LABEH Hahu Programa “Konsultasaun konaba Boa Governasaun no Transparensia iha Prosesu Distribuisaun no Faan foos MTCI inklui Sosa Produtu Lokal”

LABEH Hahu Programa “Konsultasaun konaba Boa Governasaun no Transparensia iha Prosesu Distribuisaun no Faan foos MTCI inklui Sosa Produtu Lokal”

Iha konsultasaun nee, LABEH identifika katak autoridade lokal sira hanesan Chefe suku ho PNTL balun sai vitima iha prosesu distribuisaun no faan foos MTCI. 

Bazeia ba monitorizasaun team work LABEH iha area remotas liu husi programa One District, One Village, nebe ho objetivu atu hatene kondisaun real povu nian direitamente, LABEH konsege identifika problema nebe mak populasaun sira infrenta. Problema hirak nee inklui subsidiu Governu ba povu liu husi foos MTCI nebe mak susar tebes atu asesu, folin foos nebe la tuir estandar, no povu balun mos informa katak too ohin loron sira so hatene deit mak saku foos MTCI nian maibe foos nee oinsa sira mos la hatene. Laos iha problema foos MTCI deit maibe povu mos kestiona ho programa Governu “ Povu Kuda Governu Sosa” nebe mak sai papan nama deit. 

Hanesan ita hotu hatene katak, laos populasaun sira iha rural deit mak hakilar konaba foos MTCI maibe iha capital Dili rasik mos kestaun nee sai nudar kestaun nebe mak universal tiha ona. Laos povu deit mak hakilar maibe lideransa nasaun nee mos barak mak hakilar konaba kestaun nebe refere, membru PN no ema hotu-hotu. 

LABEH hanoin katak situasaun hanesan nee tenki hakotu no tenki hetan solusaun ikus nebe diak tuir ema hotu nia hakarak. LABEH hare katak laos ona tempu atu kritika deit, maibe diak liu kritika sira nee tenki ho solusaun. Tanba nee, LABEH husu atu husi parte hotu tenki hamriik hodi fo hanoin konaba mekanismu ou dalan diak iha prosesu distribuisaun no faan foos MTCI inklui sosa produto local. Hodi  nune’e problema refere bele hetan nia finalidade.
 
Bazeia ba razaun hirak iha leten, halo LABEH hamosu inisiativa ida katak presiza tebes atu ema hotu tur hamutuk hodi buka solusaun ba problema nebe refere. Tanba nee mak LABEH organiza Programa ho naran “ Konsultasaun Konaba Boa Governasaun no Transparensia iha prosesu Distribuisaun Foos no Faan Foos MTCI no Sosa Produtu local ” ba nivel akademikus, Sosiedade sivil/ONG, nivel Distritu nebe inklui autoridade local no ikus liu konsultasaun ho emprezariu sira. Tanba LABEH konsidera partisipasaun ema hotu nian importante tebes.

Objetivu husi programa konsultasaun nee mak atu rekolha opiniaun husi parte hotu-hotu hodi tau hamutuk no ikus liu entrega ba Governu liu-liu ba MTCI atu hare opiniaun husi parte hotu hodi bele implementa iha future. Tanba ita fiar katak liafuan povu nian sei la monu ba rai.  Atu nunee,problema foos MTCI nian bele resolve no povu tomak bele sente benefisiu husi subsidiu nebe Governu fo ba povu.
 
Konsultasaun ba Akademikus
LABEH hahu implementa ona programa nee ba nivel akademikus/universidade iha Dili. Tanba LABEH konsidera katak presiza tebes intelektual sira nia hanoin iha prosesu ida nee.

Tanba nee, Iha loron 12/Maio/2010 LABEH hahu konsultasaun iha Dili Institute of Technology (DIT) nebe mak hola fatin iha Salaun DIT. Programa nee loke direitamente husi Reitor DIT Estanislau Saldanha. Iha liafuan abertura, Reitor DIT husu ba nia Estudantes sira atu ativu iha programa ida nee liu husi hatoo opiniaun konaba mekanismu distribuisaun ho faan foos MTCI nebe diak inklui sosa produtu local nebe mak agora dadauk nia prosesu lo sabraut teb-tebes.

