KONSULTASAUN HO ENTIDADES HOTU HODI BUKA MEKANISMU NEBE DIAK BA PROSESU DISTRIBUISAUN NO FAAN FOOS MTCI HO SOSA PRODUTU LOKAL

LABEH REALIZA KONSULTASAUN NASIONAL KONABA “ TRANSPARENSIA NO BOA GOVERNASAUN IHA PROSESU DISTRIBUISAUN NO FAAN FOOS MTCI HO SOSA PRODUTU LOKAL”

Bazeia ba monitorizasaun team work LABEH iha area remotas liu husi programa One District, One Village, nebe ho objetivu atu hatene kondisaun real povu nian direitamente, LABEH konsege identifika problema nebe mak populasaun sira infrenta. Problema hirak nee inklui subsidiu Governu ba povu liu husi foos MTCI nebe mak susar tebes atu asesu, folin foos nebe la tuir estandar, no povu balun mos informa katak too ohin loron sira so hatene deit mak saku foos MTCI nian maibe foos nee oinsa sira la hatene. Laos iha problema foos MTCI deit maibe povu mos kestiona ho programa Governu “ Povu Kuda Governu Sosa” nebe mak sai papan nama deit.

Hanesan ita hotu hatene katak, laos populasaun sira iha rural deit mak hakilar konaba foos MTCI maibe iha capital Dili mos kestaun nee sai nudar kestaun nebe mak universal tiha ona. Laos povu deit mak hakilar maibe lideransa nasaun nee mos barak mak hakilar konaba kestaun nebe refere, membru PN no ema hotu-hotu maibe too agora nakonu deit ho kritika solusaun laiha.  

LABEH hanoin katak situasaun hanesan nee tenki hakotu no tenki hetan solusaun ikus nebe diak tuir ema hotu nia hakarak. LABEH hare katak laos ona tempu atu kritika deit, maibe diak liu kritika sira nee tenki ho solusaun. Tanba nee, LABEH husu atu husi parte hotu tenki hamriik hodi fo hanoin konaba mekanismu ou dalan diak iha prosesu distribuisaun no faan foos MTCI inklui sosa produto local. Hodi  nune’e problema refere bele hetan nia finalidade.
 
Bazeia ba razaun hirak iha leten, halo LABEH hamosu inisiativa ida katak presiza tebes atu ema hotu tur hamutuk hodi buka solusaun ba problema nebe refere. Tanba nee mak LABEH organiza Programa ho naran “ Konsultasaun Konaba Boa Governasaun no Transparensia iha prosesu Distribuisaun Foos no Faan Foos MTCI no Sosa Produtu local ” ba nivel akademikus, Sosiedade sivil/ONG, nivel Distritu nebe inklui autoridade local no ikus liu konsultasaun ho emprezariu sira. Tanba LABEH konsidera partisipasaun ema hotu nian importante tebes.

Objetivu husi programa konsultasaun nee mak atu rekolha opiniaun husi parte hotu-hotu hodi tau hamutuk no ikus liu entrega ba Governu liu-liu ba MTCI atu hare opiniaun husi parte hotu hodi bele implementa iha futuru. Tanba ita fiar katak liafuan povu nian sei la monu ba rai.  Atu nunee,problema foos MTCI nian bele resolve no povu tomak bele sente benefisiu husi subsidiu nebe Governu fo ba povu.
 
Implementasaun Programa “Konsultasaun konaba Boa Governasaun no Transparensia iha Prosesu Distribuisaun no Faan foos MTCI inklui Sosa Produtu Lokal”

KONSULTASAUN NASIONAL HO AKADEMIKUS IHA UNIVERSIDADES

Dili Institute of Technology (DIT)
Iha loron 12/Maio/2010 LABEH hahu konsultasaun iha Dili Institute of Technology (DIT) nebe mak hola fatin iha Salaun DIT. Programa nee loke direitamente husi Reitor DIT Estanislau Saldanha. Iha liafuan abertura, Reitor DIT husu ba nia Estudantes sira atu ativu iha programa ida nee liu husi hatoo opiniaun konaba mekanismu distribuisaun ho faan foos MTCI nebe diak inklui sosa produtu local nebe mak agora dadauk nia prosesu lao sabraut teb-tebes. Partisipantes sira nebe marka prezensa iha programa nee mai husi estudantes sira inklui dosentes Universidade refere. Observasaun hatudu katak, estudantes sira antusiusmu tebes iha programa nee nia laran no sira mos ativu tebes hodi fo hanoin ou aprezenta sira nia solusaun ba LABEH.

Rekomendasaun nebe estudantes sira hatoo mak hanesan tenki kria armazem iha distritu hotu. Buat nebe estudantes sira nota husi sistema nebe MTCI uza katak falta tebes mekanismu kontrolu no sira suzere tenki kria ekipa monitoring ba distribuisaun foos atu bele monitor too destinasaun. Konaba produtu local nian, sira rekomenda atu diak liu MTCI kria mos home industry ida atu nunee tenki iha kontinuasaun ba produtu sira nebe sosa tiha ona, labele tan husik dodok iha armaze. Selae gasta osan saugate deit.
 
Universidade Dili ( UNDIL)
Iha loron 14 Maio 2010, LABEH kontinua ho programa hanesan iha Universidade Dili nebe hola fatin iha salaun konferensia UNDIL. Programa nee rasik loke husi Reprezentante Reitor UNDIL, Ida Eliza nudar ( Vice Reitor II). Iha abertura, Sra. Ida husu ba nia estudante sira atu ativu iha programa ida nee liu husi fo hanoin konaba oinsa dalan diak iha prosesu distribuisaun no faan foos MTCI inklui sosa produtu lokal.

Ida Eliza mos enkoraza nia estudantes sira atu labele tauk hodi fo hanoin iha programa nee. Nia mos uza liafuan husi former Presidente USA, John F. Kennedy ba nia estudantes sira hodi hateten katak “ labele husu saida mak o nia nasaun halo ba o, maibe husu saida mak o bele halo ba o nia nasaun” ka iha versaun Ingles “ Don’t ask what Your Country can do for You, Buat ask what can You do for Your Country” .

