ATIVIDADE IMPORTANTE 2010-2011

TTTLABEH hetan vizita ofisial ba dala uluk husi Tranparency International (TI),Sr. Ran Leon hodi  realiza Roundtable Discussion kona-ba Servisu Transparency International  ne’ebé mundu tomak hatene sira nia servisu iha area luta kontra korupsaun no oinsa atu estabelese TI iha TL. Iha roundtable discussion ne’e involve ONG Nasionál, UNMIT, Media no akadémika sira hodi halo diskusaun hamutuk kona-ba estabelesimentu TI iha Timor Leste.

 

Ekipa LABEH akompaña reprezentante TI Mr. Ran Lion halo vizita ofisial ba iha Instituisaun relevante hodi hasoru malu ho Komisariu Comissão Anti Corrupção (CAC) Dr. Adérito de Jesus, Provedor Direitos Humanos e Justiça (PDHJ) Sebatião Dias Ximenes  no Prezidente Sub Komisaun C, assuntu ekonomia, finansas e anti korupsaun  Parlamentu Nasionál Cipriana Perreira hodi ko’alia kona-ba oinsa atu servisu hamutuk hodi  kombate korupsaun.
LABEH  mos halo monitorizasaun ba loron 100 atividade Comissão Anti Corrupção (CAC) hahu husi  Komisariu simu tomada  de posse husi Parlamentu Nasionál  no atende enkontru Públiku iha parte internal no eksternal, hanesan enkontru ho maluk Sosiedade Sivíl / ONG, Governu liu husi instituisaun relevante sira hodi fahe informasaun ba malu iha aspetu sira seluk ne’ebé iha ligasaun ho misaun no vizaun LABEH nian  iha area luta kontra korupsaun.

Ekipa LABEH kompostu husi Departementu 3  mak Departementu Transparensia no  akuntabilidade, Departementu seluk hanesan Departementu Advokasia, no Budget Monitoring halo monitorizasaun ba Distritus liu-liu iha Suku izoladu sira. Programa ne’e hanaran “Programa One District one Village” Programa One District One Village Initiative nu’udar programa kontinuasaun husi programa Kampaña Nasionál Luta kontra  Korupsaun. Programa ne’e muda tamba ejizensia husi povu sira atu haree to’o iha area rural sira, la’os iha nível  Distrital deit maibé tenki  to’o mos iha Suku ka aldeia sira. Programa One District One Village Initiative hanesan programa prioridade ida iha tinan 2010, nu’udar tinan Expansaun no Dezenvolvimentu ba Lalenok  Ba Ema Hotu (LABEH).

Programa ne’ebé LABEH realiza hodi halo  monitoring  ba  Suku  sira iha Distritu ida hodi identifika saida los mak  sai hanesan nesesidade báziku tuir povu nia ejizensia. Programa projetu pilotu ne’ebé LABEH realiza hatudu nia rezultadu  katak orsamentu do estadu ne’ebé aprova husi Parlamentu Nasionál ita haree katak maioria povu seidauk hetan nia benefísiu. Problema fundamental ne’ebé povu iha baze hasoru mak hanesan, assistensia saúde, edukasuan, Be’e mo’os, eletrisidade, subsidu fos MTCI no seluk tan.  Programa inisiativu Distritu ida Suku ida hala’o ho objetivu mak hanesan  buka  hatene klean liutan preokupasaun husi komunidade iha Suku laran, Orsamentu ne’ebé hetan aprovasaun husi Parlamentu Nasionál mak Governu ezekuta povu iha área rural hetan nia benefísiu ka lae? Identifika prioridade saida los mak Suku ida-idak presiza.

