Informasaun Husi News ABC Australia

“LABEH Konsidera Informasaun Husi News ABC Australia nebe hatete Primeiru Ministru Fo Projetu Ba nia oan ne’e atu hamonu integridade Governu no Estadu nian”

Lalenok Ba Ema Hotu (LABEH) nudar ONG Anti Korrupsaun nebe tane A’as valor Tranparensia no Akuntabilidade triste tebes ho rumoris informasuan sira nebe publika liu husi media Nasional ho Internasional  katak Primeiru Ministru Xanana Gusmão  fo projetu ba nia oan hodi hatete Primeiru Ministru Xanana Gusmão halo ona korrupsaun.

LABEH triste ho informasaun ne’e tanba LABEH hare katak laiha evidensia ida nebe hatudu iha prosesu  hatama fos  mai Timor iha indikasaun korrupsaun. Tenki estabiliza faktus  nebe akontese iha prosesu fo projetu ba kompania sira nebe manan hodi hatama fos atu bele hare  iha prosesu  ne’e Primeiru Ministru involve direitamente hodi halo korrupsaun, Kolusaun, nepotizmu, abuzu de poder,iha konflitu de interese  ka lae?

Tuir monitorizasaun LABEH deklara katak laiha KKN, laiha abuzu de poder  no laiha konflitu de interese ba projetu sosa fos tanba prosesu fo projetu ba kompania hirak nebe manan ne’e mai husi Ministeriu Turismu Comersia Industri  (MTCI) maibe tanba valor orsamentu  nebe aloka hodi sosa projetu ne’e liu milaun ida, automatikamente submite ba Primeiru Ministru Xanana Gusmão hodi responde ka asina kona ba asuntu ne’e.

LABEH triste tebes ho deklarasaun mai husi media Internasional ho membru  opozisaun  balun ne’e hanesan deklarasaun mamuk tanba la hatudu failhansu prosesu sosa fos iha nebe los. LABEH hare prosesu refere la halo husi Gabineti Primeiru Ministru nian maibe prosesu sosa fos halo liu husi Ministeriu kompetente mak MTCI.

Tanba ne’e LABEH hakarak fo sai ba publiku katak informasaun nebe publika liu husi jornal ABC Australia nian ne’e hanesan deklarasaun politika atu hamonu integridade Governu no Estadu nian, LABEH mos husu ba opozisaun tenki hatudu prosesu sosa fos ne’e sala iha nebe? Se wainhira iha sala duni,presiza hetan investigasaun tanba povu presiza hatene atu labele monu ba deklarasaun politika nebe laiha faktus konkretu tanba prosesu  hatama fos iha Timor  la mai direitamente husi Ministeriu Finanças ka Gabineti Primeiru Ministru maibe mai husi MTCI .

LABEH  husu  ema sira nebe halo deklarasaun ne’e presiza hatene kona ba prosesu no realidade ema nebe iha poder atu koalia kona ba prosesu hatama fos mai Timor. Tanba ne’e LABEH bolu atensaun ba komponente hotu atu hare prosesu refere tanba Xanana la fo projetu ba nia oan maibe fo ba kompania local sira nebe iha kredebilidade hodi hatama foos mai Timor-Leste.

Iha oportunidade ida ne’e mos LABEH fo Parabens ba Adjunto PGR foun, Dr. Vicente Fernandes Brito nebe hetan fiar husi Prezidente da RDTL hodi troka Dr. Ivo Valente. LABEH husu Adjuntu PGR foun atu servisu maka’as ho PGR Ana Pessoa hodi bele hare kazu pedente sira, liu-liu kazu korupsaun. LABEH sei nafatin fo suporta ba sira nia servisu no pronto atu kolabora ho sira kualker tempo wainhira sira presija.