Iha programa nee nia laran, observasaun hatudu katak estudantes sira ativu tebes hodi fo hanoin, sujestaun inklui perguntas konaba problema nebe mak durante nee halo sira konfujaun liu-liu konaba servisu MTCI nian nebe mak lao la los liu-liu iha parte faan foos MTCI. Iha fatin hanesan Diretur LABEH mos afirma katak LABEH organiza programa nee laos nudar portavoz MTCI maibe nudar ajente kontrolu social nebe mak Tane a’as valor Transparensia, Akuntabilidade no kombate korupsaun relasiona ho problema faan no distribuisaun foos MTCI inklui sosa produto local nebe mak laiha solusaun too agora maske husi parte hotu-hotu kritika makaas konaba kestaun nebe refere.

Rekomendasaun nebe mai husi Universidade refere katak MTCI tenki kria lei nebe adekuadu atu nunee bele regula wainhira ema faan foos la tuir estandar. Kria mos armazem iha distritu hotu atu nunee labele difikulta atividade chefe suku nian iha nia suku laran. Konaba produtu local, sira sujere atu kria mini home industry ida hodi bele produs produtu nebe sosa ona ba hahan nebe bele iha durasaun kleur atu nunee produtu nebe sosa ona sei la dodok iha armazem.
 
Universidade da PAZ (UNPAZ)
LABEH mos kontinua programa refere iha Universidade da Paz iha loron 15 Maio 2010. Programa nee loke husi reprezentante Reitor UNPAZ Francisco da Silva. Hanesan iha Universidade sira seluk, estudantes sira antusismu tebes iha programa nee. Hanesan mos iha universidade sira seluk, Diretur LABEH mos aprezenta flowchart nebe MTCI uza hodi provoka atu estudantes sira bele fo hanoin iha prosesu ida nee. Ka atudu ba sira tuir sira nia hanoin saida mak falta iha sistema nee hodi halo prosesu kontinua lao lalos. Programa nee hola fatin iha Salaun konferensia ba Magistrado UNPAZ.

Instituto of Business (IOB)
Iha loron 19 Maio 2010, LABEH mos kontinua programa refere iha IOB nebe hola fatin iha Salaun konferesnia IOB. Programa nee loke husi Reitor IOB Augusto Perreira. Iha abertura programa nee, Reitor IOB hateten katak importante tebes intelektual sira nia hanoin ka kontribuisaun intelektual sira liu husi hatoo ideia. Iha sesaun hatoo opiniaun, estudantes barak hatoo sira nia opiniaun. Iha estudante ida neebe hateten katak “ wainhira naok ten ida seidauk tama kadeia, entaun sei laiha rasa tauk. Diak liu na’ok ten sira nee wainhira identifika sala tenki kaer sulan ba kadeia atu nunee, naok ten sira seluk sei tauk. se governu la fo sansaun ida maka prosesu nee atu diak nusa mos naok ten sei la tauk tanba nia hatene governu sei la kastigu nia. Husu atu governu implementa liafuan ida nebe hateten katak se mak naok lima cent sai, se mak servisu la hatene sai, nee tenki implementa lolos! ”. Interesante tebes atu governu konsidera sujestaun ida nee. Tanba nee relasiona ho problema foos nebe faan la tuir estandar nia sujere atu Governu tenki kria lei nebe forte hodi regula sira nebe mak faan foos la tuir folin.

Estudantes sira mos nota iha sistema MTCI nebe LABEH hatudu katak, falta tebes mekanismu kontrolu tanba nee sira mos rekomenda atu kria team monitoring ida iha prosesu ida nee. Konaba produtu local, rekomedasaun nebe sira hatoo kuaze hanesan ho Universidade sira seluk katak tenki kria home industry ida atu nunee produtu sira nee labele sai dodok tanba wainhira dodok osan povu nian ak dodok laos boot sira nia osan.  

Universidade Nasional Timor-Leste (UNTL)
Iha loron 28 Maio 2010, Programa hanesan kontinua mos iha Universidade Nasional Timor Leste (UNTL)nebe hola fatin iha salaun Auditorium UNTL. Programa nee rasik loke husi Vice Reitor II Rosalino da Silva. marka prezensa iha programa nee estudantes ho dosentes sira husi Universidade nebe refere.

Observasaun LABEH hatudu katak, estudantes sira antusismu tebes hodi hatoo hanoin iha programa konsultasaun ida nee. Rekomedasaun nebe mai husi estudantes sira hanesan mos rekomedasaun nebe mai husi estudantes Universidade sira seluk.
 
Universidade Oriental (UNITAL)
LABEH remata programa konsultasaun nee ho akademikus sira iha Universidade Oriental (UNITAL) iha loron 29 Maio 2010. Programa nee rasik loke husi Reitor UNITAL Gregorio Lobo Pinto. Iha nia abertura Reitor nee hateten katak bazeia ba observasaun nebe durante nee nia hare konaba distribuisaun no faan foos MTCI no sosa Produtu lokal katak problema barak nebe mosu iha MTCI konaba assuntu foos MTCI tanba MTCI fraku tebes iha problema jestaun/jestor no problema desizaun. Failhansu bazika iha jestaun politika katak husi prinsipiu iha hanoin e halo konseitu e halo desizaun konaba formatu atu halo programa refere mak la tepat, la bazeia ba iha informasoens nebe akurat husi fatin hotu-hotu.

Iha sesaun hatoo hanoin, Eusebio Quintas nudar Dekanu fakuldade Agrikultura UNITAL hato’o nia rekomendasaun katak diak liu kria mekanismu kontrolu ka monitoring ida iha distribuisaun no faan foos MTCI tanba falta tebes mekanismu kontrolu. Sujere mos ba MTCI konaba produtu lokal nian katak tenkiser kria mos industria ba agrikultor sira nia produsaun atu nunee  produsaun sira nebe sosa tiha ona labele dodok deit iha armazem.

Iha fatin hanesan Delcio Guimaraes estudante fakuldade Ekonomia Departementu Manajementu rekomenda mos katak diak liu MTCI hahu intervensaun primeiru liu husi merkadoria katak regula presu ba sasan iha merkadoria, husu mos ba sira nebe mak toma konta ba distribuisaun no faan foos atu iha sentidu nasionalismu.  