Partisipantes sira nebe marka prezensa iha programa nee mai husi estudantes sira inklui dosentes Universidade refere. Observasaun hatudu katak, estudantes sira antusiusmu tebes iha programa nee nia laran no sira mos ativu tebes hodi fo hanoin ou aprezenta sira nia solusaun ba LABEH. Ita bele hateten katak opiniaun nebe mai husi estudantes sira, bazeia ba esperiensia ka buat nebe mak akontese ba sira iha moris lor-loron konaba folin foos MTCI nebe latuir estandar. Iha programa nee, Diretur LABEH aprezenta mekanismu ou sistema nebe mak durante nee MTCI uza iha prosesu nebe refere.
 
Iha loron 14 Maio 2010, LABEH kontinua ho programa hanesan iha Universidade Dili nebe hola fatin iha salaun konferensia UNDIL. Programa nee rasik loke husi Reprezentante Reitor UNDIL, Ida Eliza nudar ( Vice Reitor II). Iha abertura, Sra. Ida husu ba nia estudante sira atu ativu iha programa ida nee liu husi fo hanoin konaba oinsa dalan diak iha prosesu distribuisaun no faan foos MTCI inklui sosa produtu lokal.

Ida Eliza mos enkoraza nia estudantes sira atu labele tauk hodi fo hanoin iha programa nee. Nia mos uza liafuan husi former Presidente USA, John F. Kennedy ba nia estudantes sira hodi hateten katak “ labele husu saida mak o nia nasaun halo ba o, maibe husu saida mak o bele halo ba o nia nasaun” ka iha versaun Ingles “ Don’t ask what Your Country can do for You, Buat ask what can You do for Your Country” .

Iha programa nee nia laran, observasaun hatudu katak estudantes sira ativu tebes hodi fo hanoin, sujestaun inklui perguntas konaba problema nebe mak durante nee halo sira konfujaun liu-liu konaba servisu MTCI nian nebe mak lao la los liu-liu iha parte faan foos MTCI. Iha fatin hanesan Diretur LABEH mos afirma katak LABEH organiza programa nee laos nudar portavoz MTCI maibe nudar ajente kontrolu social nebe mak Tane a’as valor Transparensia, Akuntabilidade no kombate korupsaun relasiona ho problema faan no distribuisaun foos MTCI inklui sosa produto local nebe mak laiha solusaun too agora maske husi parte hotu-hotu kritika makaas konaba kestaun nebe refere. Programa nee hahu husi tuku 10.00 too 11.30. Partisipantes iha programa nee mak estudantes UNDIL rasik ho dosentes sira.

LABEH mos kontinua programa refere iha Universidade da Paz iha loron 15 Maio 2010. Programa nee loke husi reprezentante Reitor UNPAZ......., hanesan iha Universidade sira seluk, estudantes sira antusiusmu tebes iha programa nee. Diretur LABEH mos aprezenta flowchart nebe MTCI uza hodi provoka atu estudantes sir a bele fo hanoin iha prosesu ida nee. Programa nee hola fatin iha Salaun konferensia ba Magistrado UNPAZ hahu husi tuku 10.00-11.30 OTL.

Iha loron 19 Maio 2010, LABEH mos kontinua programa refere iha Salaun konferesnia IOB. Programa nee loke husi Reitor IOB Augusto Perreira. Iha abertura programa nee, Reitor IOB hateten katak importante tebes intelektual sira nia hanoin ka kontribuisaun intelektual sira liu husi hatoo ideia. Iha sesaun hatoo opiniaun, estudantes barak hatoo sira nia opiniaun. Iha estudante ida neebe hateten katak “ wainhira naok ten ida seidauk tama kadeia, entaun sei laiha rasa tauk. Diak liu na’ok ten sira nee wainhira identifika sala tenki kaer sulan ba kadeia atu nunee, naok ten sira seluk sei tauk. se governu la fo sansaun ida maka prosesu nee atu diak nusa mos naok ten sei la tauk tanba nia hatene governu sei la kastigu nia. Husu atu governu implementa liafuan ida nebe hateten katak se mak naok lima cent sai, se mak servisu la hatene sai, nee tenki implementa lolos! ”. Interesante tebes atu governu konsidera sujestaun ida nee.

