LABEH Husu Tribunal Rekursu Halo Julgamentu ba Dra.Ana Pessoa, Dr.Sebatião Dias, Dra. Lucia Lobato no Dr. Joao Câncio

deLABEH News,LABEH  hakarak  kongratula   Vice Primeiru Ministru Dr. José  Luis Guterres   ne’ebé  simu responsabilidade husi  akuzasaun Ministériu Públiku  nian   hodi ba hatan iha Tribunal Distrital Dili.  Dr. José  Luis Guterres  hatudu ninia kolaborasaun  ba justisa no maturidade polítika  nu’udar lideransa ida ne’ebé hakru’uk ba justisa no Lei   hodi  hatudu  katak ema hot-hotu  iha Lei nia okos.

LABEH  fiar metin katak  Tribunal sei halo justisa no hatudu lia los ba povu katak akuzasaun hasoru  Dr. José  Luis Guterres ne’e akuzasaun ne’ebé  laiha fundamentu maibé akuzasaun  polítika no vigansa polítika husi Procurador Géral da República (PGR). LABEH hein desizaun   husi Tribunal ba kazu ida ne’e  katak Dr.  José Luis Guterres nu’udar Vice Primeiru Ministru ba Governu AMP tenki livre husi akuzasaun ne’ebé laiha fundamentu.

Tanba ne’e LABEH  husu ba Parlamentu Nasionál atu halo prosesu lalais hodi hasai imunidade  ba atual Procuradora  Ana Maria  Pessoa  Pinto  no  Provedor Sebatião Dias, Ximenes  hodi ba hatan iha Tribunal Rekursu kona-ba  indikasaun korupsaun no abuju de podér  ne’ebé deskunfia sira halo.

LABEH husu  ba Parlamentu Nasionál atu  hasai imunidade ba  Ministra Justisa  Dra. Lucia Lobato no mos  Minstru Edukasaun João Câncio  Freitas  atu bele  responsabiliza ba akuzasaun ne’ebé sira hasoru tanba Dr. José Luis Guterres loke tiha ona dalan ba ema hotu katak ema hotu tenki  hakru’uk ba justisa.

Procuradora Ana Maria Pessoa Pinto tenki ba hatan iha Tribunal  tanba iha tinan 2006 – 2007 bainhira STAE halo preparasaun ba eleisaun  jeral ba Prezidente da Repúblika no Parlamentu Nasionál,  Sra. Ana Maria Pessoa Pinto  autoriza oportunidade ida ne’e hodi manipula  material balun hanesan sosa jeradores  ba STAE. Prosesu ne’e konsege  hetan faillansu iha folin. Loja sira  iha Dili fa’an jerador ho marka  no espesifikasaun  ne’ebé kada jerador ho folin $ 350,00 maibé Sra. Ana Pessoa aprova  liu husi Diretor Administrasaun e finansas  estatal ninan, Sr. Miguel Perreira  de Carvalho  ba  Silvia  Printing  hodi sosa jerador iha Indonezia ho folin $ 3, 500,00  kada jerador.

Ana Maria Pessoa Pinto  nu’udar Ministra   Estatal iha tempu ne’eba  la kuidadu Orsamentu Jeral do Estadu  hodi halo Estadu lakon osan bo’ot. Tanba karik sosa jerador iha Dili  ho folin $ 350,00  ba jerador 65, ne’e nia folin lolos  mak $ 22.750,00. Maibé tanba sira halo  makeup price  ba folin husi $ 350,00  to’o  $ 3.500,00  mak Estadu gasta ona orsamentu hamutuk $ 227.500,00. Osan ne’ebé gasta liu  folin  jerador iha Dili mak $ 204.750,00 .

Tanba ne’e LABEH husu ba Sra. Ana Pessoa  atu hatudu nia dignidade nu’udar PGR  ne’ebé hakarak promove justisa,  luta hasoru korupsaun atu ba hatan iha Tribunal kona-ba akuzasaun ida ne’e. Se wanhira akuzasaun  ida ne’e falsu, Tribunal bele husik Ana Pessoa  maibé  se wainhira akuzasaun ne’e los, signifika katak Ana Pessoa halo sala bo’ot  ba orsamentu  jeral do Estadu. Ida ne’e presiza   lalais atu para responde akuzasaun ida ne’e iha Tribunal no LABEH husu ba Ana Pessoa atu intrega fila fali  restu  orsamentu ne’ebé  mai husi  orsamentu $204.750,00 ba  kovre Estadu tanba ne’e orsamentu povo no Estadu nian.