KONSULTASAUN HO SOSIEDADE SIVIL
Hafoin konsultasaun ho Intelektual/akademikus remata, LABEH realiza programa hanesan ho Sociedade sivil/ONG iha loron 27/05/10. Tanba LABEH mos konsidera katak sociedade sivil iha papel importante tebes iha prosesu ida nee. Nudar ajente kontrolu social, Sociedade sivil mos tenki fo hanoin ka mekanismu nebe diak atu nunee bele hakotu problema nebe mak lao ona besik tinan tolu nia laran nebe laiha solusaun klaru. Partisipasaun sociedade sivil importante tebes.

Iha sesaun hatoo hanoin, Sosiedade sivil sira rekomenda atu MTCI hadia mekanismu distribuisaun no faan foos MTCI inklui sosa produtu local nebe mak durante nee lao sabraut. Sira mos kestiona konaba durasaun tempo hodi sosa foos husi rai liur tanba nee sira sujere atu MTCI bele hare tempo no limita importasaun foos husi rai liur tanba produtu rai laran komesa avansa ona. Konaba produtu local sira mos sujere atu kria home industry hodi bele produs prudutu sira neebe mak sosa tiha ona ba hahan nebe ho durasaun longo prazu ka produtu sira nebe sosa ona tenki fo tutan ba kooperativa ruma, importante mak tenki iha kontinuasaun se lae produtu sira nee sei kontinua dodok nafatin hanesan tinan uluk.
 
Alende prezensa sosiedade sivil nian, iha programa nee mos hetan partisipasaun maximu husi Estudantes LABEH-VS. Programa nee rasik lidera husi Diretur Ezekutivu LABEH Christopher Samson no hola fatin iha Salaun Departementu Edukasaun LABEH.

KONSULTASAUN HO AUTORIDADE LOKAL IHA 13 DISTRITUS

Distritu Ermera
Iha loron 26 Maio 2010, LABEH kontinua programa konsultasaun iha Distritu Ermera hafoin halao konsultasaun ho akademikus no sociedade sivil sira. LABEH kontinua programa refere ba iha Distritu ho objetivu atu halibur hanoin, sujestaun husi parte autoridade local sira iha Distritu nebe mak iha programa nee involve Administrador Distritu, Administrador Sub Distritu, Chefe do suku, PNTL no sst. Tanba LABEH konsidera katak partisipantes ema hotu nian liu-liu autoridade local importante tebes iha prosesu ida nee. Tanba autoridade local sira mak besik liu povu no sira rasik mos direitamente involve iha prosesu ida nee. Tanba nee importante tebes halibur hanoin husi sira.

Konkluzaun nebe LABEH foti katak maioria chefe suku lamenta ho sistema nebe mak durante nee uza iha prosesu foti foos MTCI. Chefe suku sira sai vitima iha prosesu ida nee. Tuir sira katak sistema nebe uza tuir ona estandar internasional maibe fraku tebes iha mekaismu kontrolu. Tanba nee sira sujere ba Governu atu kria taskforce hodi monitoring foos too iha suku no diak liu harii armazem iha Distritu no sub distritu atu nunee labele difikulta sira nia servisu.
 
Programa nee rasik loke husi Administrador Distritu Ermera. Marka prezensa iha programa nee mak autoridade local hanesan Administrador husi Sub distritu 6 no chefe suku sira husi suku 52 nebe mak iha Distritu Ermera rasik. Iha programa nee, autoridade local sira aprezenta sira nia difikuldade no mos fo hanoin konaba oinsa mekanismu nebe diak iha prosesu distribuisaun no faan foos MTCI inklui sosa produtu local. Programa refere hola fatin iha salaun administrasaun Distritu Ermera.

Distritu Bobonaro
LABEH halao programa konsultasau ho autoridae local bad ala rua iha Distritu Bobonaro(31/05/2010). Rezultadu nebe mak LABEH hetan katak maioria autoridade local rekomenda katak diak liu distribuisaun foos MTCI husi nasional direita ba distritu depois mak cehef suku suku mai foti iha armazem distritu se lae husi Distritu mak aloka kontinua ba suku sira iha disitu refere. Tanba chefe suku sira konsidera sistema nebe agora dadauk uza la diak halo sira mak sai fali vitima. Sira mos rekomnda atu tau atensaun ba funsionario MTCI sira iha armazem nasional tanba dla ruma sira mak halo manobra iha prosesu nee. Sira mos hateten katak wainhira MTCI la muda sistema nee, entaun sira sei la otinua tan knar sosa foos tanba sira lakohi sai chefe suku kobrador!  

Distritu Manufahi
Iha loron Sesta (04/06/10)  Lalenok Ba Ema Hotu  (LABEH)  realiza konsultasaun ho autoridade lokal sira iha Distritu Manufahi. Iha programa ne’e LABEH  konsege halo diálogu ho  Chefi suku sira, Administrador, inklui mos parte Polisia ho UNPOL  hodi  tau hamutuk hanoin  oin sa atu resolve  ka  hadia sistema  implementasaun ba distribuisaun fa’an fos MTCI  Iha Teritóriu tomak. Rezultadu husi konsultasaun ne’e LABEH identifika difikuldade nebe durante ne’e autoridade lokal sira hasoru iha prosesu distribuisaun fos MTCI liu-liu Chefi suku  sira ho PNTL. Programa nee loke direitamente husi Administrador Distritu Manufahi Filominu Tilman.

