LABEH Realiza Kampanha Nasional Luta Hasoru Korupsaun iha Distritus

LABEH Realiza Kampanha Nasional Luta Hasoru Korupsaun iha Distritu Manufahi, Covalima, Ainaro no mos halo Monitorizasaun ba Agrikultura no Infrastrutura

Hafoin Realiza  programa Kampanha Nasional Luta Hasoru Korupsaun ho tema Hamutuk ho LABEH Ita Luta Kontra Korupsaun Hodi Fo Futuru Diak Ba Povu iha Distritu Dili iha loron 13/9/2009 nebe lansa husi Vice Primeiru Ministru Assuntu Sosial Jose Luis Gutteres no akompanha husi Reprezentante ONU Finn Rieske Nielsen, LABEH kontinua realiza Programa kampanha nasional iha nivel Distrital hanesan iha Distritu Manufahi iha loron 7/9/09 nebe hola fatin iha salaun Terras e Propriedade no programa ne’e loke husi Administrador Distritu Manufahi Filomeno Tilman. Iha okaziaun ne’e Administrador afirma katak Luta ba ukun an defisil maibe luta hasoru korupsaun difisil liu tan tanba ne’e nudar Chefe iha Distritu refere nia apela ba komunidade tomak atu hamutuk ho LABEH hotu-hotu hamriik luta hasoru korupsaun labele hein deit husi orgaun kompetente maibe presiza tebes kolaborasaun husi entidade tomak liu husi hato’o informasaun.

{gallery}/{/gallery}Ekipa LABEH ho programa monitorizasaun kontinua halo monitorizasaun iha Sub Distritu Betano hanesan halo monitorizasaun iha Irigasaun mota Karau Ulun Sub Distritu Betano no mos halo monitorizasaun ba Traktores nebe fahe husi Ministerio Agrikultura bazeia ba informasoens nebe durante nee espalha katak Governu fahe traktores ba membrus partidu deit maibe realidade iha baze liu-liu iha Suku Seli Hasan, Raihusar Sub-Distritu Betano hatudu katak informasaun hirak ne’e la akontese iha sub distritu refere maske ho limitasaun traktores nebe fahe husi Governu Komunidade sira maneja tempo ho diak atu hetan benefisiu husi traktores ne’e.

Iha monitorizasaun ne’e ekipa LABEH akompanha husi Administrador Distritu Manufahi Filomenu Tilman nebe mak ho laran luak oferese nia tempo servisu loron ida tomak hodi sai mata dalan ba aktividades refere. Tanba ne’e La haluha LABEH fo Parabens ba Administrador nebe mak oferese ona tempo mai ekipa LABEH.

Hafoin Programa Kampanha Nasional Luta Hasoru Korupsaun iha Distritu Manufahi LABEH realiza tan Programa refere iha Distritu Covalima nebe hola fatin iha salaun administrasaun distrital iha loron 9/9/09 nebe loke husi Administrador Distritu Covalima Inacio da Silva Pires .
Iha okaziaun ne’e Administador Distritu Covalima afirma katak nia apresia tebes prezensa LABEH iha Distritu Covalima hodi halo kampanha nasional Luta Hasoru korupsaun tanba durante ne’e povu Distritu Covalima susar tebes atu assesu ba informasaun. Iha ema barak temi no rona bebeik liafuan korupsaun maibe la hatene korupsaun ne’e saida los.

Administrador mos aprezenta valor orsamentu nebe nia Distritu simu trimester ida no nia hateten katak valor hanesan ne’e imposibel nudar administrador distritu atu halo buat ruma iha rai laran. Nia mos afirma katak osan ki’ik oportunidade na’ok/korupsaun ki’ik maibe osan boot oportunidade na’ok ka halo korupsaun nee bo’ot tanba sistema regula orsamentu ne’e fraku teb-tebes.

Hafoin Programa Kampanha Nasional Luta Hasoru Korupsaun remata, ekipa LABEH mos kontinua ba halo monitorizasaun iha Suku CasaBauk Sub Distritu Tilomar hodi hare besik liu tan servisu traktores sira nebe fahe husi Governu ba povu fo benefisiu duni ba sira ka lae.

Iha momentu Ne’e ekipa LABEH hasoru malu ho Chefe Suku Maudemo Subdistritu Tilomar Vitorino Tobu Nia esplika kona ba traktores nebe mak nia suku simu no nia afirma katak tratores sira ne’e fahe ba povu hotu la hare ba partidu hanesan informasaun nebe espalha  durante ne’e.

