LABEH HUSU BA VICE-PM ASSUNTU ADMINISTRASAUN NO PREZIDENTE PARTIDO PSD ATU FOTI AKSAUN KONKRETAS HASORU MINISTRA JUSTICA

LABEH nudar ONG Anti-Korupsaun ejiji ba Vice Primeiro Ministru ba assuntu administrasaun Eng. Mario Viegas Carasscalao atu lalais halo investigasaun kona ba hahalok nebe mak mosu iha Ministerio refere kona ba aihan nebe Governu oferese ba prizioneiro sira iha prizaun Gleno, Distrito Ermera hodi hein julgamentu nebe fungsionario balun faan.

LABEH hare katak hahalok ida ne’e akontese komesa husi Governu anterior nian maibe la hetan sansaun no hahalok ne’e sei kontinua nafatin too ohin loron katak aihan sira nebe lori ba prizaun Gleno, balun fungsionario sira faan tiha no investigasaun husi Polisia nian hatudu duni katak hahalok ne’e akontese duni. Liafuan hirak ne’e hato’o husi Direitur Ezekutivu LABEH, Christopher Henry Samson iha nia Eskritorio, Kampung Baru.

Iha mos kazu balun hanesan, orsamentu hahan ba guarda prizioneiro sira iha fulan ne’en nia laran Ministerio Justica la selu ba sira.
LABEH ejiji ba Governu atu foti desizaun kona ba kaazu hirak ne’e no ejiji nafatin katak Governu presiza tau medidas nebe importante tebes ba Ministra Justisa, tanba ita hotu hatene lor-loron iha informasaun oin-oin kona deit ba MJ nian. Ne’e nudar test case ida ba Governu atu foti medidsas ou desizaun politika ida hasoru MJ nebe deskonfia involve iha aksaun pratika KKN.

LABEH mos bolu atensaun kona ba aksaun nebe MJ halo hodi lori Timor oan ida ba Japaun atu hetan kapasidade liu husi Ministerio Justisa. LABEH husu investigasaun profundu kona ba prosesu lori ema nebe la’os Direitor no mos la’os iha nivel Direitor nian ba to’o Japaun no pior liu tan ema ne’e hatudu hahalok nebe hamoe Timor Leste hodi sona ema wainhira Primeiru Ministru Kayrala Xanana Gusmao ba vizita nasaun refere.

LABEH ejiji atu halo investigasaun nebe profundu kona ba dokumentus hotu nebe hatudu katak ema nebe sona ema ne’e la merese ba Japaun tanba iha prosesu selesaun nakonu ho manipulasaun.

MJ Lucia Lobato ladun iha responsabilidade moral no la brani duni atu deskuti kona ba assuntu Timor oan refere iha Japaun tanba tanba Lucia Lobato hatene katak ema nebe nia haruka ba Japaun ne’e la tuir prosesu normal. LABEH husu ba Governu atu foti aksaun politika konkretas hasoru MJ tanba nia Ministerio nakonu duni ho Mal Administrasaun.

LABEH hakarak hateten katak MJ tuir lolos moe tanba nia hein fali opozisaun sira mak levanta ba Tribunal. Tuir lolos nia rasik mak husu dimensaun husi nia kargu  atu ba hasoru alegasaun sira ne’e. Nia labele hein opozisaun lori ba Tribunal. Se karik nia hanoin katak nia la salah tanba sa mak nia rasik la brani ba hasoru Justisa?
LABEH mos husu ba Partidu Social Demokrata liu-liu ba Prezidente PSD Zacarias Albano nudar mos Ministro dos Negosius Estranjeirus actual katak labele hein opozisaun haruka ba Tribunal, labele hein Governu mak demiti Lucia Lobato. Tuir lolos Prezidente Partidu nebe hotu-hotu konfia bele ona foti PSD nia oin hodi hatudu sensieridade no vontade politika hodi suspende Lucia Lobato husi Partidu hodi Nia bele responsabiliza akuzasaun barak nebe akontese iha nia Ministerio. Se karik la foti medidas ruma hasoru MJ maka sei fo impaktu negativu ba PSD tanbaLusia Lobato nudar membru boot ida iha PSD.
 
LABEH husu ba PSD atu labele nonok simu alegasaun sira nebe kontra nia membru sira nebe tur iha Governu, tanba PSD mos iha responsabilidade politika katak sira mos pronto atu defende lia los  no prinsipiu partidu nian. Labele hein Governu mak foti uluk medidas. Se karik Governu foti desizaun mak deskobre duni katak Ministra Justisa Lucia Lobato involve duni ne’e sei fo impaktu ba PSD. Dala ida tan, LABEH ejiji ba Prezidente PSD nebe hotu-hotu fo valor boot ba servisu Diplomatika  nebe nia halo ho diak foti aksaun konkretas hasoru MJ.?