Difikuldade nebe durante ne’e sai hanesan problema bo’ot entre komunidade ho chefi suku  inklui PNTL mak hanesan Chefi suku ho polisia sai vitima iha prosesu distribuisaun fos MTCI  tanba failha husi sistema implementasaun Ministeriu kompetente katak laiha lei nebe forte atu Polisia sira bele uza iha prosesu ida nee, Sistema nebe Governu implementa halo polisia sira sai inimigo ba komunidade, Chefi suku sira husik hela servisu suku nian to’o semana ida resin tanba mai hein fos MTCI iha amarjen nasional. Fos MTCI la to’o suku izolado sira tanba transporte laiha, Durante ne’e suku sira iha Subdistritu Turiscai Distritu Manufahi la asesu ba fos MTCI no foos nebe iha ho presu nebe aas, Chefi suku sira ejiji Ministeriu kompetente atu fo informasaun klaru kona ba definasaun fos nia kilograma ho nia folin molok distribui hodi nunee labele kria konfujaun iha komunidade nia leet tanba durante ne’e populasaun sira hatene deit fos MTCI nebe ho folin $ 12 ho nia kilograma 35, Problema halo kobransa ba komunidade nebe kbi’it la to’o atu sosa fos MTCI, Difikuldade ba chefi suku sira wainhira ba forma antrian iha banku atu hatama osan hodi hetan fos MTCI nebe prosesu ne’e han tempu e difilkuta servisu suku nian, Governu tenki identifika lolos produtu lokal nebe atu sosa tanba durante ne’e  populasaun sira nia produtu lokal barak mak estraga.

Distritu Aileu
Iha programa konsultasauun entre LABEH ho autoridade lokal iha Distritu Aileu nebe realiza iha loron 11/06/10, LABEH identifika problema nebe iha kuaze hanesan ho distritu sira seluk katak chefe suku la faan foos maibe ba sosa hodi osan nebe kobra husi populsaun sira. Chefi suku balun rekuinese katak, sira la ba sosa fos MTCI tanba populasaun balun laiha kbi’it atu sosa no chefi suku rasik laiha osan atu ba sosa fos MTCI.Tanba ne’e sira rekomenda ba governu atu fo fiar ba autoridade lokal sira  hodi distribui fos MTCI ba iha suku mak sira fan depois intrega osan ba governu atu nune’e labele kria tan konfujaun entre chefi suku ho populasaun sira. Sira mos rekomenda ba MTCI atu kria taskforce ka seguransa hodi monitoriza distrinuisaun foos nebe sai husi armazem tenki tama too suku tanba durante ne’e  fos la to’o iha baze maibe fan deit iha sidade Dili. Hahalok sira ne’e akontese tanba sistema nebe ladiak no dala barak chefi suku sira la ba sosa foos tanba osan la to’o inklui transporte atu lori ba suku laiha. Inklui mos husu atu harii armazem iha Distritu ka too sub distritu hotu tanba distansia husi suku balu la hanesan.

Konaba produtu lokal to’o agora agrikultor sei sira konfujaun hela ho ho programa Governu nian Povu Kuda Governu Sosa tanba husi Ministeriu Agrikultura no Peskas (MAP) durante ne’e  fahe handtraktor ho traktor bo’ot ba povu atu promove no hasa’e produsaun aihan rai laran maibe produsaun nebe povu produs to’o agora governu la sosa. MTCI  tenki esplika klaru ba povu konaba produtu lokal nebe mak atu sosa molok implemnta programa foun se lae gasta deit osan ba cetak papan bar-barak maibe benefisiu ba povu laiha.

Distritu Ainaro
Programa hanesan realiza mos iha Distritu Ainaro (14/06/10). Iha konsultasaun ne’e Chefi Suku sira husu governu atu distribui fos MTCI direitamente ba suku atu nune’e labele kria problema entre chefi suku ho populasaun sira iha baze.
“ Ami  husu ba MTCI  atu muda sistema nebe kria konfuzaun no problema entre chefi suku ho populasaun sira tanba durante ne’e ami chefi suku sira simu tolok barak husi komunidade no ema la respeita ona ami tanba deit prosesu sosa fos  iha nasional  kleur tebes no fungsionariu sira iha MTCI laiha atendementu diak ba chefi suku,” haktuir chefi suku sira.
   
Sira rekomenda ba governu atu servisu hamutuk ho Parlamentu Nasional  estabelese kria lei ida  para fos nebe ho marka MTCI labele faan ka rai iha loja no governu tenki  hari amarjen iha kada Distritu no Subdistritu atu nune’e polisia fasil atu halo kontrola  tanba foos ne’e subsidi ba povu laos foos bisnis atu hetan lukro.

Entretantu iha konsultasaun refere, polisia sira mos kestiona konaba atuasaun nebe sira halo hasoru ema sira nebe faan fos MTCI liu estandar hodi prende fos maibe wainhira halo konfirmasaun ho parte MTCI, lahetan resposta tanba MTCI haruka fali polisia mak faan fos ho folin $12  hafoin intrega osan ba fos nain. Polisia sira rekomenda ba ukun nain sira atu kria lei nebe forte para ema bele kumpri hodi nunee bele hamenus problema iha distribuisaun fos MTCI.

Iha konsultasaun nee mos Chefi Suku sira kestiona konaba komunidade balun nia produtu lokal  governu la sosa. Foin lalais nee, fungsionariu husi MTCI ba iha subdistritu Maubisse atu sosa produtu lokal maibe sira dehan tenki too 10 ka 20 toneladas  no chefi suku rasik hakfodak tanba durante ne’e  governu laiha planu atu organiza grupu agrikultura para bele produs to’o standar nebe sira husu, Governu la halo sosializasaun ba sira antes atu prepara an, kestiona chefe suku sira.

Chefi suku sira mos haktuir katak, uluk  MTCI ba sosa batar 7 toneladas  husi komunidade iha distritu Covalima no Betanu Distritu manufahi tau iha amarjen  maibe produtu nee sai dodok hotu tanba kleur tiha ona. “Ami husu LABEH atu  rekomenda ami nia preukupasaun ne’e para governu bele toma atensaun ba atendementu sira ne’e tanba orsamentu  ne’e povu nian laos fungsionariu MTCI  nian.” Sira hatete, fos MTCI  ne’e uza hodi INFEITA deit sidade Dili maibe populasaun sira iha area rural susar atu hetan foos MTCI.

Distritu Covalima  
Iha loron 15/06/10, konsultasaun nee mos realiza iha Distritu Covalima. Chefi suku husi suku hamutuk 31 iha Distritu Covalima sente triste ho sistema distribuisaun fos husi MTCI  tanba sira sente sai vitima ba prosesu ne’e no sira konsidera prosesu ida nee halo sira lakon dignidade. Chefi suku sira lamenta tebes ho presu fos MTCI nebe faan la tuir folin nebe determina. Foss lemo-lemo iha sidade maibe duun fali ba chefe suku sira afinal dalaruma halo ita deskonfia fali keta halo funsionario MTCI mak konkalikong ho emprezariu sira karik. Tanba atendementu iha armazem fo prioridade liu ba emprezariu duke chefe suku.

