Karta aberta ba Parlamentu Nasional

Lalenok Ba Ema Hotu – LABEH hanesan ONG Anti Korupsaun, uluk liu hakarak hato’o parabens ba reprezentante povu iha Parlamentu Nasional (PN) ba aprovasaun Lei Orsamentu Jeral do Estado (OGE) 2013 ho unanimidade ne’ebe marka mos hanesan konverjénsia politika foun ida iha istoria independensia Timor Leste nian atu hamoris dinámika foun hodi harii demokrasia partisipativa ida hafoin restaura nasaun nia ukun rasik an iha primeiru dekade ne’e.

 

Husi:   Lalenok Ba Ema Hotu – LABEH
Julio Gil da Silva Guterres
Direitor Executivu 

Hato’o ba: Sua Ex. Prezidente Komisaun A, Sra. Carmelita Caetano Moniz
Parlementu Nasional

CC:
Prezidente Komisariu CAC, Sr. Aderito de Jesus
Provedor dos Direitos Humanos e Justica, Sr. Sebastiao Dias Ximenes
Inspektur Jeral da Republika, Sr. Francisco da Costa

Asuntu: Karta aberta ba Parlamentu Nasional konaba projeitu esbosu lei anti korupsaun


“Saudasoens”
Lalenok Ba Ema Hotu – LABEH hanesan ONG Anti Korupsaun, uluk liu hakarak hato’o parabens ba reprezentante povu iha Parlamentu Nasional (PN) ba aprovasaun Lei Orsamentu Jeral do Estado (OGE) 2013 ho unanimidade ne’ebe marka mos hanesan konverjénsia politika foun ida iha istoria independensia Timor Leste nian atu hamoris dinámika foun hodi harii demokrasia partisipativa ida hafoin restaura nasaun nia ukun rasik an iha primeiru dekade ne’e.

LABEH ne’ebe mos hanesan membru ba International Budget Partnership hakarak fo hanoin hikas ita tomak katak  rezultado survey  mundial  konaba jestaun transparencia ba orsamentu estado ne’ebe hala’o husi Open Budget Survey ne’ebe iha tinan 2012 ne’e haturTimor Leste ho score 36 (sa’e pontu rua) kompara ho relatorio survey tinan rua liu ba Timor Leste hetan score 34 husi total score 100 ne;ebe involve nasaun 97 ho modelu jestaun transparencia diak liu iha mundo.

Liu husi karta ne’e, LABEH oficialmente hakarak bolu hikas atensaun ba Komisaun  A Parlementu Nasional ne’ebe trata asuntu konstitusionais, justica, administrasaun publika, poder lokais no anti korupsaun  nain atu agenda diskusan no aprova projeitu esbosu lei korupsaun ne’ebe iha ona meja parlamentar.

Objektivu fundamental husi karta ne’e mak atu fortifika instituisaun estado sira ne’ebe hari ona ho misaun atu promove transparencia no akuntabilidade liu husi kombate korupsaun hanesan Komisaun Anti Korupsaun (KAK) bele iha kbit legal forte liu tan atu monitoriza no investiga mal jestaun ba orsamentu estado no poder publiko sira.

Iha LABEH nia relatoriu annual tinan 2012 analiza no rekomenda  katak Timor Leste nia komitmentu  ba promove boa governasaun, transparancia no akuntabilidade metin tebes, komitmentu ne’e bele indika liu husi estableshementu  Gabinete Inspektur Jeral de Republika, Provedoriados Direitos Humanos e Justica (PDHJ), Forum Nasional Kontra Korupsaun iha (Delta Nova 24 Maiu 2010), Grupo Parlamentar ba Anti Korupsaun (GOPAC),  Ratifika Konvensaun Nasoens Unidade Kontra Korupsaun (UNCAC) iha loron 27 Marcu 2009 no establesementu KAK iha Febreiru 2010.

LABEH mos analiza katak, pareser oin oin husi sociedade civil hato’o ona ba Parlamentu Nasional, nune’e husu atensaun komisaun A atu fasilita hikas debate nakloke ida ho sociedade civil ou plenaria parlementar ida atu halo diskusaun ida klean ba projetu esbosu lei ne’ebe kompostu ho kapitulos 4 no artigu 29 ne’ebe iha ona meja PN.

Tuir LABEH, interpretasaun  profunda konaba  konteidu projeitu lei ne’e presiza hola fatin ne’ebe propriu iha plenaria parlamentu nasional no mos sociedade civil nia le’et tamba iha projetu lei ne’e la fo esplikasaun klean kona ba tipos de krime “o enriquecimento ilícito” (art. 5. do projecto – exigencia do art. 20 da UNCAC)  no  “a fraude na construção (art. 7. do projecto)” tamba tuir LABEH  krimi rua ne’e la hakerek iha  Código Penal RDTL nian.

Atu remata karta aberta ne’e, LABEH rekomenda mos atu Komisaun A hadia mos artigu sira hanesan “penas aplicáveis a pessoas colectivas” (artigo 4. do projeitu) hodi deskrebe klaru katak kuandu kompania halo aktu krimi korrupsaun, estado liu husi Ministeriu Publiku sei deklara kompania ne’e bankrut ou buat ida ita bolu “Pailit” no estado bele rekolha ou foti tomak kompania nia asset. Nune;e mos iha artigu  7 konaba “fraude na construção”:  artigo ida ne’e ladun klaru ou jeral liu, tenki esplika konaba konaba tipu de frauda ne’ebe mak sei prejudika kualidade projeitu. 

Mak ne’e deit ami nia karta aberta , LABEH agradece tebes Sua Ex. Prezidente Komisaun nia atensaun ba asuntu ne’e e Obrigado barak ba atendimentu.


Ho Respeitu,


Julio Gil da Silva Guterres
Direitor Executivu LABEH