Observador Iha Segundu Kongresu CNRT Husu Estrutura Kumpre Sira Nia Juramentu

crissLABEH News, Diretur Ezekutivu LABEH,Dr.Christopher Henry Samson hetan konfiansa  sai nu’udar observador iha  segundu kongresu partidu CNRT nian ne’ebé hala’o iha loron 29-Abril 2011 to’o loron 02-Maiu 2011, observa katak  iha juramentu membrus eleitu CNRT nian  tau duni kona-ba promove transparensia no akuntabilidade e membrus hot-hotu  tenki  kombate korupsaun.

Nu’udar organizasaun ne’ebé koalia maka’as kona-ba asuntu ne’e, LABEH kontente  no husu ba estrutura tomak atu kumpre sira nia juramentu   kona-ba atu labele halo korupsaun, labele halo manipulasaun,labele halo abuju de podér,  labele halo buat a’at ne’ebé kontra prosesu  sira hodi hari nasaun  Timor Leste.

Nu’udar observador  sente kontente tebes  haree demokrasia ne’ebé la’o iha partidu CNRT nia laran no nota mos katak partisipasaun  ema nian iha prosesu  demokrasia no prosesu hala’o atividades programa  estatuta partidu CNRT nian la’o ho diak.

LABEH husu  ba partidu CNRT tenki kumpre  ninia juramentu ne’ebé halo iha segundu kongresu  no nu’udar observador ,Diretur LABEH fo parabéns ba  prezidente  CNRT  Xanana Gusmão, Sekretariu jéral CNRT Deonizio Babo inklui membrus estrutura   ne’ebé hili iha segundu kongresu no hetan konfiansa. Maibé LABEH husu sira tenki kumpre sira nia juramentu liu-liu  juramentu ne’ebé halo atu deklara sira nia riku soin   para sira labele iha  interese konflitu durante hala’o kna’ar.

Demokrasia  boa governasaun Transparensia, luta hasoru korupsaun tenki mai duni husi partidu, nu’udar observador ida,  observa katak kareta estadu  ladun barak  iha segundu kongresu partidu CNRT nian. maibé iha konvidadus  ne’ebé uza kareta estadu hodi ba tuir kongresu refere tanba sira  seidauk iha konsiensia  atu labele uza fasilidade estadu nian  hodi ba tuir programa partidu nian.

Nu’udar observador haree katak iha duni kareta estadu ida ka rua ne’ebé ema uza hodi partisipa iha kongresu refere maibé wainhira halo konfirmasaun  no ekipa monitorizasaun LABEH nian mos haree katak  ladun iha kareta estadu barak ne’ebé para iha kongresu partidu CNRT nian. Signifika katak  CNRT hahu ona implementa boa governasaun, hahu ona la uza fasilidade estadu nian ba interese partidu nian.

Tanba ne’e nu’udar observador ba prosesu ne’e husu ba  membrus partidu hot-hotu wainhira halo sira nia atividade partidu  labele uza  fasilidade estradu nian ba interese  partidu nian  no husu  ba lideransa  CNRT  atu labele autoriza militante sira hodi uza fasilidade estadu nian ba interese partidu tanba  ladun diak ba prosesu demokrasia no prosesu hari nasaun.
Nu’udar observador ida observa katak prosesu CNRT nian  la’o ho diak tanba militante CNRT nian nunka halo pawai iha kapital Dili laran  no iha disiplina maka’as, militante sira nunka uza sira nia bandeira hodi halo pawai hanesan partidu balun ne’ebé autoriza tempu kongresu ka tempu  konsolidasaun  hodi halo pawai iha kapital Dili. Lei la primite tanba seidauk tama iha tempu kampanha nian  no CNRT merese hetan parabéns katak sira kumpre lei. Iha prosesu kongresu ne’e mos wainhira remata sira hasai kedas  atributu sira ne’ebé sira tau iha fatin kongresu  no sira hatudu katak sira kumpre duni lei  no hatudu duni sira nia prinsipiu.

Nu’udar observador iha kongresu CNRT haree katak demokrasi la’o duni. Tanba ne’e husu mos ba partidu sira seluk  atu banati tuir prosesu ne’e atu nune’e labele iha konflitu. Prosesu ne’e hetan prezensa partidu Fretilin, PD, no partidu sira seluk, signifika katak iha ona maturidade polítika no konsiensia polítika no partisipasaun refere laharee ona ba kor partidu  maibé haree hanesan nasaun ida ne’ebé demokrátiku. 
Nu’udar observador hakarak kongratula partidu CNRT ne’ebé halo ninia segundu kongresu  tanba  sira kontrola a’an  durante iha prosesu ne’e.(aty)