“Ami balun ba sosa duni fos MTCI maibe balun la ba sosa tanba povu barak laiha osan atu sosa foos. Ami triste liu mak atendementu iha amarjen nasional nian nebe ladiak inklui transporte laiha atu tula foos ba ami nia suku izoladu. Fusnionario MTCI atende liu mak emprezariu sira duke chefe suku. Halo ami hein ba hein, maibe emprezariu sira mak mai, sira langsung atende kedas” Chefi suku sira kestiona.

Iha parte seluk sira mos husu ba governu atu halo sosializasaun para esplika ba povu kiik sira konaba  produtu lokal saida mak governu atu sosa tanba programa ne’e halo povu ki’ik sira nia produtu lokal dodok iha fatin deit no governu la ba sosa.

Programa nee loke direitamente husi Administrador Distritu Covalima, Inacio Pires no hetan partisipasaun maximu husi autoridade local sira; chefe suku, administrador sub distritu inklui parte Polisia. Programa nee hola fatin iha Salaun Administraaun Distritu Covalima.

Distritu Vique-que
Hafoin remata kosultasaun iha parte Oeste, LABEH kontinua ho programa hanesan ba parte Leste nebe hahu kedas husi Distritu Vique-que iha loron 17 Junho 2010. Programa refere loke direitamente husi Administrador Distritu Franscisco Gutterres nebe hola fatin iha salaun Administrasaun Distritu Vique-que. Iha konsultasaun nee, autoridade local sira hatoo difikuldade nebe mak sira infrenta iha prosesu ida nee. Maioria autoridade local sira lamenta ho mekanismu nebe mak durante nee fo sai husi MTCI iha prosesu distribuisaun no faan foos MTCI inklui sosa produtu local.

Chefe Suku Lacluta Henrique Campus informa katak tanba deit foos MTCI nia tenki lakon tempo ba mai Dili. Dalaruma too iha Dili funsionario MTCI la atende ho diak no halo chefe suku sira ba mai deit iha Dili laran tanba deit prosesu nebe naruk no kleur teb-tebes. Nia mos lamenta tanba durante fulan rua ona, foos seidauk too nia suku afinal prosesu hotu nia halo tuir ona no osan iha ona banku “ Hau sente triste tebes ho Governu ida nee. Agora dadauk iha hau nia suku povu menus aihan tanba aihan nebe sira kuda la aproveita hotu tanba deit natureza nebe ladun diak. Tanba nee populsaun sira mos lori osan kobransa mai hau atu ba sosa foos. Hau ba mai Dili dalabarak ona no hasai hau nia osan rasik maibe too agora foos nee la too iha hau nia suku maski prosesu hotu hau halo tuir ona. Pior liu tan osan nebe hau lori ba foos ho kilograma 35 maibe wainhira hau hatama tiha osan iha banku mak sira informa katak foos hela kilograma 25 “ tanba nee liu husi LABEH, nia husu atu hatoo lalais ezijensia nee ba MTCI hodi bele haruka lalais foos ba nia suku.

Lamentasaun mos mai husi kuase maioria chefe suku nebe mak infrenta difikuldade hanesan. Chefe suku Distritu refere informa katak difikuldade nebe mak sira infrenta laos deit iha prosesu atu hetan foos nebe naruk tebes maibe inklui problema transporte. “ Iha prosesu nee, ami lakon osan lubuk ida tanba deit transporte tula foos la too ba suku. Ami hasai rasik osan tau mina iha kareta hodi tula foos too ba suku tanba transporte nebe tula mai hatun deit iha Distritu ka sub distritu no aumenta tan osan ba ema hodi hatun foos maibe too iha suku wainhira tenta atu kobra fali populasaun sira hodi troka netik osan mina, sira rezeita tanba sira hatene deit simu foos ho folin USD12. Komesa iha nee, chefe suku balun para kedas ho atividade ida nee tanba 50cent nebe hetan iha foos nee la vale liu buat ida”. Maibe, sira mos sujere atu MTCI ba oin tenki hadia mekanismu ida nee. Se karik, iha future fo fiar ba chefe suku entaun tenki haruka uluk foos ba sira, faan tiha hafoin mak entrega fali osan ba Governu. Se lae entrega deit ba emprezariu.

Iha parte produtu local nian, maioria chefe suku kestiona konaba sistema nebe mak MTCI uza atu sosa produtu local. Tanba durante nee sira la hatene produtu saida deit mak Governu atu sosa, folin per kilograma hira, no oinsa Governu atu sosa. Sira konsidera katak programa Povu Kuda Governu Sosa nee nunka implementa no konsidera katak programa nee hanran deit Povu Kuda Governu Han ka Povu Kuda Governu Sae!      

Distritu Manatuto
Hafoin Distritu Vique-que, LABEH kontinua ho programa hanesan iha Distritu Manatuto (18/06/10). loke no akompanha mos programa nee Administrador Distritu Manatuto Elbino Bonaparte do Rego. Programa nee hola fatin iha salaun Administrasaun Distritu Manatuto. marka prezensa iha programa nee autoridade local sira hanesan chefe suku, administrdaor sub distritu no Komandante Polisia Distritu no Komandante Polisia estasaun sub distritu sira hotu.

Hanesan iha Distritu sira seluk, maioria autoridade local sira nebe partisipa hatoo difikuldade nebe mak sira infrenta durante involve iha prosesu faan foos MTCI nian. Miquel Marcos Komandante Polisia Sub Distritu Laleia afirma katak nia parte sai vitima iha prosesu ida nee. “ Hau hateten Polisia sai vitima iha prosesu ida nee tanba wainhira ami prende foos, MTCI haruka fila fali ami mak faan no osan entrega ban ain. Hau lamenta tanba ami laos atu faan foos. Se hakarak kontrola presu foos diak liu tenki estabelese lei nebe mak forte atu nunee wainhira ema faan foos liu folin nebe determina nia tenki hetan sansaun laos halo fali ami polisia mak ba faan foos” tenik Miguel. Nia mos hatutan tan katak se wainhira MTCI hakarak halo monitoring tenki halo kedas iha armazem laos monitoring fali foos nebe too ona iha dalan. Se nunee halo ita deskonfia fali funsionario sira, keta halo ba konkalikong tiha ona karik se mak hatene.