Programa hanesan kontinua mos iha Universidade Nasional Timor Leste (UNTL) iha loron 28 Maio 2010 nebe hola fatin iha salaun auditorium UNTL. Programa nee rasik loke husi Vice Reitor II Rosalino da Silva. marka prezensa iha programa nee mak estudantes ho dosentes sira husi Universidade nee rasik.

LABEH remata konsultasaun konaba Distribuisaun no Faan foos MTCI ho Sosa Produtu lokal ba nivel akademiku iha UNITAL ( Universidade Oriental) iha loron Sabadu, 29 Maio/2010. Programa nee rasik loke husi Reitor UNITAL Gregorio Lobo Pinto. Iha nia abertura Reitor nee hateten katak bazeia ba observasaun nebe durante nee nia hare konaba distribuisaun no faan foos MTCI no sosa Produtu lokal katak problema barak nebe mosu iha MTCI konaba assuntu foos MTCI mosu tanba MTCI fraku tebes iha problema jestaun/jestor no problema desizaun. Failhansu bazika iha jestaun politika katak husi prinsipiu iha hanoin e halo konseitu e halo desizaun konaba formatu atu halo programa refere mak la tepat, la bazeia ba iha informasoens nebe akurat husi fatin hotu-hotu.

Iha sesaun hatoo hanoin, Eusebio Quintas nudar Dekanu fakuldade Agrikultura UNITAL hato’o nia rekomendasaun katak diak liu kria mekanismu kontrolu ka monitoring ida iha distribuisaun no faan foos MTCI tanba falta tebes mekanismu kontrulu. Sujere mos MTCI konaba produtu lokal nian katak tenkiser kria mos industria ba agrikultor sira nia produsaun atu nunee bele produsaun sira nee labele dodok deit iha armazem. Iha fatin hanesan Delcio Guimaraes estudante fakuldade Ekonomia Departementu Manajementu rekomenda mos katak diak liu MTCI hahu intervensaun primeiru liu husi merkadoria katak regula presu ba sasan iha merkadoria, husu mos ba sira nebe mak toma konta ba distribuisaun no faan foos atu iha sentidu nasionalismu. 

Konsultasaun ho Sociedade sivil

Hafoin halao konsultasaun ho akademikus sira, LABEH kontinua halao programa refere ho sociedade sivil sira hotu iha loron 27 Maio 2010. Tanba LABEH mos konsidera katak sociedade sivil iha papel importante tebes iha prosesu ida nee. Nudar ajente kontrolu social, Sociedade sivil mos tenki fo hanoin ka mekanismu nebe diak atu nunee bele hakotu problema nebe mak lao ona besik tinan tolu nia laran nebe laiha solusaun klaru. Partisipasaun sociedade sivil importante tebes.

Alende prezensa sosiedade sivil nian, iha programa nee mos hetan partisipasaun maximu husi Estudantes LABEH-VS. Programa nee rasik lidera husi Diretur Ezekutivu LABEH Christopher Samson no hola fatin iha Salaun Departementu Edukasaun LABEH.

Konsultasaun ho Autoridade Lokal  

Hafoin konsultasaun ho akademikus ho sosiedade sivil, LABEH kontinua halao konsultasaun ho autoridade lokal iha Distritu Ermera iha loron 26/5. programa nee loke husi Administrador Distritu Ermera Victor dos Santos. Marka prezensa iha programa nee mak autoridade lokal sira hanesan chefe suku 52 husi suku iha Distritu refere, Administrador sub distritu 6 iha Ermera. Iha sesaun hato’o hanoin, Chefe suku sira maioria rekomenda katak presiza harii armazem iha Distritu atu nunee labele difikulta chefe suku sira nia servisu tanba hare ba infrastrutura baziku iha suku ida-idak la hanesan. Sira mos lamenta ho servisu funsionario MTCI iha armazem nebe mak la fo atensaun ba sira wainhira atu ba foti foos. Dalaruma sira bele hein too semana ida ka rua mak foin hetan foos no abandona hela servisu iha suku laran.

