LABEH Fo Graduasaun Ba Estudante LABEH-VS Hamutuk 101

LABEH  Fo  Graduasaun Ba Estudante  LABEH-VS Hamutuk  101
Dili- LABEH, iha loron Sesta (18/12/09)  ofisialmente fo graduasaun ba estudantes kompostu husi estudantes kursu Jornalizmu, Administrasaun no kursu lian Ingles, periode I  hodi intrega sertifikadu ba estudantes hamutuk 101. 
Sekretariu Estadu Formasaun Professional  e  Impregu (SEFOPE), Bendito Freitas  sente kontente tebes ho programa LABEH nian hodi  fo kursu lian ingles, Jornalizmu, Administrasaun no teknolojia eletrisidade ba juventude sira tanba ida ne’e hanesan asuntu kompenentes nebe relevantes tebes ba ejijensia Estadu modernu  nian.

Bendito haklaken,Timor Leste  hanesan Nasaun foun maibe Nasaun ida nebe hakarak hatudu Estadu modernu, intredependensia global  ho  nesesidade hirak ne’e hotu ejiji  atu buka tuir rekursus humanus. Tanba ne’e Governu  servisu hamutuk ho Sosiedade Sivil   dezenvolve rekursus humanusa hodi kontribui ba dezenvovimentu nasional. Sekretariu Estadu husu ba juventude sira  nebe simu graduasaun atu prepara an ba futuru  hodi kaer Nasaun Timor Leste  iha  seitores hotu-hotu. “Hau aproveita okaziaun ne’e hodi  agradese ba Direitor LABEH  Dr. Chiristopher Henry Samson no mos  treinadores  nebe  fo formasaun ba juventude sira. Ne’e hanesan  reflesaun kona ba parseiria ida nebe importante tebes  e Sekratariu   Estadu Formasaun Professional  e  Impregu  hanesan entidade Governu  responsavel  ba  area formasaun professional, imprego no mos trabalho  iha ona parseiru diak ho LABEH  nebe kualidade iha  formasaun,” dehan Bendito iha nia diskursu Sesta  (18/12/09) iha  Edifisiu LABEH iha Komoro Kampung Baru.

Nia haktuir, LABEH iha kualidade diak tebes no tenki nakloke tan ba juventude sira nebe presiza  tebes  sentru formasaun atu bele apoiu no  SEFOPE espera  katak  ba oin bele servisu hamutuk nafatin ho LABEH.“Se ba oin mak LABEH   halo nia programa to’o iha Distritu, ita servisu hamutuk para programa kapasitasaun bele integradu no  ita bele kopera hamutuk para rezultadu bele sai diak liu tan liu-liu ligasaun mos ba iha Media sira nebe tinan ida ne’e Governu mos apoiu hodi haruka jornalista sira   ba tuir formasaun iha Indonezia,” nia haktuir.

Bendito husu ba joven sira atu aproveita didiak oprtunidade nebe LABEH oferese tanba rezultadu husi kursu nebe LABEH fo mak joven balun ba kontinua ona estudu iha Nasaun Australia, Filipina  no  Nasaun Estranjeiru seluk tan. Ida ne’e hanesan susesu bo’ot ida nebe LABEH kontribui ba Nasaun liu-liu iha aspetu dezenvolvimentu  rekursus humanus no kapasitasaun. Objetivu estuda ingles mak bele iha asesu ba impregu ka servisu, ida seluk mak atu kontinua estudus ba rai liur,” haktuir Bendito.

Iha serimónia  graduasaun ne’e Direitur   LABEH  Dr. Christopher Henry Samson liu husi nia diskursu  hatete, LABEH  liu husi Departementu Edukasaun  mak LABEH  Vocational School asina akordu  ho Dili Institute Of Thecnologhy, hodi oferese matenek iha  level  universitariu   ba Estudante Administrasaun sira durante fulan simu teoria iha LABEH no remata ho estaziu fulan tolu.“Estudante sira nebe tama iha baze Administrasaun la hetan matenek iha LABEH deit maibe hetan mos matenek iha DIT no mos  Instituisaun sira seluk liu husi  prosesu   Estaziu durante fulan tolu  mak foin  simu Graduasaun,” dehan Christopher.

