Education, Training and Capacity Development
Transparency, Accountability, Integrity, Good-governance, Courage, Justice and Democracy.
Estudantes LABEH-VS HALO ACTIVIDADE IHA LABEH
Budget Monitoring
Advocacy and Monitoring
Who Are We

Responde ba opiniaun Gregorio Ferreira da Silva kona ba: Konflitu Interese: …

Tuir LABEH nia hanoin Sr. Gregorio Ferreira nia hanoin kona ba Lei Konflitu de Interese ne’e ba liu-liu deit Projetus, Kontratu nebe hala’o ona husi Prokuramentu, la’os ida ne’e. LABEH nia hanoin mak presija Dekretu Lei Konflitu de Interese  ba membrus Governu  sira hotu ho objetivu atu obriga membrus Governu fo sai sasan ou rikusoin nebe sira iha, saida mak sira bele halo no saida mak sira labele halo e ita hotu mos bele kontrola hodi nune’e bele dudu Boa Governasaun iha Administrasaun publiku nian ba oin tamba LABEH hakarak oinsa Governu ida ne’e implementa sistema ida nebe la fo fatin hodi ema bele hariku an e halo tuir nia hakarak tamba deit nia iha poder. LABEH  hakarak prevene hahalok sira ne’e. LABEH kontente ho opiniaun husi Sr. Gregorio Ferreira da Silva nian, maibe nudar Instituisaun Non Govermental ida nebe Hahi no Tane a’as valor Transparensia no Akuntabilidade, LABEH hakarak mantein nafatin katak Lei ba Konflitu de Interese presija duni la’os deit kona ba Lei konflitu de Interese nebe iha Lei Aprovisionamentu nian. LABEH hatene katak Lei Aprovisiomentu nian mos koalia oituan kona ba Konflitu de Interese maibe la’os Lei Aprovisionamentu ne’e mak LABEH koalia.

Ohin loron ita hare ho matan rasik buat nebe akontese. Ita hare deskontente barak iha Parlamentu Nasional, ita hare deskontente iha sosiedalidade nia laran no iha fatin barak  nebe hakilar nafatin kona ba Konflitu de Interese, kona ba hahalok membrus Governu balun.  Ita hatene katak, Governu ida ne’e hakarak duni promove Transparensia, Akuntabilidade no Boa Governasaun. Tuir LABEH nia Hanoin katak tenkiser iha duni Lei Konflitu de Interese  ida ke separado. La’os ida ke tama iha Lei Aprovisionamentu nian.

Tuir Sr. Gregorio Ferreira nia steitmentu nebe dehan katak “ Se karik NGO LABEH iha evidensia ruma nebe sai nudar tarjetu hodi hasoru, nune’e mak nia foti asuntu ne’e ka nudar steitmentu publiku ida nebe NGO LABEH hakarak tuda sai hela deit maibe nia rasik la hatene tarjetu nebe nia atu tuda ba. Se karik NGO LABEH iha evidensia hanesan buat nebe mensiona iha artigu laran katak, “…ohin loron ita iha ona evidensia barak katak membru Governu balun fo direitamente projetu nebe boot ba nia familia,” entaun tuir hakerek nain nia hanoin katak diak liu NGO LABEH hatama kaju ne’e ba PDHJ nudar Instituisaun autonom nebe nia knar hanesan entidade ida atu garante Boa Governasaun nune’e bele investiga klean liu tan, basa hahalok ne’e kontra regime Juridiku Aprovisionamentu, Dekretu Lei no. 10 / 2005” LABEH hakarak responde katak : Sim, LABEH konkorda. Maibe LABEH hanoin Sr. Gregorio mos hatene katak LABEH dalabarak ona  hato’o kazu barak ba PDHJ maibe LABEH nunka hatene prosesu investigasaun ne’e to’o iha nebe. Tamba ne’e mak halo LABEH lakon fiar ho sistema ida nebe Instituisaun sira ne’e uja. Tamba ida ne’e, LABEH sei la hato’o fila fali kaju wainhira kazu uluk nebe LABEH hato’o tiha ona seidauk iha rezultadu. Ita labele hato’o nafatin kaju ba Instituisaun ida ke la halo buatruma ho kaju sira ne’e. Ita hare ita nia investigadores sira, Sistema Judisiario sira, buat hotu ne’e la’o maibe la fo lejitimasaun ka la fo fiar ba ema sira nebe hato’o kaju ne’e. Kaju sira ne’e la’os husi LABEH deit maibe iha kaju barak nebe mak hato’o tiha ona husi ema seluk ba PJR, PDHJ maibe to’o ohin loron seidauk iha rezultadu ida ke halo povu satisfeitu.
Tuir LABEH nia hanoin katak la’os ba hato’o keixa mak importante maibe importante mak oinsa ita bele ona prevene hahalok Korupsaun e oinsa ita bele prevene hahalok nebe la fo benefisiu ba povu. Tamba ne’e, LABEH hare katak hato’o keixa ba Instituisaun sira nebe mensiona tiha ona ne’e la muda buat ida.