LABEH kontinua halao programa nee ho autoridade lokal ba dalarua iha Distritu Bobonaro iha loron 31 Maio 2010. programa nee rasik loke husi Administrador Distritu Bobonaro Paulo dos Santos. Marka prezensa iha programa nee mak autoridade lokal hanesan chefe do suku 50 husi suku 50 iha Distritu refere, Administrador sub distritu no funsionario administrasaun Distritu Bobonaro. Iha sesaun hatoo hanoin maioria autoridade lokal sira nebe mak partisipa rekomenda katak diak liu distribuisaun foos MTCI tenki direita husi nasional ba nivel Distritu depois mak aloka ba kada suku iha distritu refere, sira mos kestiona konaba servisu funsionario MTCI nian iha armazem nebe mak la fo importansia ba sira wainhira atu ba foti foos. Tanba akontese chefe suku balu ba toba iha armazem tanba deit hein mos no abandona fali servisu iha suku. Tanba nee sira sujere se Governu hakarak fo fiar ba sira diak liu mak foos tenki hodi mai iha distritu mak sira aloka ba suku atu nunee foos sira nebe iha povu sosa hotu tiha mak osan nee lori ba entrega ba Governu laos kobra uluk fali povu mak ba sosa tanba sira lakohi sai Chefe suku Kobrador.

Hafoin remata konsultasaun, LABEH kontinua halao programa One District, One village iha suku Odomau Distritu refere. Monitorizasaun halao ba iha konstrusaun EP Odomau Provisorio, konstrusaun Edifisiu Camara Municipio no Monitorizasaun iha Hospital Referal Maliana.

Hafoin Distritu Bobonaro, LABEH kontinua programa refere iha Distritu Manufahi(04/0510) Iha  programa   ne’e LABEH  konsege halo dialogu ho  Chefi suku sira, Administrador, inklui mos  Polisia Nasional Timor Leste (PNTL) ho UNPOL iha  Distritu Manufahi nebe tau hamutuk Hanoin  oin sa atu resolve  hodi hadia sistema  implementasaun ba distribuisaun fa’an fos MTCI  Iha Teritoriu tomak.

Iha sorumutu entre autoridade lokal iha Distritu refere ho LABEH, Chefi suku husi suku oin-oin kestiona konaba difikuldade nebe sira infrenta  mak halo kobransa ba sira nia komunidade  molok   ba  sosa  fos  husi Governu hodi fa’an ba sira nia populasaun iha suku nebe sira hela ba, problema atraza servisu suku nian wainhira chefi suku mai hein atu sosa fos MTCI husi Ministeriu kompetente no husik hela servisu nebe presiza atu halo iha suku  no mos  konfujaun ba folin  fos  ho nia  kilograma.

Chefi suku Agapito da Costa husi Suku Letefoho Distritu Manufahi  iha nia intervensaun hatete, sira la kontenti ho mekanizmu nebe Governu implementa mak chefi suku sira  halo kobransa ba sira nia populasaun molok atu mai sosa fos husi Ministeriu kompetente.Tanba tuir chefi suku ne’e dala barak mak sira triste tanba  familia balun kbiít la to’o atu sosa fos MTCI no akontese dala ida iha suku refere katak, wainhira chefi suku halo tiha kobransa orsamentu  hamutuk   husi komunidade ho razaun katak, komunidade  sei hetan fos MTCI  ho nia kilograma 30 nebe ho  folin $ 12 maibe toó iha amarjen nasional, fos nebe atu faán hela deit kilograma 35  nebe ho folin $ 16 no kilograma 25 ho folin $11.

Tanba ne’e chefi suku refere husu ba Ministeriu kompetente atu fo informasaun klaru kona ba definasaun fos nia kilograma ho nia  folin molok  distribui  para labele kria konfujaun  entre chefi suku ho  ninia populasaun iha baze tanba durante ne’e populasaun sira hatene deit fos MTCI nebe ho folin $ 12.

Entretantu iha sorumutu ne’e,  chefi suku Daisua  Alexandrino Tilman  husu ba  Governu atu buka meius diak ida hodi implementa lolos  para  chefi suku sira labele sai vitima iha prosesu distribuisaun fos MTCI.

