Intervista Esklusivu; Dezafiu Lori Forsa Ba LABEH

tttMaski hasoru dezafiu  oi-oin iha tinan VIII,  la’os atu halakon spíritu nasionalizmu   hodi luta kontra korupsaun iha nasaun doben Timor  Leste.  Organizasaun Naun Govermental (ONG) Lalenok Ba Ema Hotu (LABEH)    haree  dezafiu sira ne’e hanesan   forsa bo’ot   ba LABEH atu kontinua hamrik metin  hodi luta hasoru korupsaun. Ne’e mak  lia fuan simples husi  Diretur Ezekutivu LABEH Christopher  Henry  Samson  hodi  fo  motivasaun   ba LABEH atu brani  no metin nafatin iha misaun no vizaun LABEH nian. Tuir mai  ita akompaña hamutuk intervista esklusivu husi Jornalista  LABEH (JL) ho  Diretur LABEH (DL).

JL: Tama ona tinan VIII,  saida mak LABEH  kontribui  ona ba dezenvolvimentu nasaun Timor Leste liu-liu iha area kombate korupsaun?
DL: LABEH iha tinan VIII  nia laran  halo ona kontribuisaun maka’as ba dezenvolvimentu nasaun nian.  La’os LABEH mak  haree servisu sira ne’e hodi ko’alia maibé povu tomak ne’ebé sai benefisiáriu husi  atividade LABEH nian mak sai sasin ba atividade sira ne’ebé LABEH halo iha tinan VIII nia laran. LABEH nia atividade la’os iha Dili deit maibé ninia programa to’o iha Distritu 12.

JL:  Obstáklu saida mak LABEH hasoru durante ne’e?

DL:  LABEH  nu’udar  organizasaun  orgániku sempre hasoru susesu no dezafius hodi kontinua nafatin nia servisu. Dezafiu ne’ebé LABEH hasoru mak  Rekursus  Humanus   ladun  adekuadu hodi  implementa  programa ne’ebé trasa tiha ona no mos rekursu finanseiru   ladun  iha  atu implementa  programa. LABEH  iha asset hanesan, komputador, internet, kareta, motor  no propriodade sira seluk ne’ebé bele fo suporta ba servisu LABEH nian maibé LABEH mos sei falta fasilidade ne’ebé sai hanesan dezafiu bo’ot. Dalaruma rezolve tiha ida, seluk mosu  fali maibé  organizasaun nia servisu kontinua  la’o nafatin  hodi kontribui ba nasaun.

JL:  Oin sa kolaborasaun  entre LABEH  ho Instituisaun sira seluk?
DL:  Kna’ar importante nu’udar Diretur LABEH  mak tenki mantein relasaun servisu entre LABEH ho ONG  sira seluk,Instituisaun Estadu liu-liu Instituisaun sira  ne’ebé iha relasaun ho  misaun no vizaun LABEH  nian. Iha tinan VIII  nia laran LABEH konsege halo ona servisu maka’as hamutuk ho Sosiedade Sivíl, Estadu Timor Leste, Governu  no Instituisaun sira seluk. LABEH mos iha ona relasaun servisu ho organizasaun internasional hanesan International Budget Partnership (IBP),Transparency  International (TI) no mos  United Nations Convention Against Corruption (UNCAC). LABEH halo ona kolaborsaun maka’as ho mundu internasional ne’ebé   ninia vizaun iha area luta hasoru korupsaun no promove bo’a governasaun, transparensia no akuntabilidade.  LABEH konsege halo kolaborasaun ho intituisaun  sira ne’e hodi  promove budget transparency no iha rai laran mos, LABEH kontinua nafatin reforsa nia relasaun ho instituisaun estadu sira ne’ebé iha relasaun ho  LABEH nia servisu. LABEH partisipa atividade barak husi Estadu nian, ONG sira,  maibé LABEH kontinua nafatin iha ninia independensia atu hili dalan ne’ebé iha hanoin katak labele kompromi fila fali ba LABEH nia misaun no vizaun maibé LABEH tenki tau iha nia konsiênsia ho buat ne’ebé LABEH fiar katak Lalenok Ba Ema Hotu hanesan ONG anti koruspaun, la’os ONG humanitáriu. LABEH halo kolaborasaun tuir  nia vizaun  ho ONG  sira  ne’ebé iha vizaun hanesan ho LABEH. LABEH konsege ona hari nia vocal point iha Distritu 13  ne’ebé  durante ne’e halo servisu wainhira iha programa atu implementa iha Distiritu, no relasaun  ho media mos la’o di’ak.

