Tinan 1, CAC La Konsege Hamrik Iha Oin Hodi Luta Kontra Korupsaun

 

Tinan 1, CAC La  Konsege Hamrik  Iha  Oin  Hodi  Luta Kontra Korupsaun  

Lalenok  Ba  Ema edit5Hotu  (LABEH)  hato’o  parabéns  ba Dr. Adérito de Jesus ho nia Adjuntu nain rua  Dr. Manuel  Bucar  no  Dr. Jose  Antonio Neves ne’ebé kompleta ona sira nia  servisu tinan ida nu’udar prezidente no Adjuntu CAC.Iha pasadu Primeiru Ministru  Xanana Gusmão informa ba públiku katak foin primeira vez governu Aliansa Maioria Parlamentar (AMP)  iha nia komitmentu oin sa atu bele reduz risku korupsaun iha rai laran. Atu hametin komitmentu ne’e Governu sei kria Comissão Antí Corrupção  (CAC)   ne’ebé  sei halo estratéjiku nasional hodi hatudu mekanizmu diak liu  oin sa  luta hasoru korupsaun.Primeiru Ministru   mos  hatete  katak  governu ida  ne’e impenhadu  ona atu hamenus risku korupsaun liu husi CAC ne’ebé sei iha podér atu kombate korupsaun no  Primeiru Ministru   mos afirma katak  sei reforma administrativa ne’ebé  sei servisu hamutuk ho Sosiedade Sivil  hodi halo konsultasaun para oin sa bele kria CAC no  Governu  foti desizaun hodi intrega  podér tomak  ba ONG LABEH  hodi   halo konsultasaun nasional oin sa bele husu povu nia hanoin kona-ba inisiativa no polítika governu hodi kria CAC.

 