Nune’e mos Chefi Suku Hatudu, Alarico dos Santos ho chefi suku Orlando Soares husi Suku Beremana Subdistritu Turiscai  kestiona konaba sistema nebe Governu hasai hodi haruka sira ba hatama osan iha Banku molok atu ba foti fos. Tanba ne’e nia husu ba Governu atu muda tiha sistema refere tanba fo atraza ba sira nia servisu iha suku,

“Dala ruma ami (Chefi suku sira) ba  forma antrian iha Banku to’o husik hela ami nia servisu iha suku kuaze semana ida resin  tanba deit  ba hein fos MTCI iha nasional nebe nia prosesu kleur tebes.  Tan ne’e hau husu ba Governu atu uza mekanizmu diak para bele fo benefisiu ba povu tanba durante ne’e problema akontese mak ami ba hatama tiha osan iha Banku maibe  ami lahetan nafatin fos MTCI. No ami rona informasaun katak fos MTCI  balun husik estraga deit iha amarjen maibe ami nia povu iha ne’e hakilar tanba  la asesu fos MTCI  no fos ne’e mos  hodi infeita deit iha Dili laran la toó mai ami iha baze,”haktuir  chefi suku.

Iha fatin hanesan Komandante PNTL Subdistritu Alas, Distritu Manufahi Valeiro Fernandes informa katak, iha Suku Alas populasaun barak mak la asesu  fos MTCI so iha  Loja ida deit mak faán fos ne’e ho folin $ 15. Maibe polisia labele  prende fos nebe faán liu  standar  $ 12  tanba populasaun iha suku refere presiza tebes fos. Komandante PNTL ne’e konkorda ho desizaun Primeiru Ministru Xanana Gusmão nian wainhira hala’o vizita ba Subdistritu Turiscai, deside  katak  presija  hari amarjen iha Distritu no Subdistritu.

Nune’e  mos Komandante PNTL Estasaun  Same Nivio C.J Baptista, husu ba Governu tenki muda sistema implementasaun fos MTCI tanba dala barak polisia sai fali inimigo ba populasaun sira no husu mos Governu atu kria dekreitu lei ida hodi garante no  bele fo sansaun ba ema nebe fa’an fos liu $12.Tanba dala barak polisia halaó orden hodi kaptura ema nebe faán fos liu presu $12 no wainhira halo konfirmasaun ho parte MTCI, sira haruka fali  polisia bolu ema nebe faán fos MTCI hodi fa’an iha polisia nia oin ho presu $ 12.  

Iha fatin hanesan Administrador Distritu Mannufahi, Filomeno Tilman konsidera konsultasaun nebe LABEH  hala’o  hanesan oportunidade ba sira atu bele hasoru malu hodi hato’o  ba orgaun kompetente  atu hadia sistema atendimentu  ba komunidade nebe relasaun ho sosa fos MTCI no sosa produtu lokal nebe povu sira produs.

Nia haktuir, iha area remota balun fos laiha tanba rajaun transporte  laiha no fatin balun fos iha maibe folin  sa’e to’o $ 18. Tanba ne’e ho konsultasaun nebe LABEH  halo bele kontribui ba MTCI  atu bele hadia sistema implementasaun iha distribuisaun fos MTCI  nebe  la to’o ba iha suku izoladu sira liu-liu  suku balun nebe iha Subdistritu Turiscai tanba durante ne’e fos MTCI to’o deit iha Turiscai vila no la to’o ba iha suku seluk tanba dalan a’at.  

Nia mos informa katak problema hanesan mos iha Subdistritu Fatuberliu iha suku tolu mak hanesan suku  Kaikasa, Fatukai  ho suku  Klarak  mak hetan asesu fos MTCI maibe iha Suku rua mak Fahi nehan ho wesusu  la asesu ba fos MTCI tanba problema dalan a’at no husi Subdistritu Alas so suku Umaberloek  mak hetan asesu  fos MTCI no suku  seluk hanesan suku Taitudak, Nahakida ho suku Aituha la asesu fos MTCI.
Administrador haktuir, kuaze maioria suku  mak la asesu fos MTCI tanba problema dalan  ladiak. Ho problema ne’e mak ema fa’an fos  sa’e   $17- $18 tanba  konta ho osan transporte.

