TINAN VIII, LABEH SAI EXEMPLAR, UNIDADE, BRANI 25,Agostu 2003 - 25,Agostu 2011 MENSAJEM BISPO DILI BA LABEH: “IMI LA KONTRA GOVERNU, IMI IHA MISAUN NE’EBÉ IMPORTANTE BA RAI TIMOR”

 

 

deLABEH News, Hahu husi LABEH hamri’ik iha loron 25, Agostu 2003   ejiste  to’o ohin loron, LABEH hato’o agradese wa’in ba suportador sira  no família bo’ot LABEH ne’ebé fo ona kontribuisaun, tempu , matenek no pasiênsia tomak hodi nune’e LABEH bele la’o to’o  ohin loron tama ona ba tinan VIII. LABEH ejiste iha Timor Leste hanesan   ONG Nasional ne’ebé ko’alia maka’as kona- ba assuntu Korupsaun, Transparensia no Bo’a Governasaun.
Maski hasoru obstáklu no dezafiu oin-oin maibé LABEH fiar metin katak ho spíritu nasionalizmu ne’ebé ekipa LABEH iha sei kontinua metin nafatin iha nia misaun no vizaun  hodi luta kontra  Korupsaun, Promove bo’a  Governasaun, Transparensia no Akuntabilidade iha nasaun doben Timor Loro Sa’e.
Hanesan mensajem  ne’ebé LABEH simu wainhira hasoru malu ho Bispo Dioseze Dili, Dom. Alberto Ricardo, husu LABEH  tenki  sai Exemplar, Unidede , Brani atu hala’o servisu  ne’e  tanba LABEH nia misaun importante tebes ba rai Timor.

 

Dom. Alberto mos agradese ba servisu LABEH nian tanba bele halo servisu ida ne’ebé tuir lolos servisu Igreja nian no nia mos sei hato’o ba Bispo Dioseze Baucau no Maliana kona-ba servisu ne’ebé LABEH hala’o,

“Imi nia servisu ne’e lolos servisu Igreja nian maibé hau agradese ba imi tamba imi bele halo servisu  ida ne’e  liu-liu imi  bele identifika moris  ferik ho katuas  sira nian  iha área rural  e   hau sei ko’alia ho Bispo  nain rua, hanesan Bispo Baucau ho  Bispo Maliana kona-ba imi nia servisu ne’e  no hau mos sei ko’alia ba caritas Australia atu ajuda imi karik wainhira imi presiza,” dehan Amo Bispo.
Tamba ne’e Amo Bispo husu ba ekipa LABEH  atu halo servisu sira di’ak liu tan,liu-liu  Timor oan sira ne’ebé servisu iha NGO ida ne’e tenki  matenek labele beik.

Amo mos haktuir  katak, iha  ema balun ne'ebe hato'o informasaun ba nia katak LABEH mak ONG ida  ne’ebé  kontra governu maibé  wainhira Diretur LABEH ho ekipa hasoru malu ho Amo Bispo hodi  ko’alia kona-ba servisu LABEH nian iha rai Timor, Amo Bispo  konklui katak LABEH la kontra Governu maibé servisu ne’ebé LABEH hala’o importante tebes ba rai Timor.

“Ida seluk mak hau hakarak dehan uluk ema mai informa ba hau  katak ita bo’ot  sira  mak   NGO ida  kontra  Governu  maibé  hau hetan assesu ba ita bo’ot sira nia dokumentus ,Magazine,hau haree  ita bo’ot sira nia atensaun iha Media no Televizaun,hau foin konklui katak ita bo’ot sira la kontra Governu ida, maibé ita bo’ot sira iha  misaun   ne’ebé importante  ba Rai Timor,” salienta  Amo Bispo.

Amo Bispo hatutan katak, Ema sira ne’ebé dehan LABEH kontra Estadu ema sira ne’e la komprende tamba sira so uza pozisaun  sosial hodi influensa ema seluk hodi  labele haree servisu di’ak ne’ebé ita bo’ot sira halo ona durante nee,

“Se sira laiha pozisaun sosial sira mos hanesan ema beik,  Igreja sei suporta nafatin  ita bo’ot sira nia servisu  e hau husu ba imi ne’ebé servisu iha LABEH,tenki sai exemplu ba ema seluk. Imi tenki  sai Exemplar,Unidade no Brani”.

§    Igreja Katólika La Husik  Korupsaun  atu  Buras Iha TL

Reitor Instituição  Ciênsia Religiosa (ICR) Pe. Gabriel, SVD  iha dadalia ho jornalista LABEH Iha nia kna’ar fatin  ICR Lahane, reforsa  katak igreja katólika mos servisu maka’as oin sa atu bele dezenvolve povu ki’ik nia moris  no Amo Bispo   sira mos ko’alia maka’as  no husu  Nai Lulik sira atu hala’o kna’ar didi’ak hodi defende povu ki’ik nia direitu.