JL:  Saida mak LABEH  prepara ba oin atu bele reforsa rekursus LABEH nian   hodi bele  servisu di’ak liu tan?
DL : LABEH hakerek ona ninia planu estratejia ba tinan 5 hodi haree planu refere atu implementa programa 4 ne’ebé importante tanba haree kona-ba rekursu LABEH nian rasik, haree mos  katak ita labele muda buat hotu iha tinan 5 nia laran. Haree kona-ba dezafiu sira ne’ebé LABEH hasoru hanesan, dezafiu finanseiru, Rekursus Humanus, fasilidade. Iha tinan 5 nia laran LABEH sei foka liu ba atividade 4 mak hanesan reforsa partisipasaun povu nian iha luta hasoru korupsaun, produz mos joventude sira ne’ebé hakarak hasae kapasidade iha area  administrasaun, jornalizmu no inglês,aumenta kapasidade staff sira nian, kontinua halo monitorizasaun ba programa governu nian ne’ebé implementa iha área rural sira.

JL:  Difikuldade saida mak LABEH hasoru wainhira hala’o sosializasaun iha baze?
DL : LABEH sempre hasoru dezafiu barak wainhira atu implementa programa ruma hanesan sosializasaun maibé dezafiu sira ne’e  ita tenki ultrapassa  tanba ita iha ambiente ida ne’ebé di’ak no kapás atu bele oferese informasaun ba povu kona-ba saida mak korupsaun,oinsa ita bele hamutuk promove bo’a governasaun,transparenmsia no akuntabilidade. Dezafiu sira ne’ebé LABEH hasoru iha implementasaun programas ne’ebé iha relasaun ho korupsaun hanesan dezafiu balun ema  mak hakarak halo duni ba sira nia an rasik  hodi preven programa labele la’o. Dezafiu  sira ne’e dala barak mai husi instituisaun sira ne’ebé iha podér atu bele implementa servisu tanba dalaruma sira hanoin katak ONG sira bele hadau sira nia simpatizia, sira nia servisu no dalaruma laiha  kolaborasaun no sira  hanoin katak sira deit mak iha podér no Sosiedade Sivíl laiha podér  no lahatene halo buat ruma. Ne’e mak dala ruma fo influensia ba  partisipantes iha prosesu sira. Ida mos ladun iha informasaun klaru ba povu atu bele komprende papél Sosiedade Sivíl nian  no papél  Estadu nian. Tanba papél sira ne’e tau hamutuk mak ita bele ba oin hodi fo informasaun ne’ebé klaru ba ita nia povu atu sira bele partisipa iha prosesu luta hasoru korupsaun.tanba informasaun sira ladun klaru ba ita nia povu, planu ne’ebé ladun di’ak mak halo dezafiu sir ane’e mosu no ema mak halo dezafiu sira ne’e maibé  presiza korajen hodi ultrapassa dezafiu sira ne’e para bele la’o  ba oin.

JL:  LABEH ejiste tinan VIII ona, oin sa ita bo’ot  nia haree kona-ba  indikasaun korupsaun, Koluzaun, Nepotizmu  ne’ebé  buras iha Governu laran?
DL: Iha tinan VIII nia laran  LABEH konsege haree mudansa bo’ot iha governu atual,mudansa sira mai ho formatu oi-oin,  formatu  primeiru mak governu hari komisaun funsaun públiku ne’ebé bele taka dalan ba rekrutamentu  ne’ebé  lajustu, servisu ne’ebé mak ladi’ak iha area bo’a governasaun   atu  implementa  Lei ne’ebé hakerek tiha ona hodi ajuda prosesu ho tranquilidade. Formatu segundu mak  estadu konsege hari  Comissão Anti Corrupção  (CAC) liu  husi  konsultasaun nasional ne’ebé LABEH rasik mak halo hodi hato’o  rekomendasaun ba governu no hetan responde pozitivamente ba ejizensia povu nian hodi hari CAC ne’ebé ohin loron halo nia servisu internalmente atu bele haree oin  sa bele kombate korupsaun  tuir dalan legal. Hau mos agradese tanba  foin primeira vez  rona Tribunal hakotu hodi kondena  administrador  Distritu Dili ba kadeia tinan tolu ho balun tanba involve iha assuntu korupsaun hodi hariku an. Signifika Tribunal hahu ona halo servisu di’ak  hodi fo asesu  justisa ba ema hotu liu-liu iha area kombate korupsaun. Ita mos haree Procurador Gerál da República (PGR)  mos hahu halo ona akuzasaun balun kona-ba assuntu korupsaun e mudansa sira ne’e mak LABEH rekuiñese atu fo hanoin ba ema hotu katak estadu la’os dukur kona-ba assuntu korupsaun maibé estadu neneik no ba  bebeik  atu haree   oin  sa responde ba assuntu sira ne’ebé iha ligasaun ho korupsaun.