Administrador husu ba Ministeiru kompetente tenki iha kontrolu maka’as ba prosesu distribuisaun fos MTCI   no   kria mekanizmu diak atu atende chefi suku sira atu lebele atraza servisu suku nian. Tenki tau loket no ajenda  ketak   ida ba chefi suku sira para bele atende lalais chefi suku sira tanba durante ne’e prosesu la’o kleur liu halo chefi suku sira husik hela servisu suku .
 
Governu  Tenki Identifika Lolos Produtu Lokal Nebe Atu Sosa

Iha parte seluk  autoridade lokal sira kestiona konaba programa “povu kuda  governu sosa” nebe durante ne’e halo povu konfujaun  tanba iha sosializasaun husi Governu hatete katak, Governu sei sosa produtu lokal iha teritoriu tomak maibe  realidade populasun barak mak hakilar kona ba sira nia produtu lokal nebe governu lasosa no husik  estraga deit.

Kestaun ne’e levanta husi chefi suku Dotik Subdistritu Alas Sebastião da Costa  hodi husu Governu atu kumpre sira nia desizaun no nia husu mos Ministeriu  Comersiu Turizmu no Industri (MTCI)  nebe iha loron 02-Junhu-2010  haruka sira nia membru ba hare produtu lokal  mak batar iha suku neba atu tenki ba sosa iha tempu badak tanba populasaun sira  hela promesa governu nian  atu  sosa sira nia batar no  nia mos husu  ba LABEH  atu reforsa  tan sira nia ejijensia ne’e ba governu.

Nune’e mos Administrador Distritu Manufahi, Filomeno Tilman  informa katak, iha suku weberek populasaun sira produs batar barak maibe to’o agora governu seidauk sosa. Aleinde batar  populasaun iha Distritu Manufahi mos iha produtu lokal mak hanesan kafe, kami’i, forekeli, foremungu no haré. 

Responde ba ejijensia hirak ne’e Direitur Lalenok Ba Ema Hotu (LABEH) Chiristopher Henry Samson promete sei rekomenda ba MTCI atu labele fo fos ba imprezariu nakal  nebe manipula folin fos no LABEH  husu ba MTCI atu  halos prosesu distribuisaun fos no tenki fo fiar ba chefi suku sira.Se Governu laiha  fiar ba chefi suku sira, entaun diak liu governu mak faán rasik fos MTCI.

LABEH  sei buka solusaun oin s abele resolve problema sira ne’e para bele fo fila dignidade chefi suku sira nian no MTCI tenki halos prosesu sira nebe la fo vantajen ba povu, polisia sira, MTCI  no chefi suku sira hodi implementa mekanizmu nebe diak liu para povu bele moris kontenti.

LABEH  husu ba governu labele foti desizaun plinplan  ba kilograma fos nian mak iha fos saku ida ho 25 kilograma, saku ida 30 kilogram no saku seluk 35 kilogram nebe dalaruma halo povu konfujaun tanba foin lalais akontese katak wainhira chefi suku halo tiha kobransa ba ninia populasun sira atu ba sosa fos ho kilogram  30 ho folin $ 12 nian maibe to’o iha Nasional fos refere hotu tiha ona no MTCI  fo  fila fali osan populasaun nian ba chefi suku. 

LABEH konsidera desizaun governu nian kria ona konfujaun  ba chefi suku ho ninia populasaun tanba kilogram fos nebe lahanesan, populasun bele deskonfia chefi suku han sira nia osan.Signifika wainhira fos nia kilogram la to’o 30 ne’e sei hamosu problema entre chefi suku ho populasun sira.

LABEH rekomenda Governu tenki  esplika klaru ba populasaun  no labele halo chefi suku sai vitima ba mekanizmu distribuisaun fos MTCI. No  ejijensia LABEH nian mak povu tomak tenki asesu fos MTCI.

Entretantu kestaun kona ba Governu atu  sosa produtu lokal, LABEH konsidera failhansu bo’ot nebe mai husi Governu rasik tanba la esplika klaru ba populasaun sira katak produtu lokal saida mak governu atu sosa. *