INDIKASAUN KORUPSAUN IHA GABINETI PRIMEIRU MINISTRU NO MAL ADMINISTRASAUN IHA FUNDUS BA SOCIEDADE SIVIL

LABEH nudar ONG Anti Korupsaun nebe hahi no Tane aas valor Transparensia no Akuntabilidade hakarak uza oportunidade ne’e hodi bolu atensaun maka’as ba Governu ida ne’e liu-liu ba Primeiru Ministru Xanana Gusmão atu hahu foti medidas ida ke forte hodi hasai tiha funsionario ida nebe hetan alegasaun na’ok osan iha Gabinete PM nian. Akontesimentu na’ok osamentu ne’e ohin loron hetan ona investigasaun husi diresaun PNTL.


LABEH nudar ONG lakohi problema ne’e taka ba publiku tanba funsionario ida ka ema nebe atu sai Servidor ba povu mak halo fali nasaun ne’e moe katak hetan ona servisu diak iha Gabineti Primeiru Ministru, fulan- fulan manan salariu maibe la uza oportunidade ne’e ho di’ak, fila na’ok tan osan.

LABEH husu ba Primeiru Ministru atu hasai staff ida nebe liman lais tanba nia la merese atu kontinua sai Servidor ba povu. Nia la merese kontinua sai membru Governu tanba nia halo moe Primeiru Ministru tanba hanesan ita hotu hatene katak Governu ida ne’e nebe lidera husi PM Xanana Gusmão nebe ho prioridade oinsa bele Promove Boa Governasaun, halo Transparesia boot kontra korupsaun iha nia Gabinete rasik mos  sei iha LAHO ka TIKUS-TIKUS BERDASI balun.

Tanba nee LABEH hakarak fo sai katak ida ne’e ita la presiza taka, LABEH husu ba hirak nebe iha kompetensia atu foti medidas ida ke adekuadu hodi hein prosesu investigasaun Polisia ka prosesu Kriminal ka prosesu Judisial nebe sei la’o.

Iha parte seluk, relasiona ho ejijensia populasaun balun kona ba prosesu fahe Hand Tractor nebe la ho transparansia husi Ministeriu Agrikultura e Pescas, LABEH mos hato’o ona proposta ba Gabineti PM hodi hetan fundus Sociedade Sivil nebe aprova ona husi PN ho objetivu atu halo monitorizasaun ba prosesu fahe hand tractor ba komunidade iha distritu no monitor Fundus Dezenvolvimentu Comunitaria Agrikula (FDCA) hodi bele hatene lolos saida mak akontese iha baze no bele fo rekomendasaun ba Ministerio refere atu hadia jestaun maibe realidade hatudu oin seluk.  

LABEH hakarak deklara ba publiku katak fundus ba Sociedade Sivil LABEH la hetan tanba iha Mal Administrasaun, Mal Jestaun iha prosesu fahe fundus ba Sociedade Sivil katak laiha Transparensia. Prosesu fahe fundus la tuir regras nebe iha. Kriteria saida mak Assessor PM ba assuntu Sociedade Sivil nian uja no se deit mak panel ba fundu ne’e Sociedade Sivil sira la hatene.

LABEH bolu atensaun katak tuir lolos fundus ba Sociedade Sivil tenki tau iha Gabineti Vice Primeiro Ministru assuntu Social Jose Luis Gutteres. Sr. Jose Luis Gutteres mak iha kompetensia hodi jere orsamentu ba Sociedade Sivil tanba Nia mak Vice PM ba assuntu social. Maibe tanba sa mak osamentu ne’e tau fali iha Assessor PM nia fatin?? Assesor PM tuir lolos tau matan ba politika Governu nian ba assuntu Sosiedade Sivil no relasaun Governu ho Sosiedade Sivil sira no oinsa ejekusaun orsamentu ne’e. Assesor PM labele halo fali Gabineti foun iha PM nia okos.

LABEH triste tanba iha Indikasaun Mal administrasaun, Mal Jestaun no iha duni indikasaun Korupsaun katak Assessor PM ba assuntu Sociedade Sivil halo ona politika manipulasaun ba fundus Sociedade Sivil hodi fahe fundus nee ba NGO balun antes NGO sira seluk.. LABEH bolu atensaun ba Vice Primeiru Ministru atu halo investigasaun profudu hodi hatene lolos ONG sira nebe simu fundus ne’e ejiste ka lae??
 
Atu koalia klaru katak, proposta LABEH nian passa tiha ona liu husi panel hotu maibe tanba deit politika iha Gabinete Assesor nian LABEH nia proposta lakon afinal iha proposta barak mak iha neba maibe so lakon deit mak LABEH nia proposta no to’o ohin loron la hatene ba nebe tanba iha politika balu nebe lakohi duni atu LABEH halo monitorizasaun ba Ministerio Agrikultura.


LABEH husu ba hirak nebe iha kompetensia liu – liu ba Vice PM atu halo investigasaun profundo ba Assesor PM assuntu Sosiedade Sivil atu hatene lolos objetivu saida mak proposta LABEH nian nebe direitamente kona ba Agrikultura nian lakon iha Gabineti Primeiru Ministru, laiha Responsabilidade, laiha Akuntabilidade. LABEH husu responsabilidade ba Assessor PM assuntu Sosiedade Sivil atu Nia bele toma responsabilidade kona ba proposta nebe lakon.

LABEH mos husu ba Governu atu tinan oin mai, fundus ba Sosiedade Sivil nian bele tau iha Vice PM ba assuntu social nia fatin laos ba fali Assessor PM tanba iha ona informasaun katak ema nain 5 ka 6 forma grupo mos bele hetan kedas osan no la tuir regras nebe iha tanba nee presiza investiga.

Bolu atensaun mos katak ema hanesan ne’e bele estraga Governu nia naran no fundus Sosiedade Sivil nebe fo la tuir regras, la Transparante, laiha Akuntabilidade bele hamosu preokupasaun boot iha Sosiedade Sivil kona ba implementasaun fundus refere tanba ne’e dala ida tan LABEH bolu atensaun katak sira nebe mak halo Mal Jestaun presiza hetan konsekuemsia ba sira nia hahalok?

 .