"LABEH Realiza Programa Kalan Talenta, Reading Day no Speaking Tour Ba Estudante Kursu Lian Ingles”

"LABEH Realiza Programa Kalan Talenta, Reading Day no Speaking Tour  Ba Estudante Kursu Lian Ingles”

Departementu Edukasaun no Hasa’e Kapasidade LABEH nudar Departementu ida nebe mak durante ne’e fo formasaun kursu lian Ingles ba Timor oan sira nebe mak hakarak promove sira nia skill iha lian Ingles. La to’o iha ne’e deit, Departementu ida ne’e mos kontinua fo formasaun ba Timor oan sira iha area oi-oin hanesan kursu Administrasaun, Arte (Poezia, Teatru), Jornalismu, Matematika, Fizika no Kimika baziku, Electrical Technology no Information Technology.

LABEH iha loron 27 fulan Novembru 2009 realiza kalan talenta ba estudante iha area kursu Ingles LABEH Vocational School of  Languages And  Humanities  periode I  hamutuk  79  nebe  durante ne’e tuir kursu lian ingles. Kalan talenta ne’e realiza ho objetivu  atu promove no dezenvolve  estudante sira idak-idak nia  kapasidade liu-liu mentalidade hodi koalia lian ingles iha oin no atu dudu sira hosi hatene buka saida los mak sira nia talenta.

Iha serimonia ne’e  estudante idak-idak hatudu sira nia kapasidade iha lian ingles  nebe durante ne’e sira aprende hodi aprezenta sira idak-idak nia talenta ho lian ingles.
Alende serimonia aprezentasaun ba kalan  talenta, LABEH mos hala’o ezame listening  ba estudante hamutuk 75 husi total estudante 79  liu husi hatudu filmajen ba estudante sira atu sira bele rona hodi hakerek saida deit ka halo rezumu husi saida mak sira rona no hare iha filmajem nee.

LABEH uza metodu  fo testu ba estudante sira  ho loke filmajen  para bele hare to’o iha nebe  estudante sira nia kapasidade atu rona no  hakerek lian ingles.

Kalan talenta nebe realiza hanesan mos programa especial husi programa tolu nebe mak prepara ona hanesan Reading day program no speaking tour program ba kursu lian ingles iha LABEH. Objetivu principal mak atu estudantes sira hatene saida mak sira nia talenta no oinsa atu uza didiak talenta nebe sira iha hodi hetan benefisiu ruma. Liu-liu atu dudu joven sira uza kapasidade nebe sira iha hodi labele tane liman demais ba governu ka depende ba emaseluk. Hanesan liafuan murak husi John F. Kennedy nebe dehan “ Don’t ask what  your country can do for you, but ask what  you can  do for your country”.
 
Estudante sira iha interese tebes iha kursu lian ingles hodi hatudu duni sira nia  semangat iha kalan  aprezentasaun   hodi hato’o diskursu kona ba sira nia talenta ho lian ingles liu-liu hatudu sira nia vontade durante  aprende  lian ingles nebe  la para deit  iha aula laran maibe  sira mos bele hatudu ba ema seluk kona ba sira nia parendezajem iha  lian ingles liu husi rezultadu kalan talenta nian.
 
Serimonia kalan talenta nebe  hahu iha oras tuku 19.30   no remata iha oras tuku 07.30  hetan partisipasaun maksimu husi Estudantes nebe kompostu husi Estudantes Basic Class, Estudantes D1, no  Estudantes Especial Class,  Professores inklui seguransa husi  Polisia Nasional Timor Leste (PNTL).

Iha programa  ne’e, LABEH mos  konvida bainaka espesial mak Sr.Abe Barreto ho Sr.Agusto  nebe  anima  estudantes  liu husi musika no puezea (puisi) hodi fo hanoin ba estudantes sira oin sa atu dezenvolve talenta nebe sira idak-idak iha ona.
Iha lia menon badak nebe bainaka Sr.Abe Barreto ho Sr.Agusto  husik hela mak husu estudantes atu aproveita oportunidade nebe LABEH oferese liu-liu buka atu rega  fini kiík nebe LABEH  kuda   hodi  bele sai boot iha idak-idak nia an no husu estudantes keta husik liu oportunidade nebe LABEH oferese  tanba liu husi momentu sira hanesan ne’e  mak  estudantes bele hatene  sira nia kapasiadade iha  lian ingles.

Molok atu realiza  kalan talenta, iha loron 21 fulan  Novembru LABEH hala’o uluk programa Reading Day ba Estudante kursu lian ingles D1 iha Monumentu João Paulo II Tasi Tolu ho objetivu mak atu hatene diak liu tan estudante sira nia komprensaun wainhira le’e livru ho lian ingles.

Remata tiha programa rua ne’e, tuir planu LABEH sei realiza ezame ba estudante Basic Class  no sei halo mos Speaking Tours ba estudantes Especial Classe iha loron Sabadu 05 fulan Dezembru 2009.