Budget Monitoring
Transparency, Accountability, Integrity, Good-governance, Courage, Justice and Democracy.
Education, Training and Capacity Development
Who Are We
Advocacy and Monitoring
Estudantes LABEH-VS HALO ACTIVIDADE IHA LABEH

Monitorizasaun Loron 100 Mario Carasscalao nudar Vice PM ba Assuntu Administrativa

LABEH hakarak hatete katak loron 100 servisu Eng.Mario Viegas Carrascalão monu iha loron 03 fulan Julhu 2009 maibe LABEH hasai tiha loron Sabadu, Domingo ho loron Feriadu Nasional nebe la konsidera hanesan loron servisu nian hodi fo fatin ba monitorizasaun ida ne’e to’o duni loron 100 mak loron servisu nian.

Eng. Mario Viegas Carrascalão  hahu nia servisu nudar Vise Primeiru Ministru  iha loron 05 fulan Marsu 2009 no  iha loron 100 nebe monu iha loron 23 Fulan Julho 2009. LABEH akompanha programa sira nebe  Carrascalão  halo katak balun hetan susesu, balun lahetan susesu. Maibe ita hare katak Carrascalão uja komunikasaun publiku hodi koalia kona ba ninia servisu.

LABEH hare katak Eng. Mario Viegas Carrascalão  hala’o  funsaun ida nebe halo funsionaru barak ladun komprende tanba iha loron 100 Carrascalão koalia maka’as liu husi media sira hotu kona ba kazu sira nebe nia simu, medidas nebe nia halo tiha ona liu husi Inspektor Geral no Ministeriu Publiku.

Iha loron 100 Eng. Mario Viegas Carrascalão hetan duni terror politika husi membru Parlamentu balun no mos  membru Governu balun nebe la dun kontenti ho deklarasaun barak nebe nia (Carrascalão) halo.

Eng. Mario Viegas Carrascalão  hetan mos rejistensia bo’ot husi nia partidu PSD rasik  tanba dala barak ona nia koalia ba publiku katak nia husu dokumentus maibe nia membrus rasik nebe nia hili husi nia partidu PSD la rekuiñese no la respeitu hodi la fo informasaun klaru kona ba dokumetus sira nebe nia husu.

LABEH hare katak iha loron 100  la konsege lori kazu ida to’o iha tribunal  e  la konsege  lori  koruptor   ida to’o iha Hotel  Bekora  no iha loron 100 Carrascalão halo servisu, husi  nia Gabinete rasik nunka organiza seminariu ka workshop ida hodi koalia direitamente ba funsionariu publiku, ba membrus  Governu nian kona ba ninia ajenda ka prioridade programa oin sa bele hadia sistema Administrativa iha Governu laran hodi nune’e funsionariu sira bele komprende ninia kna’ar lolos tuir lei atu bele hala’o nia servisu.

Maibe  Eng. Mario Viegas Carrascalão iha loron 100 nunka halibur funsionariu sira iha Ministeriu hotu-hotu  hodi hato’o estratéjika Governu nian atu luta hasoru korupsaun nebe deskonfia mai husi funsionariu sira liu-liu sira nebe kaer osan  Estadu nian. Maibe Eng. Mario Viegas Carrascalão uja meius komunikasaun hodi kondena funsionariu Governu nian katak 50% halo ona korupsaun.

Ho rajaun sira ne’e LABEH hare katak servisu Eng. Mario Viegas Carrascalão nian sei kontinua nafatin hetan rejistensia politika no Administrativa tanba  Carrascalão la dun iha inisiativa atu halibur funsionariu sira hodi fo valor ba sira nebe halo servisu diak no mos kondena sira nebe halo servisu la diak tanba agora dadaun funsionariu sira hare sira nia an nudar koruptor hotu .

LABEH husu ba Vise Primeiru Ministru Eng. Mario Viegas Carrascalão atu uja ninia kompetensia  hodi halo lalais programa ka seminariu ruma  ba funsionariu publiku sira para bele  fo hanoin ba sira kona ba oinsa bele prevene korupsaun duque kondena maka’as deit liu husi media.

LABEH hare katak, se wainhira Vise Primeiru Ministru Eng. Mario Viegas Carrascalão la muda sistema nebe ohin loron nia uja, nia sei kontinua nafatin hetan rejistensia maka’as husi membrus Governu balun no funsionariu sira.

LABEH rekomenda ba Vise Primeiru Ministru Eng. Mario Viegas Carrascalão atu implementa lalais sistema ruma nebe labele fo dalan ba membrus Governu balun no funsionariu sira atu halo korupsaun.

LABEH hanoin katak se to’o tinan ida mak la’o nafatin hanesan ne’e, Eng. Mario Viegas Carrascalão sei lakon ninia integridade nudar lideransa ida tanba la konsege hadia nia promesa sira nebe hatete lori koruptor sira ba iha tribunal to’o iha Hotel Bekora.

LABEH hare katak, se wainhira Eng. Mario Viegas Carrascalão muda ninia sistema nebe ohin loron  nia uja hodi fo hanoin ba Ministru no  seitor hotu –hotu kona  ba nia kna’ar  oin sa bele prevene korupsaun, sistema saida mak bele implementa para Governu bele moris, bele efetivu, bele akuntavel.

LABEH sei  kontinua suporta  nafatin wainhira Eng. Mario Viegas Carrascalão implementa sistema diak ida atu prevene korupsaun iha Nasaun  foun ne’e no LABEH  sei kolabora nafatin,  servisu hamutuk hodi promove sira nia kna’ar.

Maibe se wainhira rekomendasaun sira ne’e Eng. Mario Viegas Carrascalão la uja  no la halo seminariu ho funsionariu sira, la hatete ba sira kona ba sira nia sala, sira sala tanba saida, husi parte nebe mak sira sala, saida mak presija atu hadia. Tuir LABEH diak liu presija hakbesik an (pendekatan) husi Vise Primeiru Ministru Eng. Mario Viegas Carrascalão ba membrus Governu sira.

LABEH  fiar nafatin Eng. Mario Viegas Carrascalão sei halo kna’ar diak liu tan, wainhira nia uja sistema hakbesik an (pendekatan)  preventive doque sistema kombate.

 

Find us on Facebook

Follow us on Twitter