ESTADU TL FALHA INFORMA BA PUBLIKU KONABA OINSA EZEKUSAUN ORSAMENTU

ESTADU TL FALHA INFORMA BA PUBLIKU KONABA OINSA EZEKUSAUN ORSAMENTU

 

Relatorio Independente Global hateten oinsa TL bele promove Transparensia lalais sem iha obstaklu barak


Dili, Timor-Leste November 23, 2010 –International Budget Partnership (IBP) ohin fo sai Open Budget Survey 2010 nebe independente, komparativu husi evaluasaun regular konaba Transparensia no akuntabilidade iha mundo tomak.

Produs kada tinan rua husi espertu independente sira nebe mak laiha Governu nia okos. Relatorio hatudu katak Timor Leste monu iha skor 34 husi total skor 100. Laiha Transparensia no Akuntabiladade iha orsamentu, loke dalan ba abusu de poder no inapropriedade, no inefisiense iha uza fundu publiku nian.

“ Ami ezije ba Governu Timor-Leste atu foti lalais medidas/dalan nebe adekuadu atu nunee informasaun no prosesu konaba orsamentu bele sai nakloke liu tan,” hateten Dr. Christopher Henry Samson Direktur Ezekutivu LABEH nebe mak involve ou servisu mos iha relatorio ida nee.
 
Iha loron 19 Outubro 2010 iha Washington USA, IBP (International Budget Partnership) halo ona lansamentu ba Internasional Open Budget Survey Index 2010 ba nasaun 94 inklui Timor-Leste no lansamentu hanesan mos hala’o ona iha nivel rejional (ASEAN) iha loron 11 Novembru 2010 iha Cambodia. Survey ida nee hatudu katak informasaun husi Estadu TL rasik ba publiku konaba dokumentus orsamentu menus/minimu liu. Husi nasaun 94 nee, TL monu iha nivel /skor 34 signifika katak TL iha nasaun Indonesia, Malaysia, Filipina no Thailand nia okos. Tuir Timor Leste nasaun Cambodia no Vietnam mak hetan skor kiik liu.

Alende IBP nebe halo lansamentu ba Open Budget Survey Index 2010, Transparency Internasional (TI) iha loron 26 Outubro 2010 iha Berlin mos lansa ona relatorio konaba Corruption Perception Index (CPI) ho survey ba nasaun 178 no hanesan ho tinan liu ba TL nafatin iha pozisaun nudar nasaun nebe iha risku korupsaun nia laran.

LABEH nudar ONG Anti Korupsaun nebe hola parte mos iha survey budget Index 2010 no mos ONG nebe sai nudar Reprezentante TI iha TL hetan ona autorizasaun atu publika rezultadu husi relatorio rua(2) nebe temi iha leten. Publikasaun nee ho objetivu atu hatudu ba Parlamentu Nasional no Governu hodi hare komunidade internasional nia hare kona ba ezekusaun orsamentu no korupsaun nebe mak la’o iha TL.