LABEH públika Rezultadu Monitorizasaun Servisu CAC Iha Tinan Ida


labehLABEH News, Lalenok  Ba  Ema  Hotu (LABEH) iha loron  Tersa/08/03/2011públika  rezultadu monitorizasaun  ba servisu Comissão Anti Corrupção  (CAC) nian   iha  tinan  ida  nia  laran ba públiku tanba hahu  Governu  Timor  Leste  fo sai nia polítika atu kria no  estabelese CAC, LABEH kontinua nafatin involve  maka’as  iha  prosesu  Governu nian hot-hotu  atu  oin  sa  bele  hetan  partisipasaun  povu nian iha polítika Governu nian hodi kria CAC.
 LABEH nu’udar  ajente kontrolu sosial,  halo ona  monitorizasaun ba atividades  CAC  nian  no monitorizasaun  ne’ebé  LABEH  halo iha tinan ida nia laran, hatudu  buat  pozitivu balun hanesan CAC  konsege  nomeia adjuntu nain rua, halo rekrutamentu, sosa ekipamentus no prepara sira nia an  hodi  hahu  halo  servisu maibé iha mos assuntu negativu balun ne’ebé akontese  katak  CAC  la  konsege fo sai  informasaun klaru kona-ba sira nia servisu ba  públiku iha tinan ida nia laran.
 
Iha loron ne’ebé  komisariu CAC  simu posse iha  Parlamentu Nasional deklara katak  sei  fo sai informasaun ba públiku kona-ba lala’ok CAC  nian iha fulan tolu dala ida liu husi sorumutu ho Media sira, infelizmente la akontese. Signifika CAC  taka an ba Media no públiku hodi la fo informasaun klaru  kona-ba sira nia servisu no difikuldade.
 
Iha monitorizasaun LABEH observa katak, CAC  halo  enkontru barak tebes ho Prezidente  Repúblika, Governu ho ajensia  seluk  inklui  Procurador Geral da República  (PGR)  maibé  realidade ne’ebé  hatudu katak     CAC  hado’ok  an  husi  Sosiedade Sivil  ne’ebé  tuir  lolos  atu suporta sira nia ativiadades  no  sai  fontes  importante hodi kolabora iha sira nia servisu no CAC mos  la nakloke ba públiku durante tinan ida nia laran.
 
LABEH  haree  katak  iha  area  investigasaun CAC  la dun hatudu sinal pozitivu kona-ba kazu  hira mak hahu  halo ona investigasaun, nune’e mos  iha area kompanha luta hasoru korupsaun CAC halo kompetisaun ba sira nia logo, halo debate públiku  ba estudante sira maibé la hatudu rezultadu pozitivu  tanba partisipasaun estudante sira nian iha prosesu refere mínimu liu.
 
Durante tinan ida CAC  nia servisu    la halo  mudansa  uituan  ba rumoris ne’ebé ema hotu hasoru kona-ba  assuntu  korupsaun.  Rumoris sira kontinua maka’as  liu  tan maske CAC  iha, maibé  la  konsege  hatun  ekipa  ne’ebé  iha tiha ona atu kontrola fasilidade estadu nian ne’ebé  funsionariu  públiku sira  uza  arbiru  deit  iha tempu feriadu no tempu ne’ebé  laos oras  servisu.
 
LABEH  kontinua haree katak, laiha diferensia  ne’ebé  mosu durante  CAC halo ona  servisu   no laiha diferensia ne’ebé  mosu   wainhira atu  kria CAC no wainhira CAC seidauk  iha tanba situasaun  la’o  hanesan  bai-bain.  Ho ida ne’e mak   LABEH  konsentra hodi halo monitorizasaun ba  kna’ar  CAC nian  tuir lei haruka.
 
LABEH  mos  kontinua  rona  issu barak, simu kazu balun kona-ba indikasaun korupsaun iha Governu AMP nia laran maibé LABEH  dúvida tebes ho sistema ne’ebé CAC uza hodi luta hasoru korupsaun . Durante  ne’e  ema  barak kestiona katak tanba saida mak LABEH nonok liu? Tanba saida LABEH la koalia hanesan  tempu pasadu? Tanba saida LABEH  la halo hanesan uluk?  LABEH  responde  ba dúvida   sira ne’e katak CAC hari  tiha ona no  LABEH kontinua halo monitorizasaun  tuir  promesas  ne’ebé LABEH halo ba povu  Timor laran tomak atu halo monitorizasaun ba atividade CAC nian.
 
Tanba ne’e atu kumpre  povu  Timor Leste ne’ebé  partisipa no involve maka’as durante konsultasaun  nasional   iha tinan 2008  kona-ba  obsaun Governu nian  hodi kria CAC, LABEH la halo sira nia lia fuan monu ba rai  hodi konsentra iha tinan ida nia laran atu halo monitorizasaun  ba atividade  CAC nian ne’ebé ohin loron  LABEH  aprezenta  ba públiku para públiku  bele haree hodi  tetu  no  sente  katak  tinan  ida  liu  tiha ona CAC  la hatudu nia karakter lolos iha area  luta hasoru korupsaun.
 
Tuir  lei  CAC mos  iha poder atu kria  estratéjiku  nasional ida ne’ebé  bele  involve  ema hotu iha area luta hasoru korupsaun maibé to’o ohin loron seidauk  iha asaun konkreta ba asuntu refere. CAC  rasik  promete  katak  atu  luta hasoru korupsaun sei sai hanesan movimentu nasional maibé to’o ohin loron, públiku nunka haree movimentu nasional hodi luta hasoru korupsaun iha nasaun laran.
 