JL:  Kazu  indikasaun korupsaun hira mak LABEH simu husi komunidade no  hira mak LABEH prosesa  ba Instituisaun kompetente?
DL: Wainhira  ita ko’alia kona-ba kazu ne’ebé LABEH intrega ba instituisaun  sira ne’ebé iha kompetensia atu trata kazu sira ne’e no iha tinan VIII nia laran LABEH simu kazu indikasaun korupsaun barak teb-tebes.  Kazu sira  balun hetan ona prosesu no kazu ne’ebé LABEH simu iha tinan VIII nia laran balun intrega ba PDHJ, balun intrega ba Vise Primeiru Ministru assuntu Administrativa iha tempu neba,balun intrega ba Inspector Jeral, balun intrega ba funsaun públiku atu haree kazu sira ne’e. LABEH fiar metin katak kazu sira ne’e balun hetan atensaun maka’as maibé data  fixu kona-ba kazu sira ne’e barak tebes iha tinan VIII nia laran. LABEH iha kazu balun ne’ebé seidauk intrega ba CAC tanba  kazu sira ne’e sei iha prosesu avaliasaun  wainhira ita avalia tiha katak nia  tama iha  kategoria korupsaun mak LABEH sei intrega ba CAC atu halo investigasaun.
Nu’udar Diretur LABEH, hau kontente teb-tebes tanba husi dezafiu sira ne’ebé  LABEH hasoru iha tinan VIII nia laran liu-liu dezafiu bo’ot liu mak  LABEH  tama iha tinan VIII. Tinan ne’ebé ita hanoin katak LABEH ultrapassa ona  tempu ne’ebé defísil  atu   labele iha hanoin  hodi  moris nafatin tanba ita iha problema  no dezafiu balun ne’ebé mak wainhira ita iha ona fasilidade hanesan komputador, problema seluk mosu tan, ita iha ona fatin  ba servisu maibé problema seluk mosu nafatin, ita kontinua  monu hamrik to’o tinan VIII. Maibé ho grasa Maromak nian LABEH bele ultrapassa dezafiu sira ne’e no sei ultrapassa tan dezafiu sira ne’ebé sei mosu iha futuru. Nu’udar Diretur LABEH, laiha buat ruma atu selebra iha loron aniversáriu LABEH nian maibé buat hotu ne’ebé ita hetan iha tinan VIII nia laran, fila fali ba staff sira nia dedikasaun servisu iha tinan VIII nia laran liu-liu iha tinan 2011. Staff sira fo duni kontribuisaun maka’as,  e hau nu’udar  Diretur  Ezekutivu ladun iha servisu barak atu halo no staff sira  mak  merese selebra sira nia dedikasaun. Staff sira merese hetan kongratula ba servisu ne’ebé sira halo iha tinan VIII nia laran. Hau kongratula sira nia dedikasaun, servisu no hau fo valor  bo’ot ba sira tanba liu husi sira nia kna’ar mak ohin loron LABEH sei morin no moris nafatin. Iha tinan VIII nia laran LABEH  konsege halo buat barak ne’ebé ita  tenki refleta kona-ba atividade barak ne’ebé LABEH halo hanesan LABEH hari nia radio FM.91.2MHZ ne’ebé  oferese informasaun ba ita nia populasaun sira, hari eskola vokasional ba foin sa’e sira no ema hotu ne’ebé hakarak hasa’e kapasidade iha area administrasaun, jornalizmu no inglês. LABEH konsege halo konsultasaun kona-ba esbosu Lei  Anti  Koprupsaun, LABEH konsege halo konsultasaun iha Distritu 13 kona-ba oinsa bele hari CAC, LABEH kontinua halo programa One District One Village iha Distritu 13, LABEH kontinua nafatin halo programa  Community Budget Monitoring System (CBMS), LABEHs kontinua halo programa luta hasoru korupsaun  iha Distritu 13, LABEH kontinua halo kolaborasaun  ho Transparency Internasional ho International Budget Partnership, LABEH kontinua halo kolaborasaun ho UNCAC  ne’ebé sai hanesan sumbrinha ba Sosiedade Sivíl iha mundu tomak, LABEH mos partisipa ona  iha konferensia internasional nian kona-ba korupsaun iha Bankok, Thailandia no partisipa enkontru regional iha Malaysia.buat sira ne’e hotu fo forsa ba LABEH katak tinan oin mai sei di’ak liu tan  tinan hirak ne’ebé ita liu tiha ona. LABEH agradese ba populasaun sira ne’ebé  fo suporta moral  ba servisu LABEH nian. Tinan VIII LABEH  nakonu ho susesu  no dezafius  so  Na’i  Maromak nia graça   mak LABEH kontinua halo nia kna’ar to’o ohin loron. Parabéns ba staff sira hotu no ema hotu ne’ebé fo suporta ba servisu LABEH nian.