LABEH konkorda ho Prokurador Geral da Republika konaba kriasaun Unidade Intelijensia Financeira

Dili- Organizasaun Naun Govermental Lalenok Ba Ema Hotu (LABEH) hafoin intrega relatoriu trimestral kona-ba transparensia nian ba periodu fulan Janeiru-Marsu 2013 ba Procurador Geral da Republica Jose da Costa Ximenes iha Vila-Verde Dili, Segunda 29/04/2013 hateten katak LABEH konkorda tebes ho ideia konaba establesementu ba Unidade Intelijensia Financeira ou Financial Intelligent Unit (FIU) ne’ebe bele halo servisu diak liu tan konaba kombate korupsaun. Iha intrega relatoriu ne’e, Diretur Ezekutivu LABEH, Julio Gil da Silva Guterres hateten, relatoriu trimestral LABEH nian liu husi Departamentu Transparensia no Budget Monitoring ne’ebe halo monitorizasaun ba projetu husi guvernu nian durante fulan tolu ne’e hatudu katak iha Ministeriu neen (6) mak presiza hadi’a liu tan transparensia ba informasaun kona-ba servisu aprovizionamentu nian iha prosesu tenderizasaun. Ministeriu 6 ne’e mak hanesan: Ministeriu Saude, Ministeriu Komersiu Industria no Ambiente, Ministeriu Negosiu Estranjeiru no Kooperasaun, Ministeriu Financas, Ministeriu Justica no Ministeriu Petroleo no Rekursu Minerais.

Entertantu Procurador Geral da Republica, Jose da Costa Ximenes hateten, nia parte agradese ba esforsu husi Sosiedade Sivil hanesan LABEH durante ne’e, ne’ebé hahú husi eis Diretur no hanesan fundador LABEH Dr. Christopher Henry Samson, hodi hala’o esforsu koalia kona-ba korupsaun, transparensia no akuntabilidade.

Procurador foun ne’e hateten, iha nia deskursu bainhira simu tomada de posse sai procurador Geral da Republica hodi troka Procuradora Ana Pessoa ne’e hateten, durante nia mandatu nia sei halo esforsu atu diminui ba kazu ne’ebe pendente hela.

Jose Ximenes hatutan, durante ne’e Komisaun Anti Korupsaun no Ministeriu Publiku hala’o nia servisu ho di’ak no aselera lalais ba kazu krimi sira liu-liu kona ba korupsaun maibe, nia parte haree katak, Tribunal iha Timor Leste to’o agora seidauk iha ema ida ne’ebe toma konta ba kazu korupsaun nian, tamba ne’e mak prosesu sira kona-ba kazu korupsaun dala ruma kleur no Tribunal adia hela deit.

Nia hatutan, durante ne’e Timor Leste hasoru dezafiu bo’ot ba parte Tribunal, Ministeriu Publiku, no Komisaun Anti Korupsaun atu haree ba kazu korupsaun tamba durante ne’e, sira halo investigasaun manual deit tamba laiha Unidade Intelijensia Financeira.  

Tuir procurador nia haree katak, LABEH mos iha nia radio rasik tamba ne’e presija fo edukasaun ba ema médiu sira kona-ba korupsaun atu komunidade sira bele komprende kona ba saida mak korupsaun, tamba Radio parte ida husi prevensaun ba ema sira ne’ebe atu halo korupsaun. No nia sujere ba Radio LABEH atu konvida juizes, procuradores sira atu fo esplikasaun kle’an kona-ba sira nia servisu no oinsa atu prevene kona ba korupsaun iha Timor Leste ba komunidade sira liu-liu ba ema médiu sira.

Ikus liu, nia rekomenda ba NGO LABEH atu kontinua servisu ba buat ne’ebe durante ne’e hala’o ona husi eis Diretur LABEH Dr. Christopher Henry Samson, kontinua krítika ba buat ne’ebe la loos, no halo kritiku mos ba autoridade sira hanesan juizes, prokurador sira, karik balun hala’o sira nia servisu laloos, tenke kritiku. No importante mak kritiku tenke ho provas ka iha faktus.

No nia husu ba LABEH atu hala’o servisu hamutuk nafatin ho KAK, no Ministeriu Publiku atu haree ba ema sira ne’ebe mak halo korupsaun no lakohi dezenvolve ba nasaun ida ne’e. REMATA