LABEH fiar metin katak atu luta hasoru korupsaun presiza ema hotu nia kontribuisaun no laos kna’ar  Estadu , Governu,  Parlamentu Nasional no Tribunal  nian mesak maibé involvimentu Partidus Politikus, Sosiedade Sivil, Igreja, ONG  no  estudante   hot-hotu iha  prosesu  luta  hasoru korupsaun   importante teb-tebes. Maibé iha tinan ida nia laran CAC la konsege halibur hanoin sira ne’e hodi  tetu oin sa bele luta hasoru korupsaun.
 
LABEH  bolu  atensaun  ba  CAC  katak durante LABEH halo konsultasaun nasional iha territóriu tomak povu iha espetasaun  bo’ot  teb-tebes  katak CAC sei bele halo servisu hodi reduz  korupsaun  maibé  tinan  ida  liu  tiha  ona no  mandatu  hela deit  tinan tolu, to’o ohin loron públiku seidauk hatene sistema,  mekanizmu  no métode saida mak CAC atu uza hodi luta hasoru korupsaun inklui  públiku mos seidauk hatene difikuldade saida mak CAC infrenta  durante ne’e  hodi  labele halo servisu máximu.
 
LABEH  kontinua  haree katak,  Orsamentu  Jeral  do  Estadu  ba  tinan ida ne’e  bo’ot  tebes  sa’e  to’o   U$1.306  bilioens     ne’ebé  Parlamentu  Nasional aprova tiha ona no hetan promulgasaun husi Prezidente  Repúblika  ne’e  presiza  tau  matan para ema balun ne’ebé hakarak hariku an, hakarak tau interese  privadu  no familia  mak  bo’ot  liu  interese  públiku labele gasta ka uza sala orsamentu  refere. Tanba  ne’e  CAC  presiza hahu   halo servisu hodi buka tuir orsamentu balun  ne’ebé  lakon dadaun ona no ninia implementasaun ne’e la’o oin sa.
 
LABEH preukupa tebes  tanba Timor Leste seidauk iha Tribunal de Contas ida ne’ebé sei tau  matan ba Orsamentu Jeral do Estadu maibé Timor Leste  iha ona CAC bele buka hatene  implementasaun orsamentu ne’e la’o tuir dalan ka iha ema balun ne’ebé halo korupsaun ba orsamentu povu  nian.
 
LABEH  hanoin katak  importante tebes ba Estadu Timor Leste atu hahu hanoin oin sa bele prepara Rekursus Humanus hodi  kria Tribunal de Contas no CAC mos tenki haka’as an halo servisu,  labele malirin  demais   tanba  ema manobra dor  sira  kontinua  na’ok  povu  nia  osan maibé  CAC  la bo’ok an hodi buka tuir implementasaun ba orsamentu refere.
 
Tanba ne’e LABEH aprezenta relatóriu ne’e ba povu tomak para povu bele fo sira nia hanoin kona-ba CAC nia servisu iha tinan ida nia laran.   LABEH espera katak CAC sei haree polítika Estadu nian  hodi  luta  hasoru  korupsaun  inklui  involvimentu  povu tomak nian iha prosesu kria CAC  tuir  lia fuan balun  ne’ebé  povu  hato’o   iha  prosesu  konsultasaun nune’e   CAC bele haree katak Instituisaun  ida ne’e hetan  fiar no lezitimisidade husi povu.
 
CAC tenki iha responsabilidade hodi labele halo fiar no konfiansa povu nian monu iha rai wainhira CAC la  kaer  koruptor  ida, la hasai  estratéjika luta hasoru korupsaun no la involve ema barak iha area kampanha, edukasaun  no  muda  mentalidade, hodi promove Boa Governasaun iha rai laran.
 
LABEH  espera  katak  hanoin  ne’ebé  povu  sira fo sai durante konsultasaun nasional sei sai hanesan lilin ida  ba CAC atu para  hatene katak   espetasaun  povu nian  bo’ot  tebes  iha area luta hasoru korupsaun. 
 
CAC tenki kaer metin fiar ne’ebé povu iha no kaer metin polítika Governu nian iha area luta hasoru korupsaun  no la bele husik  polítika  ida ne’e monu  iha rai tanba la konsege lori  koruptor ida ba iha PGR  hodi to’o iha Tribunal inklui la konsege halo edukasaun sívika ba povu atu bele komprende saida mak korupsaun hodi hado’ok an husi korupsaun no la konsege aprezenta ba públiku kona-ba estratéjiku nasional  luta hasoru korupsaun  liu-liu   la konsege  informa ba media  kada fulan  tolu dala  ida  para ema hotu bele iha assesu  ba informasaun CAC nian  tuir buat ne’ebé sira promete.
 
LABEH  haree  katak, polítika Estadu nian ne’ebé foti Dr. Adérito de Jesus sai  nu’udar komisariu bele monu  iha  rai  wainhira  CAC  ho  nia  ekipa tomak la hamri’ik hodi defende povu  nia  aspirasaun  iha luta  hasoru  korupsaun.  Tanba ne’e   mak  LABEH  fo sai  informasaun  ne’e ba  públiku  para bele haree saida mak CAC  halo ona no saida mak seidauk halo hodi ema hotu bele fo  suporta moral  para  CAC  bele  iha  korajen hodi  hamri’ik  iha  oin iha  prosesu luta hasoru korupsaun.