LABEH konsidera partisipasaun ema hotu nian importante tebes hodi hato’o hanoin kona-ba mekanizmu saida mak presiza hadia atu responde ezijensia povu nia ne’ebé merese hetan foos ho folin baratu no oinsa sosa produto lokal, tanba ne’e LABEH hamosu inisiativa ida hodi organiza Programa ho naran “Konsultasaun Kona-ba Boa Governasaun no Transparensia iha prosesu Distribuisaun no Fa’an Fo’os sub-sidiu MTCI no Sosa Produtu lokal” ba nível akademikus, Sosiedade sivil/ONG, nível Distritu ne’ebé inklui autoridade lokal no ikus liu konsultasaun ho emprezariu sira.
Durante fulan 3 nia Laran LABEH remata realiza programa Konsultasaun no  ikus mai LABEH halo submisaun, no rekomendasaun ne’ebé sai hanesan rezultadu  final husi programa konsultasaun ne’e hodi intrega ba Ministériu Turismu  Comersiu no Industria (MTCI).
Ekipa LABEH  mos halo monitorizasaun kona-ba produtu lokal iha Suku Triloka Sub-Distritu Baucau, Distritu Lautem/Foeluru, no Distritu Oe-Cusse, komunidade sira iha Distritu tolu ne’e sujere ba Governu/MTCI bele tau matan ba produtu lokal ne’ebé sira iha ou  kria armajen iha fatin ne’ebé refere, maski Governu atu sosa produtu lokal tenki  tau iha fatin ne’ebé seguru hodi nune’e la bele estragus sasan sira ne’e.

Ekipa monitoring husi LABEH  mos  halo  monitorizasaun iha diresaun  Ministériu Agrikultura Florestas  e Pescas ( MAFP)   iha Distritu Lautem, ekipa monitoring LABEH liu husi programa One District & One Villages Initiative, ne’ebé halo monitorizasaun iha Ministériu  Agrikultura Distritu Lautem  konsege hasoru malu ho Diretur Ministériu Agrikultura Floresta  e  Peskas (MAFP), iha Distritu Lautem Sr. Almeida Frans  Xavier  hodi buka  hatene oinsa  kolaborasaun entre MTCI  ho  MAFP, liu husi programa Povu Kuda Governu Sosa“. Sr. Almeida Frans  Xavier informa katak, MAFP iha komitmentu atu servisu hamutuk ho komunidade  sira hodi  produz aihan iha rai laran  para  minimiza importasaun husi rai liur maibé MTCI la iha kolaborasaun ho sira liu-liu iha parte sosa produtu lokal atu oinsa sosa produtu ne’ebé komunidade ho MAFP produz tiha ona iha toneladas ba toneladas iha sira nia Distritu ne’ebé refere.

Diretur MAFP Distritu Lautem haktuir katak sira mos akompaña alokasaun Orsamentu Jerál do Estadu hamutuk USD.7 Millõens ne’ebé  aloka ba MTCI hodi sosa produtu lokal, maibé iha Distritu Lautem, durante ne’e  MTCI la ba sosa komunidade  sira nia produtu lokal. Nia haktuir tan kona-ba produsaun batar, liu husi Ministériu Agrikultura hetan kuaze 100 resin toneladas ne’ebé kobre deit  iha Sub-Distritu Lautem vila la inklui iha área sira seluk no sira submete deit hodi fo  dadus ba MTCI atu sosa produtu lokal ne’ebé komunidade  sira prepara  ona iha sira nia fatin. Komunidade husi Aldeia Nacroman Suku Foeluru, hatete katak iha momentu ne’eba, sira tenta husu ona ba MTCI kona-ba presu produtu lokal nian, kada kilo ida MTCI sei sosa ho folin to’o USD.15 Centavus USD. 20 Centavus no komunidade preokupa tebes ho presu ne’ebé MTCI deside, ho ida ne’e komunidade sira la hetan benefísiu  no lakon bo’ot.

Tuir Diretur ne’e katak, ONG sira mak sosa ho presu USD. 50 Centavus  kada kilo no komunidade sira bele hetan lukru. Tuir dadus produtu lokal ne’ebé Ministériu agrikultura Distritu refere rekoilla mak kuaze 290.000, 259 toneladas produsaun maka’as tebes maibé MTCI la hola desizaun hodi sosa komunidade sira nia produtu lokal katak durante ne’e MTCI nunka ba sosa produtu lokal iha Distritu Lautem.


Ekipa LABEH  mos halo monitorizasaun ba produtu lokal hanesan batar, kami’i  ne’ebé abandona iha Suku Triloka, Distritu Baucau ne’ebé tuir programa MTCI atu sosa maibé husik abandona hela iha fatin refere. Wainhira ekipa LABEH hasoru malu ho Diretur Kompania ACELDA, nia konfesa katak  governu  promete atu sosa produtu lokal tau iha nia  armajen maibé  MTCI  la utiliza armajen ne’e.


