PROJETU PILOTU HUSI MSS IHA SUB-DISRITU ATAURO HAKIAK EMPREZARIU MALANDRU

PROJETU PILOTU HUSI MSS IHA SUB-DISRITU ATAURO HAKIAK EMPREZARIU MALANDRU

Tama fulan 10 ona, projetu pilotu husi MSS hodi ajuda vuneravel sira hetan uma simples la finaliza. Realidade nee akontese iha sub distritu Atauro Suku Biqueli. Liu husi programa monitorizasaun LABEH One District One Village (05/07/10) nebe mos involve jornalista sira,

 identifika iha suku refere katak husi uma ho total 18, iha uma 8 mak remata ona falta uma 10 mak seidauk remata iha subdistritu Atauro. Atu hare direitamente kondisaun uma nebe seidauk remata, LABEH hakat ba Suku Biqueli nebe mak tuir informasaun katak iha suku refere iha uma haat nebe mak too agora seidauk finaliza. Triste tebes wainhira ekipa LABEH too iha fatin refere. Halo ita tanis tanba uma simples nebe mak tuir kontratu sei finaliza iha fulan tolu nia laran la akontese. Aat liu tan wainhira ekipa LABEH hakat ba vizita benefisiariu husi uma nee, halo ita triste tebes.

Avo feto ho naran kompletu Madalena Perreira ho idade 99 nebe mak tuir lolos goza ona uma nebe mak merese nia hetan too agora terus hela iha nia toba fatin hodi hein uma nee. Haktuir avo feto ho lian neneik tebes ba ekipa LABEH katak fulan 10 ona nia hein uma nebe oferese husi Governu ba nia maibe too agora nia la sente benefisiu husi uma ida nee. “ Fofoun hau rona Governu atu ajuda hau, Hau sente kontente tebes tanba Governu iha hanoin diak atu ajuda ami ferik katuas sira. Tanba nee hau intrega hau nia rai no uma nebe hau hela ba sobu tiha atu nunee bele harii fali uma foun iha fulan tolu nia laran maibe realidade, ita boot sira mak hare deit ba, uma nee hau hein tama fulan sanulu ona mos nia fundasaun deit seidauk remata. Hau la hatene hau sei bele goza uma nee ka lae? ”. Haktuir Avo Madalena ho matan ween nakonu.

 Alende uma husi Avo Madalena, Ekipa LABEH mos hakat ba monitoring uma tolu nebe mak seidauk remata. Triste tebes uma tolu nee mos nia kondisaun hanesan ho uma Avo Madalena nian. Aat liu tan laos kondisaun uma vuneravel nee mak halo ita triste maibe kondisaun husi Benefisiariu nain tolu nee mos halo ita laran moras teb-tebes. Benefisiariu Avo feto nain rua ida no naran Terezinha Ximenes (75) ho ida seluk ho naran Raquel (73) inklui mos benefisiariu Avo mane ho naran Mateus Doutel (55) nebe ho kondisaun fiziku aleizadu liu husi nia alin feto haktuir katak wainhira nia maun rona atu hetan uma husi Governu nia sente kontente teb-tebes. Maibe triste tebes tanba wainhira uma nee seidauk remata, nia maun fila tiha ona ba Aman maromak nia uma nein atu goza loron ida deit iha uma refere. Husi realidade nebe mak LABEH hare, halo ita hanoin la too.

Governu iha hanoin diak atu oferese uma ba vuneravel sira maibe tanba sa mak iha implementasaun la akontese nunee? Nudar humanu, ema nebe mak manan projetu ka Kompanha SUNRISE iha fuan ka lae? Iha responsabilidade ka lae?. Kontratu halo projetu nee iha fim de Agustu 2009 ka ho durasaun fulan tolu. Karik Kompanha iha razaun tanba iha difikuldade oi-oin, Governu prolonga tan ona tempu fulan tolu ba kompanha SUNRISE atu finaliza konstrusaun uma piku nee maibe tanba sa mak tempu prolonga ona, projetu nee seidauk remata nafatin? Aat liu tan, projetu nee seidauk remata, maibe Kompanha refere manan tan projetu konstrusaun ba edifisiu estasaun Polisia sub distritu Atauro nian.

Hatudu mai ita katak Kompanha malandru nee halo projetu ida seidauk hotu matan katar fali ona ba projetu seluk nebe ho montante osan boot liu. Nee Hatudu mai ita katak, laiha responsabilidade. Hakarak manan osan deit maibe halo projetu laiha kualidade. Agora nia focus ba projetu rua tanba nee halo kompanha refere bili bala la finaliza projetu uluk nian. Osan mak lanu tiha ona Kompanha SUNRISE. Osan mos hamout ona nia rasa kemanusiaan no osan mos tolan ona nia fuan. Laos deit parte kompanha, maibe ita mos kestiona Governu. Governu iha kontrola ka lae? Iha koordenasaun interministerial ka lae? Tanba sa mak kompanha nebe iha on going project hela maibe Governu fo tan projetu seluk ba kompanha matan osan nee!!! Bele manan tan projetu seluk maibe tenki hanoin katak iha benifisiariu balun hein hela projetu nee. Tanba nee parte kompanha tenki sente katak nia bele ka lae kaer tan projetu foun. Se la bele entaun labele buka tan projetu foun nee. Jangan bahagia di atas penderitaan orang lain dong!!! Dimanakah sisi kemanusiaan anda??? LABEH mos husu atu Governu liu-liu parte nebe mak kompetente tenki urjente buka lalais solusaun ba problema nee iha tempo badak. Governu mos tenki foti desizaun nebe mak klaru no maka’as labele plingplang. Labele kontinua hakiak emprezariu nebe malandru nebe mak bele hamonu emprezariu sira seluk no Governu ida nee nia dignidade. LABEH hamutuk ho povu kiik sadik Governu, berani ka lae fo Blacklist ba Kompanha Malandru sira hanesan Kompanha SUNRISE nebe inresponsabilidade. Karik, desizaun nee mak Governu la foti, ita fiar katak iha duni LAHO AMAN iha Governu nia laran nebe Hamaus malun ho Kompanha tanba masing-masing pihak hetan benifisiu husi projetu ida nee.