Christopher haktuir, LABEH mos asina akordu ho Instituisaun Press Club  mak Instituisaun Media nebe  fo sai asuntu dezenvolvimentu  iha Nasaun laran liu husi Jornal, Radio no Telivizaun. Nia deklara, LABEH oferese kursu  ba juventude sira nebe hakarak sai jornalista liu-liu iha area investigativu atu sira bele partisipa mos  hodi fo informasaun klaru ba publiku kona ba dezenvolvimentu nasional.“Estudantes Jornalista durante fulan tolu halo sira nia prosesu aprendisajem  no fulan tolu LABEH haruka sira ba halo estaziu iha Instituisaun  media hotu-hotu mak hanesan  jornal STL, Timor Post, Diariu Nasional, Kla’ak, Tempu Semanal, Radia Klibur, no  TVTL,” tenik Direitur.

Nia haklaken, Prosesu aprendisajem  iha LABEH mak eskola fulan tolu hodi simu teoria no fulan tolu haruka ba pratika  para LABEH bele hatene kualidade estudante sira nian liu husi rekomendasaun husi Instituisaun hirak nebe estudante sira ba halo estaziu  para  bele determina estudante   bele  hetan sertifikadu. “Nune’e  mos prosesu  aprendisajem   ba  estudantes  kursu lian Ingles hanesan   teoria, prátika koalia lian  ingles  mak  LABEH realiza  programa espesial ba estudante  sira hanesan Estudy Group,Speaking Tours, Reading Day  no  Talent Night molok tama ba ezame ikus.”
 Dehan tan Christopher, Prosesu kursu lian ingles  iha LABEH  Vocational School fahe ba parte 4 mak hanesan  English Basic  prosesu fulan 3, English Diploma (D1) fulan 6 no Especial Classe durante  tinan 1.Diretor informa katak,  hahu fulan Abril  to’o Dezembru LABEH simu estudantes hamutuk 250  maibe sira nebe konsege remata kursu hodi  simu sertifikadu mak 101.

Iha fatin hanesan Sekretariu Jeral Media Press Club. Paulino  Quintas hatete, Media liu husi  atividade jornalizmu hanesan parte kontribuisaun ida  hodi hametin estabilidade ho unidade iha Nasaun laran  tanba wainhira ema ida kuasai  media  buat nebe akontese mak estabilidade iha rai laran iha ga  la’e?
Nia haktuir, estudantes Jornalista nebe ba halo estaziu bele ona produs notisia hodi hatudu ona sira nia hasil karya liu husi Jornal, radio, no Telivizaun. “Ami fo obrigadu barak ba LABEH nebe fo ona oportunidade ba  Press Club hodi  fo formasaun ba Joven sira nebe hakarak sai jornalista investigativu e hau hanoin ita foin mak ukun an presiza tebes atu aprende tan  husi Media rai seluk para bele dezenvolve ita nia Nasaun ba oin,”haktuir Paulino.

Entretantu Treinadora husi DIT, Carla A.J. agradese tabes ba LABEH tanba fo ona oportunidade  ba juventude sira nebe laiha oportunidade atu kontinua sira nia servisu no  eskola ba iha universitariu. “DIT agradese tebes ba LABEH nebe  haruka nia estudantes Administrasaun ba halo estaziu iha Instituisaun refere durante fulan tolu nia laran  no  DIT  kontinua servisu hamutuk ho LABEH hodi ajuda Governu atu bele dezenvolve Nasaun liu husi formasaun professional ,” nia hatete. Nia mos fo parabéns ba estudante  Administrasaun  nain 8 nebe halo estaziu  tanba nain 3 konsege sai fungsionariu ka servisu ona  iha Instituisaun Dili Of Thecnology.