Rezultadus Monitorizasáun Iha Kompañia ACELDA Iha Distritu Baucau.

Kompañia ACELDA, hari armajen iha Suku Triloka Sub-Distritu Baucau, iha Indonesia nia tempu kedas liu-liu sira sosa produtu lokal mak hanesan kami‘i, batar,  no sira seluk tan, iha tinan  2007 liu husi Governu/MTCI  aluga armajen atu sosa produtu lokal hodi tau iha armajen laran, tamba tuir Diretur Kompañia ACELDA Sr. Ijinho da Costa Freitas hateten katak produtu lokal hanesan batar kuaze 300 toneladas no hare  iha 100 toneladas maibé, MTCI rai hela iha armajen quaze tinan ida ona, hahu iha fulan Abril tinan 2009.

Maski armajen ne’e Kompañia ACELDA nian maibé MTCI aluga hodi tau produtu lokal no xave metin hela, odamatan nia xave  sei iha hela MTCI nia liman ho razaun katak sira ne’ebé servisu iha Kompañia ne’e nia laran mak tau seguransa ba  armajen ne’e.
Wainhira ko’alia kona-ba kontratu atu aluga armajen ne’e, Diretur Kompañia salenta liu tan katak liu husi MTCI foin selu fulan tolu nia laran, MTCI seidáuk selu ita haree ba iha MTCI ne’ebé aluga armajen Kompañia ACELDA kada fulan ida MTCI sei selu ho valor orsamentu hamutuk USD. 500 Dollar Amerikanu.

Produtu lokal mak hanesan batar iha 300 toneladas ne’ebé mak sei iha armajen laran, liu husi MTCI halo ona distribusaun kada 50 toneladas ba misaun Foeluru, ho objetivu atu ajuda misaun ne’ebé refere tamba iha misaun Foeluru iha inisiativa haki’iak animal barak, mak hanesan Fahi, Manu no  sira seluk tan.

Maibé batar balun sei tau  hela iha armajen ACELDA nia laran hamutuk 250 toneladas, no  tuir ekipa monitorizsaun iha Terenu haree katak durante MTCI komesa sosa produtu lokal iha Suku Triloka sein iha koordenasaun ho autoridade lokal sira iha fatin ne’ebé refere.
Tamba kondisaun armajen ladun favoravel atu tau produtu lokal iha laran, maibé ekipa tenta haree kondisaun batar, no hare sai dodok hotu ona.

LABEH,liu husi Departementu Advocacy konsege hari radio LABEH FM 91.2 Mgz ne’ebé hetan inagura husi Prezidente da Repúblika Dr.José Ramos Horta iha loron Aniversáriu LABEH ba dala VII iha loron 25-08-2010. Objetivu hari radio LABEH atu oferese informasaun kona-ba issu korupsaun iha rai laran ba Comunidade sira ne’ebé hela iha Capital Dili inklui mos Comunidade sira ne’ebé hela iha Distritus ne’ebé distánsia  besik Dili.

LABEH hanesan ONG Nasionál anti-korupsaun iha Timor Leste ne’ebé nu’udar nasaun kontaktu husi Transparensia Internasionál (TI) Partisipa mos iha Annual membership Meeting Transparency Internasionál iha Bangkok, Thailand hodi aprezenta kona-ba kna’ar Lalenok Ba Ema Hotu (LABEH) durante tinan VII   iha  area luta kontra korupsaun, reprezenta Sosiedade sivíl hodi Partisipa mos iha International Anti-Coruption Conference iha Bangkok, Thailand.