Hahu   fulan Jullu  to’o Agustu  2008 LABEH realiza konsultasaun nasional  ba Sosiedade Sivil sira iha Distritu tomak hodi husu sira nia opiniaun oin sa kria CAC. Rezultadu ne’ebé  hetan mak governu mantein ninia pozisaun  kria lei ne’ebé  aprova iha parlamentu nasional hodi fo tomada de posse ba  Dr. Adérito de Jesus hodi sai prezidente  CAC.  Iha  lei  ne’e  rasik  fo podér  bo’ot ba  CAC  atu  bele  kaer  suspeitu  tanba  halo  korupsaun, CAC bele halo konfiska dokumentus ka arkivus  no  bele  konfiska ema nia pasaporte   e  CAC  iha podér  atu  labele husik koruptor halai ba liur.  CAC mos bele halo investigasaun hasoru conta bancarias  ba se deit ne’ebé hetan akuzasaun ka deskonfia halo korupsaun, CAC mos iha podér atu halo monitorizasaun.  Rezultadu servisu CAC nian  iha tinan ida nia laran mak  konsege  halo  konferensia  nasional ba  loron mundial anti  korupsaun  iha fulan  Dezembru 2010   ne’ebé  hetan partisipasaun  husi Prezidente Repúblika, Primeiru Ministru, Parlamentu Nasional no entidade seluk inklui Sosiedade Sivil iha fulan dezembru 2010  liu ba inklui  fo tomada de paosse ba ninia funsionáriu sira.  Iha monitorizasaun LABEH  nian,  idenfika katak  atividades  ne’ebé  CAC halo barak liu iha informasaun   hodi   taka an  no  la fo informasaun  ba públiku kona-ba kazu hira mak CAC simu iha tinan ida nia laran.  CAC mos  lakohi   informa kona-ba númeru kazu nian   no kazu saida  deit  mak  deskonfia iha korupsaun  maibé  tuir informasaun  ne’ebé  LABEH  hetan husi CAC no fontes konfirmadu husi Procurador Geral da República (PGR)   katak CAC so hetan  deit kazu rua,  kazu   tolu  mai husi  Ministériu  Públiku  intrega  ba CAC  atu halo investigasaun  profundu.  Bele   hatete katak  CAC iha kazu lima iha tinan ida nia laran. Maibé kazu sira ne’e seidauk  halo  investigasaun profundu  no seidauk intrega fali ba Ministériu Públiku  atu bele prosesa ba julgamentu.  Infelizmente  CAC la konsege kaer koruptor  ida iha tinan ida nia laran, CAC la konsege lori koruptor  ida ba Tribunal durante tinan ida nia laran, CAC la konsege halo servisu  hodi ultrapassa  ema hotu nia hanoin kona-ba nia servisu  iha tinan ida nia laran, a’at  liu tan CAC la konsege prepara planu estratéjiku nasional  hodi luta hasoru korupsaun ida ne’ebé bele involve ema hotu nia luta iha area korupsaun, hanesan lia fuan ne’ebé komisáriu CAC  deklara iha tomada de posse  katak atu kombate  korupsaun tenki sai movimentu nasional  ne’ebé entidade husi parte hotu - hotu  hamutuk hodi luta hasoru korupsaun no  CAC mak hanesan Instituisaun  ida ne’ebé hamrik iha oin  atu kombate  korupsaun  maibé  presiza apoiu husi parte hotu- hotu  tenki hamutuk atu kombate korupsaun. Monitorizasaun  ne’ebé  LABEH   halo  katak,  CAC taka an demais ba públiku liu-liu  Media sira. Instituisaun CAC  tenki nakloke ba públiku atu públiku   bele hatene kona-ba sira nia servisu,  difikuladades,  hodi nune’e  povu  bele  fo suporta moral  maibé se CAC la nakloke  ba públiku hodi sadere deit ba polítiku governu nian, LABEH bele  hatutan  fali lia fuan   ne’ebé mak  povu  sira hatete  katak CAC  hanesan  kawan amankan kawan. LABEH ejiji  ba CAC atu halo servisu ne’ebé ultrapasa   povu nia hanoin hodi fo fiar ba povu katak CAC hamrik duni iha oin  hodi luta hasoru korupsaun maibé iha tinan ida nia laran CAC lahalo no laiha servisu ida mak bele ultrapassa ema nia hanoin  kona-ba CAC nia papel luta hasoru korupsaun.  Númeru  kazu ne’ebé mak CAC  simu iha tinan ida to’o ohin loron  lahetan rezultadu,  signifika  katak povu seidauk fo fiar  metin ba CAC  hodi hato’o kazu inklui mos LABEH seidauk  hato’o kazu  direitamente ba CAC tanba LABEH hare katak CAC seidauk prontu  lolós atu luta hasoru korupsaun  no Komisáriu rasik mak hatete katak CAC laos ONG tanba ne’e  servisu ne’ebé CAC halo ne’e segredu. Signifika katak ONG sira ne’ebé servisu iha area luta hasoru korupsaun,  Komisáriu CAC la fo importansia  ba servisu ONG sira nian, la fo importansia ba papél Igreja  nian iha luta hasoru korupsaun,  la fo mos importansia  ba estudantes no seitor privadu sira ne’ebé bele ajuda fo informasaun kona-ba projetu no orsamentu ne’ebé la’o.  Maibé Komisáriu CAC hetok  hakbesik an liu fali ba Instituisaun Estadu ne’ebé tuir lolós CAC atu  halo investigasaun  mak  asina  fali CAC nia konvite  kona-ba atividades  CAC nian. Ida ne’e   bele lori Instituisaun CAC sai hanesan Instituisaun  polítika ida ne’ebé labele halo kna’ar  luta hasoru korupsaun tanba rumoris   ne’ebé  mosu   iha  tinan ida  CAC hamrik  la reduz  e  rumoris  sira  kontinua  aumenta ba bebeik  no rekursus humanus  ne’ebé barak  lós maibé   la dun iha  kuiñesimentu iha luta hasoru korupsaun. LABEH hakarak informa katak,  se CAC  seidauk hatene oin  sa bele luta hasoru korupsaun, se seidauk  prontu  atu halo servisu ne’ebé ultrapassa  povu nia hanoin iha luta hasoru korupsaun diak  liu  CAC halo kolaborasaun barak liu  ho entidade  sira ne’ebé  ejiste tiha ona iha luta hasoru korupsaun hanesan komisaun anti korupsaun sira iha mundu no promove UNCAC nia servisu para CAC bele iha kuiñesimentu  naton atu halo nia servisu  tanba mandatu  CAC nian hela deit  tinan  tolu atu halo servisu iha luta hasoru korupsaun. LABEH  hare  katak  tinan  ida CAC  la  halo servisu  hodi ultrapassa povu nia hanoin, la lori ema  ida  ba PGR,  la tau kazu ida iha Tribunal. Se ida ne’e akontese nafatin CAC sei la hetan ema ida ne’ebé  bele  alega  hanesan  autor  kona-ba korupsaun. LABEH kontinua fo suporta ba CAC oin  sa atu kombate  korupsaun  para hetan  fiar   husi   povu  katak  komitmentu governu  no estadu  iha luta  hasoru  korupsaun  laos  deit  atu  hari CAC maibé ultrapassa hari CAC. Wainhira CAC  hamrik  governu mos aprova orsamentu  kuaze $ 2 Milloens resin para bele halo servisu  maibé  iha tinan  ida nia laran la konsege halo servisu.  Ne’e bele hatete katak rekursus sira ne’ebé  investe iha Instituisaun ida ne’ebé  la bo’ok  an no  labele halo servisu. Orsamentu Jeral  do Estadu   ne’ebé  aprova  ba CAC atu halo servisu ba povu iha area luta hasoru korupsaun.   Se wainhira CAC  la halo servisu  hodi  lori koruptor ba Tribunal para   reduz  rumoris kona-ba korupsaun  hodi  hatudu  faktus  kona-ba korupsaun, LABEH hanoin Osan ne’ebé aprova ba CAC laiha valor.      Tanba ne’e  diak  liu CAC   aprezenta  ona estratéjiku nasional tuir  lei haruka para ema hotu bele hatene CAC nia involvimentu iha movimentu luta hsoru korupsaun  tanba  se wainhira korupsaun ejiste nafatin iha rai laran, povu kontinua sai vítima ba Orsamentu  ne’ebé  tuir lolós atu fo  benefisiu  ba povu no  servisu CAC nian importante tebes ba povu ai leba, ukun nain  no ema  tomak. LABEH kontinua nafatin  fo suporta ba atividades  CAC nian maibé importante mak  CAC presiza aprezenta dadauk ona estratéjika nasional luta hasoru korupsaun atu nune’e membru Parlamentu,  Sosiedade Sivil, Media,  governu,  estudantes, seitor privadu bele hatene sira nia papél iha luta hasoru korupsaun. Se CAC  la aprezenta estratéjika nasional iha tempu badak nia laran, CAC bele lakon nia lejitimidade  nu’udar Instituisaun ne’ebé iha podér luta hasoru korupsaun.