Iha mos steitmentu husi Sr. Gregorio katak “ Maibe se kaju ida ne’e NGO LABEH rasik laiha evidensia maibe hakarak tuda sai hela deit no la hatene tarjetu nebe nia atu tuda, ne’e hare husi parte etika no moral nian ne’e sala bo’ot. Basa, NGO LABEH foti kestaun ne’e tuda hasoru membru sira husi orgaun soberanu estadu ida nian. Maski ita nia nasaun ne’e demokratiku teb-tebes nebe fo liberdade ba ema ida-idak atu koalia, maibe labele sai fali hanesan situasaun anarkismu iha ekspresaun hanoin nian. Katak ema ida-idak koalia maibe faktus ka baze ruma nebe fo suporta ba buat nebe nia ekspresa ne’e. Iha iklima demokratika, ema ida-idak livre maibe ninia liberdade ne’e iha ninia limitasaun. Limitasaun liberdade ema ida nian mak fronteira ho liberdade ema seluk nian. Ida ne’e mak liberdade responsabilizada.” Klaru, Maibe LABEH mos hakarak responde ba steitmentu nebe mensiona tiha ona iha leten katak LABEH pronto kualker tempo atu hatan iha tribunal ka iha nebe deit se karik steitmentu nebe LABEH hato’o ba publiku ne’e hamosu duvidas ou soke ba  ema balun. Tuir LABEH se karik steitmentu ne’e hamosu duvidas ou soke ba ema balun, LABEH sente katak ema ne’e mos iha direitu atu hato’o LABEH ba Tribunal e LABEH sempre pronto atu ba hatan tamba LABEH iha responsabilidade ba liafuan nebe nia tuda sai.

Atu implementa Lei ida ne’e, la’os LABEH mak atu implementa maibe instituisoens relevantes sira hanesan Prokuramentu mak tenkiser implementa. Diak liu Sr. Gregorio Ferreira husu ba ema  nebe mak agora dadauk toma konta iha Prokuramentu atu bele implementa Lei ne’e ho susesu. Tamba se karik sira implementa duni Lei Konflitu de Interese  tuir Lei nebe iha tiha ona LABEH hanoin publiku sei labele hakilar tan katak Ministru ou Secretario Estadu balun fo projetu bo'ot ba sira nia familia direitamente se wainhira sira implementa Lei ne’e lolos.

Dala ida tan, LABEH kontinua ejiji nafatin katak Lei Konflitu de Interese ne’e tenki separado ho Lei nebe iha tiha ona artigu balun iha Lei Aprovisionamentu nian. LABEH nia hakarak mak Dekretu de Lei Konflitu Interese  nebe  mak obriga membrus Governu hotu fo sai sasan ou rikusoin nebe mak membrus Governu sira hotu iha hodi  nune’e ita hotu bele kontrola ho objetivu atu dudu Boa Governasaun iha area Administrasaun publiku nian ba oin.           

Voice of LABEH ( Vi  Ou eL )

Dili, June 19, 2008

Find us on Facebook

Follow us on Twitter