Tan nee, autoridade local sira rekomenda ba Governu tenki tau ekipa monitoring ba distribuisaun fos MTCI tanba dala barak kompania sira mak lori sai fos husi amarjen hodi faan subar maibe  ikus duun fali chefe suku sira mak manipula folin foos.

Sira mos kestiona katak durante ne’e sira laos faan foos MTCI maibe sira ba sosa foos. Tanba prosesu ne’e obriga sira tenki halo kobransa ba populasaun  no dala barak mak sira hetan tolok husi komunidade tanba prosesu sosa foos kleur tebes. Pior liu tan mak governu la esplika lolos kilograma fos nian nebe kria konfujaun ba populasaun sira. No sira husu atu muda liafuan chefe suku faan foos ba chefe suku sosa foos tanba sira la faan ida.
 
Chefi suku husi Manatuto nebe kompostu  husi suku  28 konfesa katak,  sira lakohi ona atu halo kobransa ba populasaun, se governu hakarak sira mak atu faan entaun tenki distribui fos ba sede suku mak chefi suku ho konselhu suku sira faan ba populasaun hafoin intrega fali osan ba governu. Se lae dalan diak seluk mak diak liu foos husi nasional haruka direitamente ba armazem iha distritu refere depois mak chefe suku sira mai foti wainhira presiza.

Chefe suku sira mos kestiona liu konaba produtu local. sira lamenta tebes ho programa Povu Kuda Governu sosa nebe mak sai papan nama deit. Chefe suku sira informa katak durante nee sira nunka hatene produtu saida mak Governu atu sosa. Tanba produtu Timor nee barak teb-tebes. Komunidade balun iha fehuk, aifarina no sst maibe Governu la sosa no pior liu tan MTCI la halo sosializasaun antes ba autoridade local sira. Maibe sira tur deit iha fatin halo programa no sira mesak mak hatene. Sira husu ba governu atu halo klasifikasaun ba produtu lokal nebe mak atu sosa.

Distritu Baucau
Iha loron 22 Junho, LABEH halao programa hanesan iha Distritu Baucau. Programa nee loke husi Administrador Baucau Antonio Gutteres. Iha konsultasaun nee maioria autoridade local lamenta ho mekanismu prosesu distribuisaun foos MTCI inklui sosa produtu local. Husi parte chefe suku sira rekomenda katak se Governu hakarak fo fiar nafatin ba sira maka Governu tenki entrega uluk foos ba suku hodi chefe suku no konselho suku sira faan tiha mak osan entrega ba Governu. Maibe chefe suku balun rezeita no lakohi ona atu faan foos tanba se wainhira suku iha atividade importante iha liur entaun sede suku taka no se mak atu tau matan wainhira populasaun balun hakarak mai sosa no sira rekomenda atu diak liu fo deit ba emprezario nebe iha suku laran mak faan tanba chefe suku iha assuntu importante barak mak atu halo. Husi parte Polisia rekomenda katak diak liu tenki kria lei nebe forte atu nunee wainhira faan foos liu standard tenki hetan sansaun atu nunee labele repete fila fali se lae halo polisia mak ayam potong.    

Tanba nee sira husu ba LABEH atu hatoo rekomendasaun sira nee ba MTCI  hodi lalais muda mekanismu nebe lao ladiak durante nee. Tanba iha Distritu Baucau, iha chefe suku balun nebe infrenta difikuldade boot tebes hanesan momentu sira ba tula foos too iha suku kalan ona no transporte la tula ba suku no terpaksa foos sira nee hatun deit iha chefe suku nia uma. Wainhira kalan boot derpente udan tau no sira la biban asegura foos sira nee too foos sai estragus hotu tanba kona udan ben.

Entretantu relasiona ho informasaun nebe LABEH hetan iha konsultasaun refere husi chefe suku balun katak produtu local sai dodok no aat iha armazem, iha loron 23 Junho loraik, ekipa LABEH hakat ba monitoriza armajem iha Aldeia Caisidu suku Tirilolo hodi buka hatene informasaun klaru.

Ekipa LABEH konsege hasoru Diretur Kompanha nebe sosa produtu local. Tuir informasaun nebe ekipa LABEH rekolhe husi direitur kompanhia lokal ACELDA Ijinho da Costa Freitas  katak, produtu hanesan Batar no hare mak Governu sosa no tau iha nia armazem. Batar hamutuk 300 toneladas, maibe 50 toneladas fo ona ba Seminario iha Fuiloro, agora hela deit toneladas 250 mak iha armazem no hare toneladas 100 resin.

“ Hau ba sosa produtu lokal hanesan hare, batar ho kamí  husi agrikultura  kada kilo $30 centavus no governu sosa tutan ho folin $ 50 centavus  batar no hare sira ne’e governu  aluga hau nia armazem hodi tau iha neba. Produtu local sira nee tau iha amarjen hahu iha fulan Abril-Junho 2009 to’o agora sei iha nafatin neba. Hau ladun hatene kondisaun produtu sira nee tanba xave armazem entrega ba Governu mak kaer laos Hau.“

Molok halao programa konsultasaun iha Distritu Baucau, iha loron 21 Junho loraik, ekipa LABEH hakat ba vizita Amu Basilio Bispo Diocese Baucau iha nia Rezidensia Trilolo Baucau. Iha sorumuto ho Amu Basilio, Diretur LABEH informa mos konaba objetivu husi programa nebe LABEH halao no iha dadalia konaba esplikasaun produtu local, Amu Bispo hakfodak tanba Amu mos foin primeira vez rona katak produtu local nebe Governu sosa hamutuk hitu deit. Afinal tuir Amu, produtu barak teb-tebes no hanoin katak Governu sosa hotu. Amu mos enkoraza LABEH atu kontinua halao programa ida nee hodi bele hetan rezultadu nebe diak hodi bele ajuda Governu buka solusaun ba problema Foos MTCI no Sosa produtu local.

