Inspektur Jeral da Republika hateten sei le relatoriu LABEH ho didiak molok foti medidas

Ohin, Sexta feira (19/04/13), oras tuku 09.05 dader OTL, Diretur Ezekutivu LABEH, Sr. Julio Gil da Silva Guterres, hamutuk ho nia ekipa intrega ofisialmente relatoriu trimestral ba periodu fulan Janeiro-Marco 2013 kona-ba servisu Transparensia ba Sr. Francisco de Carvalho, Inspector jeral da republica iha Palacio do Guvernu Dili.

Iha intrega relatoriu ne’e, Diretur Ezekutivu LABEH esplika konteudu husi relatoriu refere hanesan monitorijasaun ba projetu husi guvernu ne’ebe iha ministeriu balun laiha transparensia, koalia mos kona ba record transparensia husi Timor Leste ho ASEAN iha tinan tolu ikus ne’e, no koalia mos kona ba oinsa kombate korupsaun no fo rekomendasaun ba Komisaun Anti Korupsaun (KAK).

Entertantu, depois de intrega relatoriu ne’e, Inspector Jerald a Republica Sr. Francisco de Carvalho hateten, nia parte agradese ba LABEH nia vontade servisu liu-liu kona ba transparensia no korupsaun nian, no sosiedade sivil mak suporta maka’as ba instituisaun guvernu ne’ebe servisu kona ba korupsaun no transparensia nian hanesan CAC mak iku-ikus ne’e CAC iha dezenvolve ona hodi investiga ba ema sira ne’ebe halo krimi.

Nia mos hatutan, relatoriu ne’e tenke intrega mos ba CAC, Prokurador Jeral da Republica atu nune’e sira mos bele halo koordenasaun kona-ba asuntu balun ne’ebe iha ligasaun liu-liu kona ba kazu korupsaun, no transparensia ruma.

Inspector jeral ne’e hateten, sira nia servisu hanesan kontrolu internu, no bainhira hetan kazu ruma sira passa ba prokurador, no prokurador passa fali ba CAC mak halo investigasaun, tamba ne’e relatoriu husi sosiedade sivil hanesan LABEH nian, sai hanesan materia ida atu nune’e sira bele halo ligasaun fali ho asuntu sira ne’ebe iha relasaun ho korupsaun no transparensia nian iha Timor Leste.
Ikus liu, Inspector Jeral mos hato’o ninia sentimentu tristeza ba Eis Diretur LABEH no hanesan fundador ba NGO LABEH Dr. Christopher Henry Samsom ne’ebe ema akuza nia hodi ba tama iha kadeia, no inspector ne’e rekomenda ba diretur foun LABEH no nia staff sira atu kontinua hatudu vontade servisu atu nune’e bele ajuda instituisaun guvernu sira atu halo investigasaun ba ema sira ne’ebe halo korupsaun, no bele kombate korupsaun iha nasaun ne’e. Remata