LABEH husu Rekalasaun Kazu OB-Van RTTL no Nauk Komputador iha Ministeriu Estranjeiru

DILI, Sesta-feira 14 Marsu 2008 - LABEH liu husi Departementu Transparansia no Akuntabilidade no Kombate Korupsaun Iha loron Sesta-feira 14 Marsu 2008 husu reklamasaun ba Prokurador Jeral konaba kazu prokuramentu OB-van RTTL no kazu nauk komputador iha Ministerio dos Negosios Estranjeirus no Kooperasaun. LABEH husu reklamasaun ou loke fila fali kazu OB-van nebe arkuivo tiha ona iha loron 10 Dezembro 2007 tamba LABEH iha evidensia foun 7. Evidensia ou pontu 7 nebe prokurador presiza investiga mak hanesan :
1.    Indikasaun Mark-up Presu. Folin kareta no sasan (equipments) iha OB-van nia laran karun la tuir presu normal iha merkadu ka hetan mark-up. Iha ekuipamentu balu nia presu hakerek US $.15,820, maibe sasan hanesan ho kualidade diak liu nia presu normal iha Dili US $.7,000 ou 7,500 deit.
2.    Bengkel Manan Tender. Prokurador Jeral presiza halo investigasaun ba kompania DAS Engineering ne’ebe manan tender prokuramentu OB-van, no halo investigasaun ba nia karta lisensa da compania ka SIUP. Informasaun ne’ebe iha dehan DAS Engineering nia SIUP ne’e so ba deit ofisina (bengkel). Nesesariu ne’e relasiona ho desizaun unica fontes (penunjukan langsung) ba DAS Engineering.
3.    Razaun “Penunjukan Langsung” La Forte. Prokurador Jeral presiza halo investigasaun profundu ba Divisaun Prokuramentu (Ministeriu Planeamentu no RTTL nia razaun proposta prokuramentu OB-van atu fo supporta sira nia ekipa halo kobertura  ba kampania Elisaun Jeral Presiden no Parlemen 2007. Wainhira prokuramen foti desizaun, momentu kampania eleisaun hotu tiha ona, ne’e hatudu katak laiha razaun ne’be forte atu uza unica fonte.
4.    Kompanha Seluk Mak Halo OB-van. Presiza investigasaun ba kompania ida iha Jakarta ne’ebe halo OB-van, tamba sira laiha representante iha Timor Leste. Se prokuramen uza meus unica fonte tamba sa Prokuramen hili fali DAS Engineering i la fo manan ba kompania ne’ebe halo OB-van.
5.    Legalidade “Surat-Menyurat”. Prokurador Jeral tenki investiga legalidade surat hirak mak hanesan MoU (Memorandum of Understanding) ne’ebe dehan kompania DAS ho RTTL halo iha Jakarta (Indonesia). Surat ida ne’e dehan deriji direitamente ba prokuramen la liu husi RTTL. Mos tenki investiga surat rekomendasun ida  ne’ebe dehan RTTL halo atu hatudu sira nia konkordansia ba surat MoU ne’ebe prokuramen simu.
6.    Kustu ba Viajem no Akomodasaun.  Prokurador Jeral bele investiga fundus ne’ebe Expedito Dias Ximenes (Presidente Konselu Administrasaun Radiodifusaun RTTL) ho jurnalista ida, Julio Carvalho (Chefe Finansas, agora Direktur Interinu RTTL), no Joao de Jesus Baptista (Director Jeral RTTL) uza wainhira sira  ba Jakarta hodi hare OB-van. Se mak selu kustu aviaun no akomodasaun (osan otel, osan hahan), compania ne’ebe manan tender, ka husi RTTL (governu), ka sira nia osan rasik?
7.    Taxa Importasaun OB-van. Presiza investiga Alfandega, tamba OB-van ne’e hanesan sasan governu, karik la selu taxa. Se nune’e, signifika katak orsamentu OB-van ne’e hotu ba kompania ida manan tender. Se karik importasaun OB-van ne’e selu taxa, presiza investiga  taxa sira selu ne’e tuir sasan nia presu ka lae.

Sei karik prokurador kontinua halo investigasaun no hatudu katak iha duni evidensia ne’ebe forte, makaema sira ne’ebe komete tenki asumu ba justisa. Maibe se karik rezultadu husi investigasaun evidensia foun ne’e la hatudu iha korupsaun LABEH fiar la iha duni korupsaun.
-fim-