LABEH   mos  husu ba Provedor dos Direitos  Humanos e Justiça  (PDHJ) Dr. Sebastião Dias Ximenes atu ba hatan iha Tribunal kona-ba orsamentu  ne’ebé  Banco Mundial fo ba  PDHJ. Orsamentu ne’e LABEH koalia dala barak ona kona-ba orsamentu $ 3000,00 ne’ebé lakon iha  Gabinete PDHJ tenki responsabiliza  ba orsamentu ne’e.

Sr. Sebastião  mos tenki ba responsabiliza iha Tribunal kona-ba Orsamentu Jeral do Estadu ne’ebé PDHJ aprova ba nia an rasik tamba  traduz dokumentus iha  gabinete PDHJ,  maibé Provedor  rasik mak traduz fila fali dokumentus ne’e  hodi simu Orsamentu Jeral do Estadu ba nia an rasik. Provedor   tenki responsabiliza kona-ba orsamentu  ne’ebé nia simu ba tradusaun tanba Parlamentu Nasionál nomeia Dr.  Sebastião  atu sai  Provedor la’os atu sai tradutor ba dokumentus hodi aprova orsamentu ba nia an rasik.

LABEH husu ba PDHJ  atu responsabiliza mos  ba nia Adjuntu Provedor, Silveiro Pinto ne’ebé autoriza ninia podér hodi aprova no uza Orsamentu Jeral do Estadu ba tuir kursu ne’ebé hahu tiha ona wainhira Silveiro Pinto sei membru ONG iha  Yayasan Hak.  Tanba programa ne’ebé nia hahu iha Yayasan Hak nia kontinua uza nia podér iha PDHJ aproveita  hodi kontinua programa ne’e.

LABEH husu PDHJ atu hamos ninia Instituisaun no brani ba hatan iha Tribunal kona-ba akuzasaun sira ne’e  para Instituisaun ne’ebé atu promove Boa Governasaun, tenki hatudu  Boa Governasaun husi sira nia Instituisaun rasik. PDHJ tenki ba hatan mos iha Tribunal  ba asuntu  abuju de podér,mal administrasaun no aprova orsamentu jeral do Estadu ba nia an rasik konaba viazen Sr. Provedor nian.

Ba Ministra Justisa Lusia Lobato, LABEH husu dala ida tan atu  ba hatan iha Tribunal kona-ba akuzasaun fa’an sasan  prizoneiru sira nian  iha Distritu Ermera inklui orsamentu ba guarda prizoneiru sira  lakon  deit  to’o agora, lahatene orsamentu nia paradeiru ne’e iha nebe?  to’o ohin loron seidauk iha  finalidade. Ministra Justisa mos  tenki ba hatan iha Tribunal kona-ba moru prizaun becora nian ne’ebé gasta Orsamentu Jeral do Estadu ho follin bo’ot teb-tebes.

LABEH husu ba Ministra Justisa atu ba hatan mos iha Tribunal kona-ba orsamentu kompensesaun ne’ebé Ministra rasik mak aprova  $ 22.000,00 ba ema ne’ebé okupa uma Estadu nian maibé  ema sira hela iha Brimob no seluk tan hetan deit  $ 2000,00 to’o $ 2,500.00  no ema balun hetan fali orsamentu bo’ot ,ne’e hanesan  diskriminasaun bo’ot ba komunidade Brimob.

LABEH husu mos ba Ministru  Edukasaun atu ba hatan iha Tribunal konaba orsamentu $104,850.00 ne’ebé mai hosi rubrica  fretes transportes hosi Diresaun Acreditasaun e Administrasaun tamba iha indikasaun  korupsaun no abuju de podér kona-ba fo kontractu ba kompania ida ho naran Moris ba Dame Transporte Unipessoal Lda. Tamba kompania ne’e  tama ho  kontratu orsamentu hamutuk $89, 700.00 ne’ebé uza aluga kareta  hodi fahe  meja no kadeira ba eskola sira   iha Distritus. Prosesu ne’e la tuir regras tanba orsamentu ne’e involve ema balun ne’ebé iha relasaun familia ho Ministru Edukasaun João Câncio rasik.

LABEH husu ba orgaun kompetente sira atu  direitamente halo kordenasaun ho  Instituisaun  sira refere para ema sira ne’e bele ba hatan iha Tribunal  hanesan  Dr. José Luis Guterres ne’ebé hatudu tiha ona ninia maturidade polítika no  lideransa,  hatudu ninia  kapasidade  hodi aprezenta an kolabora ho justisa. Tanba ne’e LABEH husu ba  Dra. Ana Pessoa, Dr. Sebastião Dias, Dra, Lusia Lobato no Dr. Joao Cancio  tenki aprezenta mos an iha Tribunal hodi responsabiliza ba akuzasaun ne’ebé ema akuza sira.  Se sira la sala LABEH  agradese, se sira sala, sira nia fatin mak Hotel Becora.(aty)