LABEH hanesan reprezentante  organizasaun Transparency International (TI) no International Budget Partnership (IBP) ne’ebé halo mos lansamentu ba relatóriu open Budget Survey Index 2010 ba nasaun 94 inklui Timor Leste. Iha nível ASEAN nia iha loron 11 Novembru 2010 iha Cambodia halo mos lansamentu ba relatóriu IBP. Husi survey ne’e hatudu katak Estadu Timor Leste hato’o informasaun ba Públiku kona-ba dokumentus orsamentu estadu nian menus liu. Survey  husi IBP nian ba nasaun 94, Timor Leste monu ba ranking / skor 34 signifika katak Timor Leste iha Nasaun Indonesia, Malaysia, Filipina no Thailand nia okos. LABEH mos hato’o informasaun kona-ba Transparency International (TI) ne’ebé lansa mos relatóriu Corruption Perception Index (CPI)  iha Berlin, Jerman iha loron 26 Outubro 2010 ba nasaun 178. Husi nasaun 178, Timor Leste tama nafatin iha pozisaun nu’udar nasaun ne’ebé iha risku korupsaun nia laran, Timor Leste monu iha skor 126 husi nasaun 178

LABEH inisiativu marça pasífiku iha Loron mundial anti Korupsaun ho objetivu  husu ba governu no Parlamentu Nasionál hodi kria lei Anti-Corupsaun iha Timor Leste, marça pasífiku ne’e hetan partisipasaun husi Fans Radio LABEH FM 91.2 MHz, estudante LABEH, Komunidade  no staff LABEH.
Program  ne’e hetan mos partisipasaun husi Komisairu Distritu, maluk sira husi media Nasionál, parseirus Sosiedade Sivíl, team work LABEH husi departementu hotu-hotu iha hirarkia organizasaun nian.
LABEH realiza  long march ba loron mundial anti korupsaun. Iha programa ne’e partisipantes sira lori spanduk ho hakerek oi-oin inklui kona-ba kazu korupsaun sira ne’ebé mak LABEH simu durante ne’e no mos lori kaixão ne’ebé hakerek AQUI JAZ KORUPSAUN. Programa ne’e diferente tebes ho tinan sira kotuk liu ba. Programa ne’e hala’o no hahu husi Edifisiu LABEH Kampung Baru Comoro kontinua ba Palacio Prezidente da Repúblika  Aitarak laran-Palacio do Governu-Tribunal Distrital Dili-CAC,Ministériu sira  no remata iha Edifísiu  LABEH.

Liu husi Departementu Edukasaun no Hasa’e Kapasidade, Lalenok Ba Ema Hotu (LABEH) iha loron 16 Novembru 2010 fo graduasaun ba estudantes ne’ebé kapasita sira nia an iha LABEH-VS iha area Jornalismu, Administrasaun no Lian Inglês ho total estudantes hamutuk ema nain 63.
Aleinde LABEH nu’udar ONG ne’ebé mak servisu iha area luta hasoru korupsaun, LABEH mos partisipa ba dezenvolvimentu nasaun liu husi fo formasaun ba Timor oan sira  ne’ebé mak hakark kapasita sira nia an iha area oi-oin ne’ebé mak LABEH-VS oferese hanesan : kursu Inglês, Jornalizmu, Administrasaun.

Kursu sira ne’e ho durasaun tempu ne’ebé  la hanesan. Iha Kursu Jornalizmu no kursu Administrasaun prosesu aprendijazen la’o durante fulan ne’en katak fulan tolu aprende iha aula  kona-ba teoria no hafoin fulan tolu ba hala’o estaziu ka hala’o pratika iha instituisaun relevantes. No iha kursu Lian Inglês, prosesu apredijazen iha durasaun fulan tolu no tinan ida ka  DI. Iha kursu Inglês LABEH-VS prepara programa espesial oi-oin ne’ebé mak obriga estudantes sira tenki tuir molok to’o ba loron graduasaun. Programa sira ne’e mak hanesan LABEH Reading day programme, LABEH Speaking Tour Programme, Talent Night Presentation no peograma extra-ordináriu.

LABEH hahu prepara atividade liu husi halo planu stratéjiku ba tinan 5 no fo treinamentu ba staff LABEH atu bele dezenvolve rekursus humanus ne’ebé iha hodi bele servisu  tuir  programa ne’ebé trasa nune’e bele atinji objetivu LABEH nian. Iha treinamentu ba staff sira hetan suporta mos husi Transparensia Internasaional SR.  Ran leon ne’ebé  hala’o  nia vizita ba dala 2 iha LABEH   no mos maluk fasilitador  husi  Forum Tau Matan (FTM) Sr. João Pequeno.

