Kazu Administrador Dili Hetan Sentensa, LABEH Kongratula TDD

CHLABEH News, Oganizasaun Naun  Govermental(ONG) Lalenok Ba Ema Hotu(LABEH) agradese no  kongratula Tribunal Distrital Dili ne’ebé fo ona sentensa ba Admistrador Distritu Dili Ruben Bras de Carvalho ne’ebé faktus iha Tribunal Distrital Dili hatudu katak nia halo pratika korupsaun. LABEH kongratula Tribunal Distrital Dili no Ministériu Públiku tanba bele komprova ninia akuzasaun hasoru arguidu Ruben Braz  no ho aten brani tribunal foti desizaun hasoru arguidu ne’ebé komete iha erru  korupsaun, LABEH agradese mos  ba arguidu tamba kolabora ho justisa hodi partisipa no rona akuzasaun husi Ministériu Públiku no simu desizaun tribunal Distrital Dili.

LABEH mos kongratula Ministériu Públiku tanba aprezenta faktus ne’ebé forti hodi tribunal bele uza halo julgamentu husi Ministériu Públiku ba arguidu Ruben Braz no faktus ne’ebé iha tribunal bele uza hodi halo julgamentu hasoru arguidu tanba ne’e  husu ba povu tomak atu kontinua nafatin fo suporta moral ba Prokurador Jeral, Tribunal no governu atu ho aten brani kontinua nafatin prosesa kazu korupsaun ne’ebé diskunfia mosu iha instituisaun estadu no governu.

Iha kazu Admistrador Distritu Dili Ruben Braz nian Ministériu Públiku komprova no aprejenta faktus ne’ebé tribunal uja hodi kondena no fo sentensa ba arguidu ne’ebé diskunfia halakon osan estadu nian komprova duni iha tribunal nune’e tribunal foti desizaun hasoru arguidu hodi fo sentensa ba nia atu tama kadeia tinan 3 1/2(tinan tolu ho balu) no obriga nia tenki selu fila-fali valor orsamentu $21.800 Mil ne’ebé diskunfia nia foti.

LABEH  haree katak kazu ida ne’e sidauk to’o nia finalidade tanba  arguidu ho ninia Defensor ou Advogadu bele halo rekursu hasoru desizaun tribunal nian tanba ne’e ita hein wainhira desizaun ikus mosu husi Tribunal Rekursu. Se Tribunal Rekursu  mantein desizaun Tribunal Distrital Dili nian ne’e signifika katak Admistrador Distritu Dili laiha ona oportunidade no nia tenki ba komarka durante tinan 3 ½ iha Becora no selu orsamentu ne’ebé nia gasta ba nia interese privadu tuir faktus ne’ebé aprezenta iha Tribunal.

Maibé wainhira Tribunal Rekursu fo livre ba nia katak desizaun ne’ebé Tribunal Distrittal Dili foti iha razaun tuir Lei atu labele kontinua ho desizaun ida ne’e, LABEH mos hakruk ba desizaun ikus ne’ebé sei mai husi Tribunal Rekursu tanba ne’e interese justisa iha rai ida ne’e, arguidu ho nia Defensor ou Advogadu sira atu hato’o rekursu tuir tempu ne’ebé Lei determina iha loron 15 nia laran hafoin tribunal fo desizaun ikus. Se  loron 15 nia laran mak sira la hato’o rekursu ruma ba desizaun ne’ebé Tribunal Distrital Dili foti signifika katak sira simu desizaun ida ne’e no arguidu tenki responsabiliza ba hahalok ne’ebé nia halo, se arguidu ho nia defensor ou advogadu sira halo rekursu ita tenki pasiensia hodi hein desizaun final husi Tribunal Rekursu tanba Tribunal Rekursu nia desizaun as liu desizaun Tribunal Distrital Dili nian.
Desizaun Tribunal Distrital Dili desizaun ida ne’ebé diak tanba mai husi julgamentu iha primeiru instansia ne’ebé tribunal fo no fiar katak kazu korupsaun agora hahu hetan ona ninia atensaun makaas iha tribunal no nasaun Timor-Leste. Tanba ne’e LABEH fo hanoin ba membru governu, Sekretariu Estadu no Funsionáriu Públiku sira atu kuidadu gasta orsamentu jeral do estadu no kuidadu atu labele halo hahalok korupsaun tanba hahalok korupsaun sedu ka tarde tenki hetan investigasaun.

