LABEH Kongratula Servisu Direitora EP no1 Aileu no Admininistrador Distritu Aileu

“LABEH Kongratula Servisu Direitora EP no1 Aileu no Admininistrador Distritu Aileu”

Lalenok Ba Ema Hotu (LABEH) nudar ONG nebe Hahi no  Tane A’as valor Transparensia no Akuntabilidade hakarak kongratula servisu Direitora no profesores Eskola Primaria no.1 Aileu nebe mak hatudu duni sira nia responsabilidade boot ba sira nia servisu no mos Administrador Aileu no nia fungsionariu tomak. Liafuan hirak ne’e hato’o husi Direitur Ezekutivu LABEH, Christopher Henry Samson iha nia eskritorio, Kampung Baru, Comoro (17/7/09)

 Bazeia ba Monitorizasaun LABEH iha Distritu Aileu (16/07/09) liu-liu iha Eskola Primaria no.1 Aileu hatudu katak prosesu aprendizajem iha eskola refere la’o ho kapas teb-tebes, wainhira LABEH hakat ba iha eskola refere iha oras tuku 03.00 loro kraik OTL, observasaun hatudu katak profesores sira kompletu no hala’o aktividades hanesan bai-bain. Merenda eskolar mos la’o ho diak teb-tebes maski iha difikuldades oituan kona ba gas nebe mai tarde no salariu ba kujinheirus sira iha fulan lima nia laran seidauk simu maibe ida ne’e la sai obstakulu ba sira atu kontinua halao servisu.

Maski hala’o servisu ho diak maibe sira mos hato’o ejijensia liu-liu kona ba rehabilitasaun eskola refere nebe hatudu katak laiha kualidade tamba seidauk tama ba fulan ha’at deit komesa iha estragus ona hanesan wainhira tempo udan, iha sala balun udan ben tama parede komesa nakloke ona, kualidade ba meja no kaideiras laiha, no mos haris fatin ho sala ha’at nebe kapas maibe laiha bee mos atu uja no agora abandona hela so uja deit sala ida.

Perguntas ba sira mak  tanba sa orsamentu ho montante boot US 12.78,90  (dozentus setenta e oitu virgula noventa mil dolares) ba deit projetu rehabilitasaun mos sei  laiha kualidade diak? Ne’e la’os konstruksaun. Direitora eskola refere,Sra.Silvina Maria Martins haktuir.
Nia mos haktuir tan katak informasaun kona ba problema refere hato’o tiha ona ba kompanha nebe kaer projetu ne’e e sira mos tun mai hare tiha ona maibe realidade to’o agora sira seidauk halo buatruma.

Iha parte seluk, LABEH mos hakat ba Administrasaun Distritu Aileu iha oras tuka 04.00 loro kraik OTL, realidade mos hatudu katak fungsionarius sira sei iha fatin hodi hala’o kna’ar hanesan bai-bain. Iha oportunidade ne’e LABEH konsege hasoru Adjuntu Administrador Sr.Abel da Conceicao iha nia eskritorio nebe ho prontu fahe informasaun kona ba sira nia servisu durante ne’e.

Adjunto Administrador mos informa katak maski iha fungsionario nebe limitado tebes nain 8 deit no ekipamentus tempo UNTAET nian maibe sira esforsu an nafatin hodi hala’o servisu ho diak maske geografikamente area hanesan sukus, subdistritus ho espasu nebe ita bele dehan dook malun tebes.

LABEH mos apresia ho inisiativa husi  Adjuntu Administrador nebe hateten katak sempre hala’o enkontru mensal ho entidades tomak hodi fahe copia orsamentu do estadu ba entidades sira hotu hanesan Sosiedae sivil, estudantes no sst atu bele hatene hodi ajuda halo monitorizasaun ba ezekusaun orsamentu liu-liu iha Distritu Aileu.  

Dala ida tan, LABEH kongratula tebes no fo PARABENS ba sira tanba hatudu ona komitmentu servisu nian nebe boot. LABEH mos espera katak hahalok sira hanesan ne’e bele sai ezemplu ba Distritu sira seluk liu-liu ba preparasun hodi simu Camara Municipio.?