LABEH La Aceita Sistema Governu Fahe Osan CASH

Dili, 2 Abril 2008, Lalenok Ba Ema Hotu (LABEH) nu’udar NGO Anti Korupsaun ne’ebe Hahi no Tane A’as Valor Transparencia, Akuntabilidade no Boa Governasaun liu husi Kombate Korupsaun. Hanesan Sociedade Civil (ONG) nebe Independenti no Imparsial. Bazeia ba prinsipiu LABEH nian, LABEH la aseita ho sistema governu nebe fahe osan Cash liu-liu ba Ministerio ESTATAL nebe fahe ba chefe suku sira iha Letefoho, Ermera. Tamba tuir rezultadu monitorizasaun LABEH, iha tinan hafoin governu anterior implementa programa FDC ba suku hotu iha Timor Leste laran tomak nebe la fo benefisiu ba komunidade sira.
LABEH kontinua ejiji ba governu AMP atu muda sistema fahe osan ne’e,. Tamba tuir Primeiro Ministru Xanana Gusmao nia deklarasaun iha Parlamentu Nacional katak sei implementa programa boa governasaun promove Transparansia no funu hasoru korupsaun. PM mos hateten katak tinan ida ne’e tinan REFORMA, reforma iha area administrasaun, reforma lei, no reforma mos buat hotu-hotu no mos reforma mentalidade administrasaun nian maibe LABEH hare katak reformasaun ne’e  seidauk to’o iha Ministerio ESTATAL.  Tamba ne’e, sistema Ministerio ESTATAL nebe maka agora dadauk fahe osan Cash ba Chefe Suku sira iha Letefoho, Ermera sei la fo kontribuisaun ba komitmentu governu atu promove boa governasaun.
Atetude Ministerio ESTATAL nebe fahe osan Cash ba chefe suku sira iha Letefoho ne’e la kontribui ba valor boa governasaun no LABEH hanesan ONG Anti Korupsaun kontra maka’as sistema nebe Ministerio ESTATAL implementa dadaun ne’e. Osan Cash nebe mak fahe ba chefe suku sira ne’e so para tau risku deit ba chefe suku sira tamba chefe suku sira laiha kapasidade maksimu atu salva osan ne’e husi na’ok ten sira. Mentalidade fahe osan cash tenkiser hasai tiha husi sistema Ministerio ESTATAL nian atu bele kontribui ba reforma administrasaun nebe governu AMP implementa dadaun.LABEH ho firme dala ida tan la konkorda e kondena maka’as attitude fahe osan Cash ne’e tamba la fo benefisiu ba Povu.
LABEH husu ba partido politiku sira liu-liu PD tamba ministru ESTATAL ne’e mai husi PD. Tamba ida ne’e,  PD tenki tama pozisaun ida bolu nia Ministru e husu atu implementa boa governasaun tuir governu actual ne’e hakarak la’os ba halo buat ida nebe ke abanbairua bele hamonu fali governu ida ne’e tamba programa nebe ohin loron sira implementa iha Letefoho (fahe osan cash) ne’e programa ida nebe bele laiha akuntabilidade e la fo benefisiu ba povu. LABEH promete katak monitorizasaun LABEH nian sei la’o nafatin maibe LABEH ejiji ba Ministro kompetente liu-liu Ministru ESTATAL atu muda sistema fahe osan cash ba komunidade tamba dala barak ona LABEH hakilar la fo benefisiu ne’e la’os boa governasaun.   
Dili, 2 Abril 2008