Kazu Ruben Braz komete iha tinan 2001-2002 maibé  ohin loron hetan ona ninia prosesu justisa iha Tribunal Distrital Dili tanba ne’e inportante tebes ba ema hotu ne’ebé kaer poder orsamentu jeral estadu atu labele halo korupsaun tanba hahalok korupsaun sedu ka tarde tenki hetan reasaun husi parte judisiariu nian.

Iha tempu pasadu Ministériu Públiku akuza ema nar-naran deit no akuza ema arbiru deit laiha faktus ne’ebé bele komprova iha tribunal hanesan wainhira Ministériu  Públiku akuza membru Polisia Nasional Timor-Leste (PNTL) ne’ebé halo Operasaun Conjunta iha Distritu Ermera,  akuza sira hariku aan ho orsamentu jeral estadu no laiha faktus ne’ebé komprova katak PNTL ne’ebé fo sira nia vida tomak ba estabilidade iha tempu neba halo korupsaun, laiha faktus tribunal labele kondena membru PNTL sira tamba Ministériu Públiku la aprezenta faktus ne’ebé  forte ba tribunal no kazu seluk ne’ebé iha ligasaun ho korupsaun hanesan kazu abuzu de poder no hariku a’an ne’ebé diskunfia Vice Primeru Ministru Dr. José  Luis Guterres. Ministériu Públiku  akuza José  Luis Guterres katak wainhira asumi kargu nu’udar Ministru Negosiu Estranjeiru nia hariku a’an ho orsamentu jeral do estadu maibé Tribunal Distrital Dili haree laiha faktus ne’ebé komprova ba akuzasaun hasoru Dr. José  Luis no tribunal absolve kazu ne’e tanba laiha evidensia no faktus ne’ebé forti atu hasoru Vice Primeru Ministru Jose Luis Guterres. Kazu seluk kona-ba inportasaun fos husi kompania Timor Internasional Ministériu Públiku mos akuza kompania Timor Internasional ninia lideransa katak sira manipula taxa ne’ebé lolos selu ba estadu maibé Ministériu Públiku mos la aprezenta faktus  konkretas atu komprova akuzasaun Ministériu Públiku nian hasoru kompania Timor Internasional.

Kazu tolu ne’ebé mensiona iha leten signifika katak Ministériu Públiku tempu neba hakarak informa ba publiku katak kazu korupsaun ba ona tribunal maibé laiha evidensia ruma ne’ebé forte atu lori ema sira ne’e ba iha julgamentu ne’ebé seriu no bele hetan kondenasaun liu husi tribunal. Signifika katak Ministériu Públiku ho akuzasaun tolu (3) ne’ebé nia halo lakon hotu iha tribunal hanesan hakarak ema hotu hatene katak kazu hotu la’o iha tribunal maibé laiha evidensia ne’e mak sala labele lori kazu ne’ebe la iha faktus be tribunal tanba halo tribunal lakon tempu deit.
Iha parte seluk LABEH mos konsidera Deklarasun husi Primeru Ministru  Xanana Gusmão ne’ebé husu ba Komisaun Anti Korupsaun atu halo auditorial  ba  membru governu AMP. LABEH konsidera ne’e hanesan deklarasaun moral nu’udar  xefi estadu atu fo hanoin no sinal ba membru governu sira no ba povu tomak katak nu’udar Primeru Ministru ne’ebé ukun nasaun ida ne’e ho honestidade, kuidadu no responsabilidade bo’ot tanba informasaun ne’ebé espalla  iha povu nia leet katak membru governu sira hariku an. Primeru Ministru hakarak komprova lia fuan hirak ne’e liu husi auditorial ba nia membrus governu.

LABEH haree katak Primeru Ministru fo deklarasaun ne’e hanesan deklarasaun moral ida maibé deklarasaun ne’e laiha baze lei tanba lei kona-ba asset sidauk iha tanba ne’e tuir lolos governu ho parlamentu  prepara uluk lei asset tanba Timor-Leste sidauk iha lei Asset mundu internasional iha fatin ne’ebé deit tinan-tinan husu kona-ba lei asset nian para membru governu antes sira kaer ukun tenki deklara asset ne’ebé sira iha no depois remata kargu sira tenki halo fali auditoria hodi hatene asset saida mak sira iha no asset saida mak aumenta durante sira ukun.

