vice PM atu implementa sistema sira nebe kria tiha ona liu-liu sistema prevensaun sei karik sistema nee mak susesu signifika hakman oituan ona todan husi KAK.

LABEH hare katak iha tinan ida Eng. Mario Viegas Carrascalão halo ona buat balu nebe diak maibe seidauk outrapassa ema nia hanoin katak nia sei bele outrapassa desafiu sira ne’e  hodi luta hasoru korupsaun. LABEH hare Eng. Mario Viegas Carrascalão halo nia kna’ar hanesan loron ida nebe susar tebes ba nia maibe LABEH fiar  katak wainhira outrapassa desafiu sira ne’e ho integridade, sei iha naroman no sei hetan duni objetivu katak Timor Leste labele sai hanesan LALEHAN ba koruptor sira.

LABEH ejiji nafatin ba Eng.Mario Viegas Carrascalão atu kontinua buka meius  hodi  implementa sistema sira nebe la bele fo dalan ba  koruptor sira. Tanba ne’e LABEH rekomenda ba Vice Primeiru Eng.Mario Viegas Carrascalão presija hare kona ba sistema nebe atu  monta iha  Governu laran para  la bele fo oportunidade ba ema atu halo korupsaun doque  simu keisa deit.

LABEH kontinua fo suporta nafatin ba atividade Eng. Mario Viegas Carrascalão no LABEH hare katak  ho tinan ida ne’e hanesan desafiu  bo’ot ba nia maibe nia  konsege duni  lori kazu balun ba iha Inspektor Geral ho Ministeriu Publiku e ita hein loron ida kazu sira ne’e bele hetan julgamentu no ita kontinua fo liman ba malu hodi halo kolaborasaun maka’as ho Eng. Mario Viegas Carrascalão atu bele luta hasoru korupsaun .

Vice Primeiru Ministru Eng. Mario Viegas Carrascalão  deklara ba publiku katak nia hetan duni rejistensia iha nia partidu rasik  tanba nia husu dokumentus kona ba rai  no proprioridade estadu nian husi Ministeriu Justisa, to’o ohin  loron Ministeriu Justisa nunka fo resposta atu hatudu dokumentus nebe nia husu. Tamba ne’e karik la konsege hamos uma laran tanba to’o ohin loron seidauk iha informasaun klaru kona ba saida mak hetan husi Ministra  Justisa, saida mak hetan husi Ministru Negosiu Estranjeiru, saida mak hetan ona husi Ministru Ekonomia tanba sira ne’e  mai husi uma laran mak  Partidu Sosial Demokratika (PSD).

Komisaun Anti Korupsaun (KAK) hamrik ona no komisaun ne’e mak iha poder atu luta hasoru korupsaun Iha timor laran tomak. Nunee bele hadia povu nia moris ho kombate korupsaun ho kiak. Dala ida tan (Action Speaks Better than Words).