Ohin Tribunal Distrital Dili Halo Julgamentu Ba Kazu Diretur LABEH

Tuir karta notifikasaun ne’ebé Diretur LABEH simu  foin lalais husi Tribunal Distrital Dili katak,  ohin  sei  iha julgamentu kontinuasaun ba akuzasaun Ministériu Públiku nian hasoru Diretur  LABEH  ne’ebé  prosesu  ne’e  tuir  lolos atu julga iha loron 25 fulan Maiu 2011 maibé tanba Ministériu Públiku la aprrezenta paradeiru testemuña sira nian mak julgamentu adia fali ba loron ohin,14-09-2011.

Hau nu’udar Diretur  Ezekutivu LABEH simu ona notifikasuan husi Tribunal  Distrital  Dili   ba julgamentu  kazu  ne’ebé  Ministériu Públiku akuza hau iha tinan kotuk. Iha  fulan  Dezembru  tinan   2010,  hau simu  notifikasaun husi Ministériu Públiku katak  hau halo krime hamutuk 7 ne’ebé tenke   hein ba prosesu julgamentu.  Iha  fulan Maiu hau simu primeiru notifikasaun husi Tribunal Distrital Dili  ne’ebé marka julgamentu  iha loron  4,11,18 no 25  fulan Maiu 2011. Infelizmente hau responde akuzasaun Ministériu Públiku  nian ne’ebé hau haree hanesan akuzasaun falsu laiha lejitimidade no lalos.

Iha loron 4, Maiu 2011, hau  ba Tribunal hodi responde akuzasaun 7 ne’ebé Ministériu Públiku  akuza hau kona-ba falsifikasaun dokumentus maibé Ministériu Públiku rasik hasai akuzasaun 5 husi akuzasaun 7 tanba laiha faktus kona- falsifikasaun   dokumentus. julgamentu  la bele kontinua tanba  Ministériu Públiku  falla aprezenta  paradeiru ninia testemuña sira  nian ba  iha Tribunal. Nune’e   Tribunall fo tempu   ba Ministériu Públiku  atu prepara an didiak hodi aprezenta paradeiru testemuña sira nian  para  testemuña sira bele marka prezensa iha Tribunall  iha loron  25 fulan Maiu 2011.

Realidade akontese Ministériu Públiku la responde karta  husi Tribunall hodi la hatudu  paradeiru ninia testemuña sira nune’e iha loron 25 fulan Maiu 2011 julgamentu la akontese. Maibé ohin loron hau kontente tanba Tribunal notifika ona mai hau katak  julgamentu sei hala’o iha  loron ohin (14/09/2011), oras  14.00 iha Tribunal Distrital  Dili. Signifika Ministériu Públiku aprezenta tiha ona paradeiru testemuña sira nian  ba

Tribunal maibé hau triste tebes tanba Ministériu Públiku  aprezenta paradeiru hamutuk ema nain 15   deit  ne’ebé tuir lolos  testemuña  ne’ebé  Ministériu Públiku aprezentra iha primeiru  akuzasaun  hamutuk 24. Ne’e hatudu katak Ministériu Públiku rasik hasai  tiha ona ninia testemuña sira ne’ebé uluk  aprezenta ba iha Tribunall.

Hau konsidera  ida ne’e hanesan drama polítika ida ne’ebé Ministériu Públiku tenta hodi hanaruk prosesu ne’e. Nu’udar  arguidu iha prosesu ida ne’e Lei fo fatin para hau bele hetan julgamentu ne’ebé lalais no kredibel no laiha intervensaun  polítika ruma. Maibé hau sente kazu ida ne’e nakonu  ho intervensaun polítika  husi Ministériu Públiku.

Hau prontu  atu kolabora ho justisa, pronu  kolabora ho Tribunal, prontu  kolabora ho prosesu  hot-hotu  ne’ebé  la’o  maibé  hau husu labele  adia tan hau nia julgamentu ida ne’e tanba adia dala tolu ona. Hau mos prontu  atu responde akuzasaun ne’ebé  Ministériu  Públiku akuza hau.