Timor-Leste to’o ohin loron seidauk iha Lei kona-ba Asset no sosiedade sivíl hakilar maka’as kona-ba Lei asset maibé to’o ohin loron seidauk iha Lei asset. Governu AMP wainhira simu ninia kna’ar liu husi deklarasaun moral Primeru Ministru nian, Ministru no Sekretariu Estadu sira aprezenta sira nia riku  soin ba governu no governu intrega dokumentus asset no riku soi sira ne’e ba Tribunal Rekursu.  Públiku la hatene kona-ba membru governu sira nia asset, maibé laiha Lei ida ne’ebé hatete instituisaun ida ne’ebé mak iha responsabilidade atu haree kona-ba asset sira ne’e no laiha Lei ida kona-ba deklarasaun kona-ba asset.

Ohin loron ho deklarasaun moral Primeiru Ministru nian dehan Comissão Anti Corrupção (CAC) mak atu halo auditorial, LABEH husu atu labele kontra Lei no abuzu de poder tanba Lei kona-ba estabelesimentu CAC ko’alia kona-ba Patrimoniu Estadu nian no la koa’lia kona-ba ema nia  asset privadu ou membru governu sira nia asset no laiha Lei ida ne’ebé fo kna’ar ba CAC atu halo auditoria ba membru governu sira. CAC laos Institusaun  Auditorial  no CAC laiha kna’ar atu halo audit ba asset membru governu nian tanba ne’e CAC labele halo  abuju poder atu halo auditorial  ba membru governu, karik iha diploma ou  Lei espesial ruma ne’ebé  fo knaar auditorial  ba CAC ne’e  bele halo, se  lae  ne’e labele akontese iha Timor-Leste CAC presiza halo investigasaun kriminal no korupsaun hasoru membru governu wainhira sira komete sala la’os halo fali audtorial.

Iha tempu ne’ebé la’o dadauk ona LABEH sujere ba governu atu halo lalais Lei kona-ba deklarasaun ba Asset tanba Lei ida ne’e mak sei rekomenda instituisaun ida ne’ebé mak iha direitu atu halo investigasaun ou auditorial hasoru membru governu sira ou halo diploma ou dekretu Lei  espesial ida ho estratéjia foun hodi fo ba CAC atu halo auditorial ba membru governu, wainhira ida ne’e laiha LABEH kontinua nafatin informa ba governu atu labele halo abuzu de poder no CAC mos labele halo abuzu de poder tanba lei CAC la fo fatin atu halo auditorial pesoal ba membru governu sira.
Nu’udar Estadu   Direitu Demokrátiku  tenki   halo buat ruma bazeia ba Lei labele tuir deit ema nia konsiensia, moral, hanoin no hakarak tanba buat hotu tenki bazeia ba Lei haruka atu regula buat hotu.  Se wainhira  Lei laiha ita hakru’uk  deit ba desizaun moral ida ne’e signifika ita abuja Lei, konfiansa no poder ne’ebé aban bainrua sei sai hanesan barrometru ba polítiku nain sira atu ataka malu iha palku polítikus. Tanba ne’e atu  kontrola buat sira ne’e no atu inplementa deklarasaun husi Primeiru Ministru tenki inplementa tuir Lei ne’ebé iha. Tanba ne’e governu no Parlamentu  Nasional ne’ebé iha poder atu halo Lei bele halo Lei, Dekretu Lei ou diploma ida  kona-ba deklarasaun asset hodi fo forsa ba CAC atu halo auditorial pessoal ba asset privadu membru governu sira nian.   

Deklarasaun Primeiru Ministru nian nu’udar deklarasaun ida  justu tanba rumoris barak tebes kona-ba korupsaun. Maibé deklarasaun ne’e la bazeia ba Lei tanba Lei mak obriga CAC atu halo auditorial  pesoal ba asset ne’ebé membru governu sira iha. LABEH nu’udar NGO ne’ebé hakilar makaas kona-ba  korupsaun konkorda 100% deklarasaun Primeiru Ministru nian katak presiza  halo auditorial  ba membru governu sira maibé tenki halo tuir Lei la’os tuir ema ida-idak nia hanoin.