Distritu Lautem
LABEH kontinua ho programa konsultasaun hanesan iha Distritu Lautem (23/06/10). Iha konsultasaun nee LABEH identifika katak difikuldade nebe mak autoridade local hanesan chefe suku no Polisia sira infrenta kuaze hanesan ho difikuldade nebe mak autoridade local husi Distritu sira seluk infrenta.

Chefe suku Mehara informa katak nia lamenta tebes ho atendementu husi funsionario MTCI iha armazem Dili. “ Nudar chefe suku hau lamenta tebes ho hahalok funsionario MTCI balun nebe mak la konsidera hau nudar chefe suku maske hau hatudu ona hau nia kartaun ba sira atu prosesa foos bah au nia suku. Sira kestiona fali hau nee chefe suku duni ka lae. Hau ba mai kole, too iha armazem ba hasoru tan hahalok hanesan nee. Ami chefe suku iha dignidade, povu mak hili ami.” Tanba nee nia sujere atu Governu mos tenki tau matan ba assuntu ida nee. Hare husi problema ida nee ita bele dehan katak falta tebes koordenasaun entre ministerio tanba tuir lolos dadus chefe suku nian husi ESTATAL tenki kompletu ba MTCI atu nunee wainhira prosesa foos, la presiza ulun moras identifika identidade chefe suku sira, hatan Diretur LABEH ba preokupasaun chefe suku Mehara.

Suku Parlamentu liu husi nia chefe suku...mos afirma katak iha nia suku produsaun Liis makaas teb-tebes maibe Governu la ba sosa. Tanba nee nia mos husu karik Liis tama hotu iha produtu nebe governu atu sosa entaun nia sei husu ba populasaun sira atu prepara an liu tan. Maibe triste, wainhira chefe suku nee rona husi LABEH katak produtu nebe governu sosa nee so iha hitu deit la inklui liis. Nia mos hatutan katak Liis mos nudar produu local tanba saida mak governu la sosa, se governu sosa barak entaun sosializa atu nunee nia povu bele hatene hodi servisu makaas aumenta tan produsaun. Alende rekomendasaun iha leten, Rekomendasaun kuaze barak mak hanesan Distritu sira seluk katak tenki kria lei nebe forte hodi kontrola foos, kria ekipa monitoring, kria home industry kiik ba kontinuasaun produtu local, no rekomendasaun husi Administrador rasik katak diak liu foos husi nasional mai iha armazem boot iha distritu Lautem mak hafoin aloka ba suku.

Hafoin remata programa konsultasaun ho autoridade local konaba  sistema  fan  fos MTCI ho sosa produtu lokal iha Distitu refere, ekipa LABEH liu husi programa One District, One Village hakat ba halo monitorizasaun iha Ministeriu Agrikultura Distritu refere. Ekipa LABEH konsege hasoru malu ho Direitur Ministeriu Agrikultura e Peskas (MAP) Distritu Lautem Almeida Frans  Xavier  hodi buka  hatene oin sa  kolaborasaun entre MTCI ho MAP iha programa Povu Kuda Governu Sosa “ Produtu local”. Nia  informa katak, MAP iha komitmentu atu servisu hamutuk ho komunidade  hodi  produz aihan rai laran  para  minimiza importasaun husi rai liur maibe MTCI laiha kolaborasaun ho sira liu-liu iha parte sosa produtu lokal atu oinsa sosa produtu nebe komunidade ho MAP produs tiha ona iha toneladas barak.

Nia hateten katak sira mos akompanha alokasaun OJE hamutuk $7 milões nebe  kanaliza ba MTCI hodi sosa produtu lokal maibe iha Distritu Lautem, durante ne’e  MTCI la ba sosa komunidade  sira nia produtu lokal. Nia haktuir kona ba produsaun Batar, Ministeriu Agrikultura hetan kuaze 100 resin toneladas nebe kobre deit  iha subdistritu Lospalos vila la inklui area sira seluk no sira so submete hodi fo dadus deit ba MTCI atu sosa. Komunidade husi aldeia Nakroman suku Fuiluru momentu neba, husu kona ba presu kada kilo ba produtu lokal, MTCI hatun to’o $ 15 centavus - $20 centavus no komunidade preukupa ho presu ne’e tanba lahetan benefisiu.

Tuir Direitur ne’e katak, ONG sira mak sosa ho presu $ 50 centavus  kada kilo no komunidade sira bele hetan lukro. Tuir dadus produtu lokal nebe Ministeriu agrikultura distritu refere rekolha mak kuaze 290.000, 259 toneladas produsaun makaas tebes maibe MTCI la halo desizaun hodi sosa komunidade nia produtu local katak durante nee MTCI nunka ba sosa produtu lokal iha Distritu Lautem.

Wainhira Primeiru Ministru Xanana Gusmao halo vizita, deside atu sosa komunidade sira nia produtu lokal inklui  mina nú  maski la tama iha lista sosa produtu lokal husi MTCI nian  maibe governu promete atu sosa. Wainhira ba halo konsultasaun ho parte MTCI, MTCI hakarak sosa ho presu nebe tun liu ba $15 centavus kada botir ida e komunidade sira rezeita totalmente presu ne’e. Nia hatutan, sira nia parte ajuda hodi promove agrikultor sira nia produsaun maibe atu sosa ne’e kompetensia MTCI nian. Sira so ajuda komunidade hodi ba direitamente foti dadus kona ba rezultadu produsaun.

Direitur ne’e husu ba MTCI atu MTCI tau nia membru ka extensionista iha distritu refere atu nunee bele servisu hamutuk hodi oinsa bele kobre rezultadu produsaun agrikultura nian atu nune’e bele liga direitamente ba seguransa aihan, ekstensionista no autoridade lokal sira hodi rekomenda ba nasional para bele sosa produtu lokal. Iha monitorizasaun nee, LABEH nota katak laiha linha koordenasaun nebe diak entre MTCI ho MAP. Ministerio ida halo diak hodi aumenta produsaun maibe Ministerio seluk la halo kontinusaun ba produsaun hirak nee.

