LABEH Louva Governu TL,Realiza Konferensia Rejionál EIT

DDSLalenok  Ba Ema  Hotu (LABEH)  louva  no kongratula Governu no Estadu Timor  Leste liu- liu   Ministra Finansas Sra. Emilia Pires  no mos Seretariu Estadu Rekursus Naturais  Sr. Alfredo Pires  ne’ebé organiza konferensia  rejionál  kona-ba Extractive Industry Transparency Initiative (EITI). Programa  Ida ne’ebé  primeira vez halo iha rejiaun Ázia. Signifika katak Timor Leste  hatudu  ninia  keberanian no marka istória bo’ot  ida iha Mundu  Internasionál.

Wainhira  ita  haree  buat  ne’ebé  Timor  Leste  hetan  iha prosesu EITI, Timor Leste sai nasaun  primeiru  iha Ázia   e  sai  nasaun terseiru  iha Mundu  tomak kona-ba jestaun Orsamentu Fundu  Petrolium.LABEH  kongratula  inisiativa  ida  ne’e,  kongratula kompenente hot- hotu ne’ebé  fo apoiu  maka’as  ba Timor Leste  hodi  bele organiza konferensia ida ne’e.  Konferensia  ida  ne’e  mos signifika buat di’ak ida ba ita nia rai tamba nasaun  hatnulu resin lima mak vizita ita nia rai  hodi  haree  saida mak Timor Leste halo ona prosesu  EITI  no prosesu  Orsamentu Fundu  Petrolium.

 

LABEH orgullu teb- tebes tamba iha konferensia ida ne’e lansa mos procurament potel.  signifika  katak potel  ne’e bé sei  fo informasaun  kona-ba projetu  estadu nian  ne’be  iha ligasaun ba ezekusaun orsamentu sei tau iha Internet hot-hotu bele asesu.  Ida  ne’e  hatudu  komitmentu governu nian hodi promove transparensia no akuntabilidade.

LABEH kontente ho evaluasaun  sira ne’e  no LABEH   kontente  ho  inisiativa Ministra Finansas  nian  ne’ebe  hatudu  buat  di’ak  ida  iha Timor   e  hatudu mos iha mundu. LABEH  mos haree katak iha organizasaun balun ne’ebe ladun satifas ho prosesu ne’ebé  la’o.  Maibé  LABEH kontinua nafatin husu ba organizasaun hot-hotu  atu  komprende  prosesu EITI  no  kompriende  mos prosesu hotu ne’ebé  Estadu Timor Leste halo tiha ona hodi bele hetan valor bo’ot ne’ebé   ohin loron ita iha. Komprende mos katak  Banku mundial,IMF, nasaun sira seluk ne’ebé suporta  ita hodi to’o iha baze ne’ebé ohin loron ita iha.

LABEH kontinua nafatin fo suporta máximu ba prosesu hot-hotu ne’ebé estadu halo liu-liu prosesu ne’ebé  Ministra  Finansas halo para ita bele marka loron importante ida ne’e.  Nu’udar  membru  Sosiedade Sivíl, ita kontinua nafatin fo apoiu ba Ministra Finansas no mos Estadu Timor Leste atu kontinua ho prosesu ne’e hodi bele la’o ho di’ak.

Ita haree katak EITI hanesan organizasaun mundu  nian  ne’ebé  fo oportunidade ba nasaun hot-hotu atu bele fo sai osan hira mak simu husi minarai no osan hira mak hasai. EITI hakarak  buat hotu kona-ba rekursus baturais liu-liu fundus  minarai  tenki fo benefisiu ba povu ki’ik no EITI hakarak transparente para orsamentu minarai nian labele habokur ema ida ka rua deit.   
Procurament ne’ebé loke dadaun iha internet mos sei fo oportunidade para imprezariu  sira ne’ebé hetan projetu, ita bele hatene imprezariu sira nia naran, hatene kona-ba sira nia projetu iha ne’ebé, hatene kona-ba osan hira mak imprezariu sira hetan, osan hira mak sira atu gasta,osan hira mak estadu selu tiha ona, osan hira mak seidauk selu e benefisiu ba ita nia povu ne’e oin sa.

Nu’udar ONG,LABEH kontinua nafatin monitor implementasaun projetu sira ne’ebé hala’o  liu husi Orsamentu Jeral  do Estadu ne’ebé barak liu mai husi minarai.  EITI  hanesan prosesu di’ak ida ba ita nia rai e mundu tomak mos louva ita nia  nasaun tanba  hanesan terseiru númeru iha mundu ne’ebé implementa prosesu refere.

Hanesan ONG anti korupsaun, haree katak proseu osan tama no sai ne’ebé ejize  husi organizasaun Internasionál  EITI, hatete klaru katak osan tama no sai iha ita nia nasaun  tuir ona kriteria Internasionál.Tamba ne’e ita hotu  sei tau matan liu ba implementasaun orsamentu ne’e hodi haree nia benefisiu ba povu.

Ita mos orgullu ho servisu ne’ebé  Ministra Finansas halo iha tinan 4 nia laran hodi organiza konferensia ne’ebé hetan partisipasaun husi nasaun barak hodi fo valor bo’ot ba rai  Timor tamba implementa prosesu EITI ho di’ak.