Atu hatene klaru liu tan informasaun hirak ne’e ekipa LABEH akompanha husi Chefe suku Maudemo ba vizita Chefe do grupo ida-idak nebe mak toma responsabilidade ba tratores. Realidade hatudu katak membrus grupo sira la mai husi partidu ida deit katak tratores fahe la hare ba partidu. Iha suku Casabauk populasaun sira nebe forma ona ba kada grupo sira kontente tanba durante ne’e servisu traktores iha rotasaun diak hodi fila rai maibe iha mos deskontente husi membrus grupo ida nebe mak lamenta tebes ho servisu husi traktores ne’e tanba tuir nia katak durante tinan haat ona nia nunka hetan ou sente benefisiu husi traktores ne’e.

Relasiona ho deskontente ne’e ekipa LABEH kontinua ba halo konfirmasaun ho Chefe do Grupo Bora Oan Manuel Queroz no konsege duni hetan resposta katak nia la halo diskriminasaun ba membrus do grupo so ke laiha unidade iha grupo laran no mos tratores nebe simu limitadu tebes tanba kada grupo ida membrus bele to’o nain 35 no luan ba rai husi kada membrus la hanesan tanba ne’e mak atraza oituan no presiza tempo nebe naruk.

Iha Distritu Ainaro iha loron 11/9/09 LABEH mos realiza programa Kampanha Nasional luta Hasoru Korupsaun nebe hola fatin iha Salaun Pre Seminario Sao Luis Gonzaga no programa ne’e loke husi Administarador Interinu Distritu Ainaro Eduardo Lopes da Silva. Iha okaziaun ne’e, Administrador afirma katak osan ne’e hanesan maninga no diabo kuando osan ne’e iha ita nia liman bele mosu hanoin atu halo manipulasaun tanba ne’e presiza haklaken informasaun to’o baze atu nune’e povu bele matan moris no hatene saida mak korupsaun. Programa ne’e mos hetan suporta maximu husi Igreja Ainaro ho prezensa Administrador Paroko Distritu Ainaro Pe. Evaristu Da costa Soares nebe mak sai orador iha programa ne’e hodi koalia kona ba papel igreja iha luta kontra korupsaun.

Hanesan mos iha Distritu Covalima no Manufahi, Hafoin Programa Kampanha Nasional Luta Hasoru Korupsaun Remata ekipa LABEH kontinua halo monitorizasaun ba traktores iha Ministerio Agrikultura Distritu Ainaro no operadores traktores informa katak durante ne’e rotasaun servisu husi traktores hodi fila rai lao ho diak so deit iha ema balun nebe mak laiha responsabilidade no halo estragus hanesan tuda rahun vidru traktor nian.

Kontinua mos ekipa LABEH halo monitorizasaun ba rehabilitasaun edifisiu foun ba Administrasaun Distritu Ainaro nebe mak abandona ona durante tinan tolu nia laran. Lahatene los razaun saida maka rehabilitasaun nee parado tanba ne’e atu hatene klaru liu tan informasaun ne’e ekipa LABEH kontinua hakat ba edifisiu administrasaun distrital no konsege hasoru malu ho Adjuntu Administrador Manuel Perreira nebe esplika katak husi nia parte mos la hatene razaun saida mak kompanha ne’e hapara rehabilitasaun edisiu refere.

Tanba atu hatene klaru liu tan informasaun refere ekipa LABEH kontinua ba edifisiu Kompanha nebe kaer projetu refere maibe la konsege hasoru Director kompanha tanba laiha fatin. LABEH espera katak iha tempo badak bele hatene razaun saida mak rehabilitasaun ne’e paradu.

Direitur Ezekutivu LABEH, Christopher Henry Samson afirma katak iha programa rua mak LABEH halao durante semana ida nia laran hanesan Programa Kampanha Nasional Luta Hasoru Korupsaun nebe ho objetivu atu fahe informasaun ba povu kona ba Komisaun Anti Korupsaun no Opsaun Governu nian no 6 : Governasaun nebe Moos no Efektivu no Programa Monitorizasaun ba Tratores nebe fahe husi MAP no Monitorizasaun ba Infrastrura. Christopher mos afirma tan katak LABEH sei kontinua programa hanesan iha Distritu seluk hanesan Vique-que, Baucau, Lospalos, Bobonaro, Liquica, Ermera no Aileu.