Nia haktuir, LABEH hanesan Sosiedade Sivíl ida ne’ebé durante  ne’e ko’alia maka’as kontra korupsaun  e buat  lubuk  ida ne’ebé  instituisaun  sira  seluk la buka atu haree hetan  maibé LABEH bele haree hetan katak iha parte ida ne’e iha indikasaun korupsaun. LABEH bele buka dalan ba instituisaun relevante sira  atu bele buka tuir iha  duni indikasaun korupsaun ka la’e tanba agora dadaun  indikasaun korupsaun mos buras iha Timor Leste.

“Simplesmente ita  bele haree hetan katak  Orsamentu Géral do Estado (OGE) ho  ninia montante a’as tebes,maibé nia mudansa iha área ida ne’e  ki’ik demais. Ita bele husu orsamentu sira ne’e  aloka bo’ot  maibé halai ba ne’ebé?  Orsamentu bo’ot maibé mudansa ema laharee hetan no implementasaun laharee hetan. Entaun espetativa entre  osan ne’ebé bo’ot, implementasaun ema laharee hetan. Ne’e  hatudu katak iha laran iha buat ruma mak  ema halo  la los   ka  mal jestaun,”dehan Padre.

 Nia haktuir, kualker instituisaun ne’ebé iha bo’a vontade, laran luak hakarak kontribui no kolabora atu kombate korupsaun inklui  Igreja Katólika mos la husik asuntu ne’e. Nia  rasik rona katak amo bispo sira mos la husik no  ko’alia nafatin hodi hatudu katak presiza halo kna’ar ho di’ak atu buat ne’ebé povu merese hetan, tenki hetan duni no labele halakon ka ko’a povu ki’ik nia direitu ne’ebé  bele dezenvolve povu ki’isk nia moris.

“Obstáklu ne’ebé Timor Leste  hasoru   atu  kombate korupsaun iha oin-oin mak  primeiru, prosedurmentu internal ne’ebé dala ruma karik ema la dun komprende didi’ak no seidauk halo ho di’ak. instituisaun ne’ebé bele ezekuta orsamentu ho di’ak, Segundu sistema de monitorizasaun, sistema ne’ebé ema halo relatóriu kada instituisaun no mos monitorizasaun dala ruma iha faillansu ne’e mak fo dalan ba korupsaun sei la’o nafatin, terseiru iha komportamentu, iha tendensia katak ema halo korupsaun  hamutuk ka  korupsi perjemaah, katak wainhira husu ida, seluk mos taka ibun hotu atu bele asegura  grupu ne’ebé ke halo indikasaun korupsaun,” katak Padre.

Hatan kona-ba Frakeza iha parte judisiariu ne’ebé defisil halo prosesu justisa ba kazu  indikasaun korupsaun, Padre hatete,   presiza atu hadia sistema  iha laran, Governu mos kria ona  Comissão Anti Corrução (CAC) ne’ebé la’o ona, no  povu iha spetativa bo’ot ba komisaun refere  atu bele kontribui didi’ak,

 “CAC  servisu maka’as ba kazu lubuk ida ona maibé se buat hot-hotu laiha prosesu, espero ke buat ne’e bele revela lalais hatudu katak los duni iha korupsaun no hola mos asaun  tuir lei ita nian atu ema bele hatene katak ema ne’ebé komete korupsaun bele hetan pena ruma husi hahalok korupsaun”.
 Padre hatutan katak,  laiha ema ida halo korupsaun mesak -mesak nia halo tanba iha ema ruma iha nia sorin     hanesan família, ema ruma ne’ebé ke  iha relasaun ho nia, kolega servisu hamutuk bele dudu ema atu tama instituisaun ida bele hola ba nia no mos ba ema hirak ne’ebé besik nia,

“Tanba ne’e hau husu atu ita iha sistema,   tantu governu, ONG,  Igreja, entidade hot -hotu hola parte hodi fo ita nia kontribuisaun atu korupsaun ne’e  bele kombate iha rai doben ida ne’e   atu nune’e povu ki’ak bele hetan sira  nia direitu, hetan sira nia prosperiodade, moris di’ak no ema hotu tenki kolabora,” Padre husu.

Iha oportunidade ne’e Padre mos hato’o   parabéns ba  Aniversáriu LABEH ba dala  VIII, no Padre enkoraja LABEH   tenki kontinua luta maski hasoru obstáklu  bo’ot iha dalan atu kombate korupsaun, maibé hanesan lalenok ba ema hotu  ne’e tenki la’o nafatin hodi sai duni  lalenok atu ema hot-hotu bele hatene  oin sa la’o iha dalan ne’ebé di’ak no los liu-liu atu kombate korupsaun.