LABEH Entrega Relatoriu servisu Transparencia ba Inspektur Jeral da Republika

Lalenok Ba Ema Hotu – LABEH hanesan ONG Anti Korupsaun, Sexta feira ne’e (19/4) ofisialemente entrega relatoriu trimestral konaba servisu transparencia ba Inspektur Jeral de Republika,  ne’ebe simu direitamente husi Sua Exelensia Sr. Francisco de Carvalho iha gabinete inspesaun jeral, Palacio do Governu, Dili.

LABEH ne’ebe mos hanesan membru kontaktu ba Transparency International no mos  International Budget Partnership liu husi relatoriu trimestral ne’ebe enterega ba Inspektur Jeral da Republika ne’e  husu mos ba Sr. Inspektur Jeral atu halo inspeksaun ou investigasaun internal ba servisu aprovizionamentu ba Ministeriu ne’en (6) tamba identifika komete erro iha aprova projeitu estado ba kompania nasional no internasional iha Timor Leste.

Iha Relatoriu Trimestral LABEH indika katak iha ministeriu ne’en (6) maka presiza hadia liu tan servisu aprovizionamentu nian iha prosesu tenderizasaun. Ministeriu sira ne’e mak hanesan Ministeriu Saude, Ministeriu Komersiu Industria no Ambiente, Ministeriu Negosius Estranjeirus no Koperasaun, Ministeriu Financas, Ministeriu Justica no Ministeriu Politika Enerjetika no Minerais.

Direitor Executivo LABEH, Julio Gil da Silva Guterres aprecia tebes disponibilidade Sua Exelensia Inspektur Jeral da Republika nian atu atende relatoriu LABEH nian no husu atu imediatamente halo inspeksaun urjente ba Ministeriu ne’en (6) mensiona iha leten.

Durante enkontro, Sr. Francisco de Carvalho, hateten katak Gabinete Inspeksaun Jeral da Republika sei estuda relatoriu servisu LABEH nian molok hala’o asaun ruma hanesan inspeksaun ministerial.

Sr. Inspektur Jeral mos kontinua fo korajen no apoiu moral ba LABEH atu halo servisu ho diak liu tan tamba kombate korupsaun nu’udar luta kolektivu parte hotu nian.

Liu husi Direitor Executivu Julio Gil da Silva Guterres, LABEH oficialmente hakarak bolu liu atensaun ba deputados hotu iha Parlamentu Nasional atu fortifika instituisaun estado sira ne’ebe hari ona ho misaun atu promove transparencia no akuntabilidade liu husi kombate korupsaun hanesan Komisaun Anti Korupsaun (KAK) hodi bele forte liu tan no iha atu halo fiskalizasaun ba orsamentu estado no iha nehan atu tata koruptor sira ne’ebe la kontribui ba prosesu hametin boa governasaun iha durante ejekusaun OJE 2013.

Tuir Gil da Silva katak dalan legal ida ne’ebe PN tenki foti hanesan komitmentu atu hametin KAK ne’ebe hari tinan tolu ona (Febreiru 2010 – Febreiru 2013) maske sidauk hatudu servisu ne’ebe signifikante maka liu husi aprovasaun esbosu lei korupsaun ne’ebe iha ona meja parlamentar.

“Timor Leste nia komitmentu atu hamosu grupo kontra korupsaun ne’e barak loz ona, ita hahu ho Inspektur Jeral de Republika, Provedoriados Direitos Humanos e Justica (PDHJ), Forum Nasional Kontra Korupsaun iha (hari iha Delta Nova 24 Maiu 2010), Grupo Parlamentar ba Anti Korupsaun (GOPAC),  Ratifika Konvensaun Nasoens Unidade Kontra Korupsaun (UNCAC) iha loron 27 Marcu 2009 no Establesementu KAK iha Febreiru 2010, buat sira ne’e hotu sei la vale bainhira Lei Anti Korupsaun ida la hetan importansia husi Parlamentu Nasional” Gil da Silva hateten.

Tuir LABEH katak, pareser oin oin husi sociedade civil hato’o ona ba PN, maibe seidauk hetan importansia husi meja parlamentu nasional, tan ne’e LABEH eziji atu iha loron hirak tuir mai PN liu liu komisaun C asuntu anti korupsaun nian atu fasilita hikas debate nakloke ida ho sociedade civil ou plenaria parlementar ida atu halo diskusaun ida klean ba projetu esbosu lei ne’ebe kompostu ho kapitulos 4 no artigu 29 ne’ebe iha ona meja PN.

“Deputados sira presiza estuda no halo esplikasaun halo didiak tamba tuir projeito lei ne’e fo esplikasaun klean kona ba tipos de krime iha Corrupção ne’ebe projeitu ne’e iha krimi rua mak la hakerek iha  Código Penal hanesan Tipos krimi “o enriquecimento ilícito” (art. 5. do projecto – exigencia do art. 20 da UNCAC)  no  “a fraude na construção (art. 7. do projecto)” Gil hateten.

Direitor Executivo ne’e mos husu atu Parlamentu hadia mos artigu sira hanesan “penas aplicáveis a pessoas colectivas” (artigo 4. Do projeitu) hodi deskrebe klaru katak kuandu kompania halo aktu krimi korrupsaun, estado liu husi Ministeriu Publiku sei deklara kompania ne’e bankrut ou buat ida ita bolu “Pailit” no estado bele rekolha ou foti tomak kompania nia asset. Nune;e mos iha artigu  7 konaba “fraude na construção”:  artigo ida ne’e ladun klaru ou jeral liu, tenki esplika konaba konaba tipu de frauda ne’ebe mak sei prejudika kualidade projeitu.  Remata