Distritu Ambeno
Iha Distritu Ambeno (25/06/06), maioria autoridade local lamenta tebes ho mekanismu nebe agora dadauk sira tuir iha prosesu faan foos MTCI. Hare jeografikamente ita bele dehan katak Ambeno nudar Distritu nebe dok tebes husi capital Dili. Asesu transporte ba ema deit araska tiha ona sa tan ba foos. Difikuldade nebe mak chefe suku sira infrenta iha prosesu nee todan tebes.

Chefe suku sira informa katak, dala barak sira abandona servisu suku nian hodi ba hein foos iha Dili. Atu hetan deit foos mos tenki tuir prosesu nebe naruk. Wainhira hetan tiha foos, transporte hanesan truk tula husi armazem mai hatun iha Porto. Dala barak sira toba iha Porto tanba fatin iha roo laiha atu hatama sira nia foos. Fatin nebe iha nakonu tiha ona ho foos emprezariu nian tanba nee sira tenki pasiensia toba iha Porto depende viajem Roo Nakroma ba mai Dili Oe-cusse. Chefe suku balun informa katak sira toba iha Porto kuaze semana rua. Pior liu tan foos nebe atu lori ba oecusse tenki aluga fali fatin ka armazem iha porto hodi tau foos hodi hein roo. Sira tenki hasai osan lubuk ida iha prosesu nee.

Wainhira too iha Oe cusse sira selu tan ema hatun foos no buka fali transporte hodi tula ba too iha suku. Chefe suku sira konsidera osan ho valor 50cent nebe sira hetan la iha valor liu. Administrador Distritu Oe-Cusse Jose T. Anuno mos lamenta nia chefe suku sira tenki husik hela suku hodi ba hein foos iha Dili tanba nee nia mos sujere atu diak liu foos husi nasional direita mai iha armazem boot nebe iha nia distritu depois mak chefe suku sira mai foti se lae komunidade mos bele hakat mai sosa rasik. Hodi nunee labele difikulta fali chefe suku no Polisia sira nia servisu.

Hafoin remata konsultasaun, LABEH hakat ba vizita mini armazem nebe mak durante nee produtu local nebe mak Governu sosa hodi tau ba. Ekipa LABEH konsege hasoru malu ho chefe lojistika Xisto sako nia afirma katak produtu hanesan batar no hare nebe mak durante nee tau iha armazem estraga no dodok hotu kedas no komunidade balun mai foti hodi fo han animal no balun tanba dodok iis makaas entaun lori ba soe hotu. Agora dadauk armazem mamuk hela tanba tinan ida nee Governu seidauk sosa produtu local.

Distritu Liquica
Iha loron (01/07/10) tama ba fulan Julho, LABEH kontinua halao programa konsultasaun iha Distritu Liquica. Programa nee loke direitamente husi Administrador Distritu Liquica Leonel de Jesus Carvalho. Iha nia intervensaun Administrador hatoo Parabens ba LABEH nebe mak realiza ona konsultasaun nee iha nia distritu. Nia mos espera katak problema foos MTCI no sosa produtu local nebe mak sai hanesan polemika boot iha rai laran bele lalais hetan ona solusaun.

Iha sesaun diskusaun, hanesan distritu sira seluk, chefe suku sira hatoo difikuldade nebe mak durante nee sira infrenta. Chefe suku sira kestiona konaba prosesu sosa foos nebe mak halo sira sai vitima. Balun konfesa katak iha prosesu nee sira lamanan osan maibe lakon tan osan mak iha, balun hetan tolok husi komunidade. Chefe sira mos rekomenda atu hadia sistema nebe mak durante nee uza tanba la benefisia sira no populasaun. Sira mak kontinua sai vitima. Chefe suku sira mos kestiona konaba programa POvu Kuda Governu sosa. Sira konsidera katak Governu laiha planu nebe diak. Tanba produtu balun nebe sosa sai dodok, produtu balun la sosa no aat liu tan sira rasik la hatene produtu saida mak governu atu sosa tanba MTCI/ governu la halo sosializasaun ba sira molok implementa programa ida nee.  

Distritu Dili
(05/07/10) Diferente ho Distritu siraseluk nebe programa nee halao iha capital. Iha Distritu Dili, LABEH foti Sub-Distritu Atauro nudar fatin nebe mak hodi realiza programa Konsultasaun Nasional ho autoridade local konaba prosesu faan foos no Distribuisaun foos MTCI inklui sosa produtu local. Tanba LABEH konsidera katak jeografikamente Atauro mak nudar sub distritu nebe dok husi capital Dili.

Programa nee loke husi Administrador sub Distritu Atauro Manecas Soares. Iha nia intervensaun , Administrador hatoo parabens ba LABEH nebe mak hakat mai Atauro maske ho transporte (roo kiik) maibe sira konsege hakat too mai Atauro hodi hasoru autoridade local sira hodi koalia konaba assuntu nebe importante tebes ba sira.

Observasaun LABEH iha programa nee hatudu katak, maioria autoridade local tau fiar ba emprezario Atauro oan sira nebe mak durante nee hamutuk ho sira iha Atauro. Sira fiar liu emprezariu sira nee tanba durante nee faan foos tuir estandar nebe mak determinadu no komprende tebes nesesidade sira nian. Tanba nee Chefe suku sira rekomenda ba Governu atu define lista emprezariu nebe mak sei lori foos ba Atauro no diak liu entrega ba emprezariu Atauro oan nebe mak durante nee besikliu sira. Iha sesaun diskusaun nee mos, emprezariu Atauro sira hatoo difikuldade no prosesu nebe mak durante nee sira tuir. Sira mos rekomenda ba Governu atu trata sub distritu Atauro especial nudar sub distritu nebe espesial duni se lae liafuan nebe dehan Atauro especial nee hanesan formalitas deit.

LABEH hakotu konsultasaun konaba Transparensia no Boa Governasaun iha prosesu distribuisaun no faan foos MTCI inklui sosa produtu local iha Distritu Dili, Sub Distritu Atauro. Hafoin ho autoridade local, LABEH sei kontinua Programa nee ho parte emprezariu nebe sai nudar parte ikus ba programa ida nee.