LABEH Loke Diploma Profesional Multimedia Jurnalismu

Dili, 10 – Abril 2013, Lalenok Ba Ema Hotu (LABEH) hafoin simu tiha sertifikado akreditasaun husi Governu hodi loke Eskola Vokasional ba Formasaun Professional, dadaun ne’e LABEH hahu tiha ona loke rejistrasaun ba foinsa’e Timor oan sira ne’ebe hakarak eskola diploma (D1) professional iha area multimedia jornalismu.

Direitor LABEH Vocational School, Rui Manuel da Silva haktuir LABEH ofisialmente simu sertifikadu akreditasaun husi Sekretario Estado Politika Formasaun Profesional (SEPFOPE) liu husi Diresaun Nasional Formasaun Profesional kona-ba padraun nasional ba rejistrasaun ba fornesedor formasaun professional ho humero rejistu 014 hafoin eskola vokasional LABEH nian hetan inagurasaun husi Eis Prezidente Republika, Dr. Jose Ramos Horta iha loron 24 Marcu 2009.

LABEH Vocational School oras ne’e daudaun fornese formasaun ba joventude sira iha area tolu mak hanesan kursus Administrasaun no finasas, Lian Ingles inklui mos formasaun iha Area Jornalismu”.

Eskola diploma (D1) professional iha area multimedia jornalismu ne’ebe LABEH inisia tinan ida ne’e sei kobre kursu konaba TV, Radio, Printing no Online.

Diploma Profesional ne’e kompletu ho fasilidade hanesan Internet Wireless, Libraria Jornalismu, ekipamentus Radio no TV, iha mos Studio Radio FM ne’ebe sei sai fatin pratika ba estudantes.

Rekursu ba hanorin, LABEH iha ona dosente kuaze nain ualo (8) ho nivel edukasaun S2 no S1 iha media komunikasaun  no iha experencia servisu iha media tinan barak, iha nivel nasional no mos internasional.

Tuir Direitor LABEH Vocational School, Rui Manuel da Silva katak ba etapa ida ne’e LABEH sei simu deit estudantes na’in 50, Prosesu rejistrasaun sei to’o iha loron 12 Abril 2013.

Estudante ne’ebe rejistu ona sei eskola durante tinan ida tomak ou ho semester rua molok graduasaun ou Wisuda ba diploma um (D1),  estudante sira sei estuda fulan ne’en (6) kada semester. REMATA