LABEH kontinua halo monitorizasaun ba servisu CAC nian durante tinan ida hodi haree planu  saida mak instituisaun ne’e  trasa, atividade no servisu saida mak hala’o ona iha tinan ida nia laran atu bele fo konfiansa ba povu ki’ak no mukit sira ne’ebé LABEH ba hasoru hodi halo sosializasaun  iha tinan 2008 hodi  estabelese CAC iha nasaun Timor Leste no rezultadu husi monitorizasaun ne’e mak  LABEH realiza Workshop  ho entidade  relevante  inklui ONG Nasionál  sira  hodi intrega relatóriu final ba iha CAC.

LABEH realiza  sorumutu ho membru  Governu, membru Parlamentu Nasionál, husi komisaun C, assuntu ekonomia, finansas no anti korupsaun, UNMIT, Embaxadora  Amerika, ONG Nasionál, igreja no akadémika sira hodi  diskuti hamutuk  kona-ba esbosu  lei anti korupsaun. Iha diskusaun ne’e sujere ba Parlamentu Nasionál atu hadia artigu balun ne’ebé la kondiz ho povu nia moris molok hetan aprovasaun no hetan  promulgasaun husi prezidente da repúblika.

LABEH hetan vizita husi  transparency  International (TI)  Sr. Ran Leon ho nia ekipa  ba dala  III   hodi  halo survey ba  servisu LABEH iha area luta kontra korupsaun, promove boa governasaun no transparensia. LABEH  hola parte hanesan National Contact  TI nian. Iha oportunidade ne’e,   hasoru malu  ho Donor  sira hodi informa mos sira nia servisu ho LABEH nu’udar National contact iha TL. Donor  sira ne’bé TI hasoru iha vizita ba dala III ne’e mak Irish Aid, Finand Government, The asian the Fundation. Entretantu TI mos ajuda LABEH hodi partisipa  enkontru iha Bankok  hodi ko’alia kona-ba assuntu  transparensia no oin sa promove bo’a governasaun no mos partisipa regional enkontru iha Malaysia hodi ko’alia kona-ba assuntu korupsaun.

Ekipa LABEH kontinua halo monitorizasaun ba iha Suku sira no konsege tama iha Suku Estadu Distritu Ermera nian hodi  identifika problema balun ne’ebé komunidade sira infrenta.  Problema ne’ebé sai   preokupasaun bo’ot ba komunidade sira mak iha areas Infra-Estruturas báziku maka hanesan Saúde, Edukasaun, Estrada, Be’e Mós, Eletrisidade, no menus imfermeira sira iha postu saúde  no fasilidade ladun kompletu maski iha aimoruk. Komunidade sira iha eskola ida iha Aldeia Railakan  maka labarik sira hetan asesu maibé labarik sira dader ba eskola tenki  lori ho be’e husi uma tamba iha ne’eba  be’e la iha kona-ba merenda eskolar ne’ebé  oferese  ba estudante sira ha’an, presiza lori ho be’e maka hodi tein para  estudante sira han. Estrada mós a’at ba bei-beik, estrada  ba komunidade sira mos a’at,  laiha eletrisidade to’o iha Aldeia no komunidade hein nafatin Governu nia promesas.

LABEH- VS kontinua  fo formasaun ba foin sa’e sira  ho funsionárius husi Instituisaun Govermental ho naun governmental ne’ebé hakarak atu hasa’e kapasidade sira nian iha area Administrasun, Jornalizmu ho inglês. Estudantes husi kursu  area tolu ne’e konsege remata  sira nia programa hanesan: kursu ingles hala’o program hanesan, teoria iha aula, study group, reading day, speaking tour, ezame writing, reading, no listening,  talent night no ezame final, kursu Administasaun hala’o programa hanesan simu teoria iha aula, pratika komputador iha Dili Institute Technology (DIT) durante fulan 3 no  kompleta sira nia kursu liu husi hala’o estaziu durante fulan 3 iha Instituisaun Govermental  no Instituisaun naun Govermental no kursu jornalizmu hala’o programa durante fulan 3 simu teoria iha aula no fulan 3 hala’o estaziu iha Instituisaun Media Nasional sira.Wainhira kompleta ona prosesu sira refere mak foin bele hetan graduasaun hanesan prosesu ikus iha aprendijazen.