Komponentes Politikus Hahu Ona Politiza Justisa



eeeeeeeeLABEH News, Lalenok Ba Ema Hotu (LABEH)  nu’udar ONG anti korupsaun, promove boa Governasaun , Transparensia , Akontabilidade  no Justisa observa   katak intervensaun balu la’o dadauk  ona iha prosesu  judisiariu Timor Leste, liu-liu komponentes politikus  balu hahu ona politiza justisa iha rai ida ne’e.

LABEH bolu atensaun ba Estadu Timor Leste, Parlamentu Nasional no Governu  atu respeitu  desizaun  no soberania Tribunal nian. LABEH bolu atensaun  maka’as ba elementus balu ne’ebé  fo sai iha media elektrónika  hodi hatete katak desizaun  Tribunal ilegal.

Diretur Ezekutivu LABEH Christopher Henry  Samson   hatete, LABEH kontra deklarasaun  ne’e tanba Tribunal hanesan orgaun  soberania  ida ne’ebé  laiha involvimentu polítika no  Tribunal fatin justisa laos fatin polítika tanba ne’e LABEH husu elementus hot-hotu hakru’uk ba desizaun Tribunal.

Nia   haktuir katak   Procurador Géral da República (PGR)  ne’ebé  lolos  tenki defende Autoridade Konstituisaun, defende Lei, defende Independensia no defende Estadu Demokratiku de Direitu   maibé  hahu halo ona sensasi  ba iha prosesu judisiariu.Tanba hato’o  relatóriu  hodi fo sai ema sira nia naran ne’ebé deskonfia komete iha krime   ba iha Parlamentu  Nasional.  

Diretur LABEH hatutan katak, so tribunal mak iha direitu atu kondena  ema laos RGR.   Knaar PGR nian  atu halo prosesu no akuzasaun ba ema ne’ebé  deskonfia komete iha krime maibé  tuir lei Tribunal mak kondena ema.

LABEH triste tebes ho relatóriu ne’ebé PGR halo ba iha Parlementu Nasional hodi fo sai  ema sira nia naran ne’ebé deskonfia  komete iha krime.Tanba ne’e LABEH bolu atensaun ba PGR  atu labele destroe ema nia karakter  tanba interese polítika ka interese seluk ne’ebé la fo vantajen ba povu Timor Leste.

LABEH husu ba PGR atu kontinua halo investigasaun hasoru kriminozu sira hotu maibé  labele diskredita ka distroe  ema nia naran  no  karakter, husik Tribunal mak halo desizaun no husik Tribunal mak julga kazu sira ne’ebé mak iha.

LABEH  husu ba povu Timor Leste ne’ebé hetan akuzasaun husi Ministeiru públiku tenki aten brani aprezenta an iha Tribunal tanba Tribunal laiha intervensaun polítika  maibé hare ba lei  hodi halo justisa. Husu mos ba povu Timor Leste  katak se ema ida kontra desizaun Tribunal nian, ema ne’e bele hato’o nia rekursu ba Tribunal Rekursu  labele dehan  lasimu desizaun  Tribunal nian no labele dehan katak desizaun Tribunal  ilegal. Ida ne’e salah bo’ot ida ne’ebé mai husi deklarasaun politikus   nain balu no mai husi intelektual balun iha rai ida ne’e.

LABEH kontra deklarasaun sira ne’ebé  fo sai ba públiku katak desizaun Tribunal ilegal , iha mekanizmu se wainhira ema la simu  desizaun Tribunal bele halo rekursu ba iha Tribunal Rekursu maibé labele hatete katak, Tribunal halo julgamentu ilegalmente.

LABEH husu atu labele iha intervensaun polítika, labele iha drama polítika iha justisa nia laran tanba ita hotu tenki hakru’uk ba prosesu judisiariu kolabora ho justisa, implementa justisa ho aten brani  atu  hasoru iha  Tribunal. Tanba so Tribunal mak bele foti desizaun hasoru se deit ne’ebé mak deskonfia halo krime ruma.

LABEH husu ba PGR  atu halo kna’ar tuir Konstituisaun haruka labele hafoer ema nia karakter, labele destroe ema nia dignidade antes to’o iha Tribunal. Se mak komete  krime ba iha Tribunal  hodi  hetan justisa no sira ne’ebé kaer justisa no kaer prosesu labele julga ema  antes Tribunal  foti desizaun. LABEH fiar metin ba Tribunal Katak Tribunal sei la monu ba manipulasaun  sira ne’ebé agora dadaun la’o.